Ladronisia den negoshi
Djaluna 26 di mei, a drenta keho di ladronisia den un negoshi situá na Kaya Krabè. Deskonosínan a fòrsa un hèkwèrk i a drenta e negoshi via un skùifdùr i a bai ku sèn kèsh i otro produktonan. Investigashon den e kaso ta kontinuá.
Detenshonnan pa manehá bou di influensia
Den e siman tras di lomba, a detené un total di 4 persona pa manehá bou di influensia di alkohòl. A hasi un tèst di supla ku tur, ku resultado positivo. Pa e motibu aki a detené nan i a hiba nan warda di polis pa un análisis di rosea.
A konsekuensia di e resultado di esaki un hòmber di inisial E.C.H. di 58 aña di edat a haña un prohibishon pa manehá di 7 ora. E no tabatin su reibeweis kuné na e momentu ei. Pa e motibu aki el a haña un but i a dun’e òrdu pa entregá su reibeweis na polis, ya ku a konfiská esaki debí ku e tabata manehá bou di influensia di alkohòl.
Un hòmber di inisial A.M.C di 23 aña di edat a haña un prohibishon pa manehá di 3 ora despues ku el a pèrdè kòntròl i a dal den un baki di mata i un palu riba Bulevar Gobernador N. Debrot.
A detené un hòmber di inisial J.E. di 34 aña di edat pa manehá bou di influensia di alkohòl despues ku a par'é pa un kòntròl rutinario. E sospechoso a haña but komo ku e no tabatin reibeweis i tambe pa manehá sin seguro bálido.
A detené un dama di inisial J.A.G di 19 aña di edat pa manehá bou di influensia di alkohòl despues ku a par'é riba su skuter pa un kòntròl rutinario. A konsekuensia di esaki a konfiská su reibeweis.
Detenshon pa maltrato di bestia
Djabièrnè 23 di mei 2025, a detené un dama di inisial V.J.E.E, di 60 aña di edat pa maltrato di bestia. Despues di vários notifikashon di habitantenan di e bario, polis i ‘Dierenbescherming Bonaire’ a bishitá kas di e sospechoso. Den e kas a topa ku vários pushi, kachó, para, galiña, konènchi i turtuga.
Tur bestia tabata neglishá i tabata den kondishon di biba no saludabel. Den kolaborashon ku Ministerio Públiko BES, ‘Dierenbescherming Bonaire’, ‘Animal Shelter Bonaire’, F.K.K. ‘Animal Rescue’, ‘Horse Ranch Bonaire’, ‘Wild Bird Rehab’ i un dòkter di bestia, a saka e bestianan for di e kas.
A konfiská un total di 100 bestia. Despues di investigashon dor di e dòkter di bestia, mester a pasa 32 bestia angua. A akomodá e sobra bestianan temporalmente na diferente organisashon di bestia.
Ladronisia di skuter
Djadumingu 25 di mei, a drenta keho di ladronisia di un skuter blanku ku pretu di marka Sym, modelo Xpro, ku plachi di number MF-1601. E skuter no tabata na lòk i tabata stashoná dilanti di un kompleho di apartamentu situá na Kaya Den Haag.
Djaweps 22 di mei, a drenta keho di ladronisia di un skuter pretu di marka Kymco, modelo Agility, ku plachi di number MF-4808. E skuter no tabata na lòk i tabata stashoná dilanti di un kas na Kaya IR. Randolph Statius van Eps.
E kasonan ta bou di investigashon.
Detenshon pa enkubrimentu
Djadumingu 25 di mei, alrededor di 1.30 or di mardugá, a detené un hòmber di inisial R.Z.T. di 18 aña di edat na Kaya C.E.B. Hellmund pa enkubrimentu. A detené e sospechoso despues ku a kontrolá un baiskel ‘fatbike’ ku e tabata kore. Durante di e kòntròl a resultá ku e baiskel tabata registrá komo hòrtá despues ku a entregá un keho. A konfiská e ‘fatbike’ hòrtá.
Atrako armá
Djaweps 22 di mei, alrededor di 7.45 or di anochi, ‘meldkamer’ sentral a risibí notifikashon tokante un atrako armá na un supermerkado situá na Kaya Papa Cornes na Antriol.
Dos sospechoso, bistí ful na pretu ku kara tapá, posiblemente entre 15 pa 18 aña di edat, a menasá e doño ku arma di kandela i a logra bai ku plaka kèsh i un oloshi di marka Rolex. E sospechosonan a lòs dos tiru den laira i a bandoná e sitio na pia den direkshon di Kaya Korona.
Kuerpo Polisial ta pidi un i tur ku por a mira òf sa algu tokante e atrako armá aki pa yama 715 8000 òf e liña di tep anónimo 9310.
Investigashon den e kaso ta andando.
Aksidente entre dos outo
Djaweps 22 di mei, alrededor di 7.50 or di mainta, ‘meldkamer’ sentral a risibí notifikashon tokante un aksidente entre dos outo riba Bulevar Gobernador N. Debrot. Na yegada di e patruya a resultá ku outo 1 a dal patras di outo 2. Ambos shofùr a resultá heridá i ambulans a transportá nan pa hòspital pa tratamentu médiko.
Vehikulo na kandela
Den oranan di mardugá di djaweps 22 di mei, alrededor di 1.30 or, 'meldkamer' sentral a risibí notifikashon tokante un outo na kandela na un kas situá na Seru Grandi. E kandela a kuminsá kima parti di e kas. Na yegada di patruya i brantwer, habitante di e kas a deklará ku el a tende un eksploshon. El a bai wak i a mira ku e outo tabata na kandela. Brantwer a logra paga e kandela. No tabatin herido. Ta investigando kousa di e kandela.
Detenshon pa violashon di Lei di Opio
Djárason 21 di mei, alrededor di 7.05 or di anochi, a detené un hòmber di inisial E.T.B. di 53 aña di edat na un kas na Kaya Kariñoso pa violashon di Lei di Opio BES. A detené e sospechoso despues ku e mes a duna di konosé ku e ta bende droga i a top’é ku algun saku chikitu ku probablemente supstansianan narkótiko. A konfiská esakinan.
Kòntròl di tráfiko planiá
Djárason 21 di mei, un kòntròl di tráfiko planiá a tuma lugá na Kaya J.C. van der Ree na altura di Kaya Nikiboko Sùit. A para i a kontrolá un total di 30 vehíkulo. Aki a repartí 6 but. Algun shofùr a risibí but pa mas ku un infrakshonnan.
E butnan tabata lo siguiente:
-
1x pa kore sin faha di seguridat;
-
4x pa kore sin seguro bálido;
-
2x pa kore sin reibeweis bálido;
-
1x pa tene un telefòn den man ora ta manehá.
Di e 6 shofùrnan ku a haña but, unu tabata menor di edat.
KPCN ta atvertí tur hende pa sigui reglanan di tráfiko. Ku esaki, bo ta kontribuí na un tráfiko seif riba e isla. Lo tin kòntròlnan regular den e próksimo periodo, kaminda lo aktua estriktamente si dokumentonan no ta na òrdu òf si un hende no ta sigui reglanan di tráfiko.
Si bo no ta sigui e reglanan? Bo por haña un but. E montante di un but pa e infrakshonnan ariba menshoná ta variá entre $30 i $225.
Detenshon pa ladronisia
Djárason 21 di mei a detené un hòmber di inisial C.D.G. di 57 aña di edat den ‘Sabadeco Shores’ pa ladronisia. E sospechoso a purba bai den su pikòp ku piedranan ku ta uza pa traha un kurá, for di un tereno i e doñonan di e tereno a gar’e. Ta investigando e kaso.
Insendio
Djárason 21 di mei a drenta keho di insendio i destrukshon na un kunuku na altura di Flor di Cuba. Entre djasabra 17 i djaluna 19 di mei, deskonosínan a pega un stal di porko traha di palèt, na kandela, miéntras tabatin porko den e stalnan. E stalnan a kima kompletamente i 12 di e 25 porkonan ku tabatin den e stal, a muri. Ta investigando e kaso.
Detenshon pa violensia públiko
Djamars 20 di mei a detené un hòmber di inisial R.F.M. di 19 aña di edat pa violensia públiko. E sospechoso tabata enbolbí den un bringamentu na Kaya J.N.E. Craane. Ta investigando e kaso.
Tres detenshon pa ladronisia di kabritu
Djamars 20 di mei a detené tres persona pa ladronisia di kabritu despues ku a garanan den besindario di Gurubu. Ta trata di un hòmber di inisial J.R.A. di 54 aña di edat, un hòmber di inisial R.M.D. di 54 aña di edat i un hòmber di inisial O.F.R.T. di 18 aña di edat. Alrededor di 4 or di atardi riba e fecha menshoná a gara e 3 hòmbernan na momentu ku nan tabata transportá un kabritu. A bai ku e kabritu warda di polis i a pone un potrèt i hasi yamada via di e página di Facebook di KPCN pa logra haña doño di kabritu. Algun ora despues e doño di e kabritu a mèldu na warda di polis ku prueba bálido ku e kabritu ta di dje i el a entregá keho di ladronisia.
Polis ta hasi un sugerensia na kriadónan di kabritu pa marka esakinan i/òf tin potrèt di kabritu (nan) ku nan ta kria pa den kualke kaso por demonstrá e ta pertenesé na bo.
Aksidente den kadena entre tres vehíkulo
Djaluna 19 di mei, un aksidente den kadena entre tres vehíkulo a tuma lugá na Kaya Korona. Tur tres vehíkulo tabata kore for di Playa den direkshon nort. E shofùr di un di e vehíkulonan tabata keha di doló i ambulans a transport’é pa hòspital pa kòntròl médiko. Konforme e maneho di ‘botsen is blazen’, a hasi un tèst di supla ku e otro 2 shofùr di kua ámbos ku resultado negativo.
Bo a mira algu sospechoso? Yama 717 8000 òf e liña di tep anónimo 9310.