Deklarashon di Privasidat

1. Esun responsabel pa prosesamentu

Nos Minister di Hustisia i Siguridat ta esun ku tin loke nos ta yama e responsabilidat di prosesamentu pa e Kuerpo Polisial Hulanda Karibense (KPCN). E Minister ta stipulá ku ki meta i ku ki rekurso, kon, i ki dato ta prosesá. Esun responsabel pa prosesamentu mester sòru pa kumplimentu ku legislashon i regulashon tokante privasidat. 

Hefe di kuerpo ta enkargá ku e guia diario di KPCN i tin e mandato di responsabilidat pa prosesamentu. Fuera di polis tin otro organisashon, manera Koninklijke Marechaussee i Wardakosta, ku ta enbolbí ku investigashon. Nan tin nan propio persona ku ta responsabel pa prosesamentu.

Prosesadó i kombenio di prosesadó

Polis no por ehersé tur prosesamentu di dato nan mes. Tin biaha nos ta delegá esaki na un otro partido: e prosesadó. Pa pèrkurá pa e prosesadó aki kumpli ku legislashon i regulashon di privasidat i e normanan di maneho di polis, nos ta redaktá un kombenio di prosesamentu.

2. Pakiko polis ta prosesá dato personal?

Lei ta bisa ku mester prosesá dato personal di forma legal. Komo polis, nos tin di haber ku dos lei: e Wet bescherming persoonsgegevens (BES) (Lei di protekshon dato personal (BES), i e Wet politiegegevens (Wpg, Lei di dato polisial). Fuera di e dos leinan aki, tambe tin otro lei ku ta bisa algu tokante prosesamentu di dato personal den situashon spesial.

Lei di dato polisial (Wpg): tarea polisial

Prosesamentu di dato personal pa ehekushon di nos tarea polisial ta kai bou di e Wpg. Aki por pensa na dato ku nos ta kompilá pa investigashon di echo kastigabel, mantenshon di e órden públiko, òf asistensia. Klaro ku nos ta hasi tur esaki den e kuadronan di lei.

Lei di protekshon dato personal BES (Wbp BES): operashon interno

Fuera di ehekushon di tarea polisial, tambe nos ta un empresa ‘normal’. E Wbp BES ta aplikabel riba e prosesamentu di dato pa nos maneho interno, manera atministrashon di personal, trato di keho, fasilidatnan di ICT, merkadeo, i komunikashon.

Ainda tin mas tarea ku ta kai bou di e Wbp BES: dunamentu di pèrmit dor di hefe di kuerpo, e tarea di polis pa supervishon di strañero, i maneho di e meldkamer (sentral di alarma) di 9-1-1 dor di e hefe di kuerpo.

3. Supervishon di strañero

E Departamento Supervishon di Strañero di KPCN ta prosesá dato personal di i tokante e strañero a base di e Wet toelating en uitzetting BES (Lei atmishon i ekspulshon BES). Tantu di strañero ku ke entregá un petishon pa estadia komo di strañero ku tin pèrmit di estadia na Hulanda. 

Tin prosesamentu di dato di otro persona (embolbí) tambe, manera di miembro di famia, intérprete, apoderado, i empleado di instansianan di gobièrnu ku nos ta kolaborá kuné. Nos ta trata e datonan personal ku konfidensialidat. Aki ta trata di dato personal ku bo a fasilitá na nos komo strañero òf komo persona embolbí. Nos ta prosesá dato personal tambe den ehekushon di supervishon a base di e Wet arbeid vreemdelingen (Lei laboral stranhero). 

Fuera di e datonan NAW (naam, adres en woonplaats; nòmber, adrès i lugá di biba), Departamento Supervishon di Stranhero tambe ta prosesá datonan manera adrès di meil, number di telefòn, nashonalidat i number di pasport, fecha i lugá di nasementu, sekso, estado sivil, lenga papiá, i e numbernan personal ku lei ta dikta manera number di stranhero, number di Sédula, i e sobrá datonan for di kua por derivá identidat di e stranhero.

Fuera di e datonan personal general aki, e Departamento Supervishon di Stranhero den sierto kaso tambe ta prosesá dato personal spesial ora esei ta nesesario pa ehekushon di nos tarea. Esaki por ta datonan manera rasa òf desendensia étniko, konvikshon polítiko, religioso, òf filosofia di bida, pero tambe informashon tokante salú, komportashon òf orientashon seksual, i informashon tokante kondena penal i echo kastigabel.

4. Kámara di siguridat

Polis ta hasi uso di kámara di siguridat pa protehá su propio empleadonan, edifisionan, i propiedat. E informashon aki ta kai bou di e Wbp BES.

Kámara pa e tarea polisial

Polis ta hasi uso di tantu kámara fiho komo kámara móbil. Prosesamentu di e datonan aki ta kai bou di e Wpg. Den sierto situashon, kolaboradónan polisial tin bodycam bistí di forma visibel. Ora nan hasi esaki, tin grabashon di tantu imágen komo sonido. Bodycam no ta sendí tur ora. Ta na e kolaboradó individual pa determiná ki ora e ta sende esaki, i esaki mester ta visibel tambe. Pues no por papia di grabashon den sekreto.  

E munisipio, a base di art. 156 Wet openbaar lichaam BES (Lei Entidat Públiko BES) por kologá kámara fiho na benefisio di mantenshon di e órden públiko. Gezaghèber ta disidí unda ta kologá e kámara, pero e imágennan optené ta kai bou di e Wpg, di moda ku nan ta kai bou di responsabilidat di prosesamentu di hefe di kuerpo.

5. Meldkamer 911- sentral di alarma

24 ora pa dia, 7 dia pa siman, e Unidat Meldkamer ta enkargá ku tuma, elaborá, i registrá tur notifikashon (urgente) di siudadano na benefisio di polis, Koninklijke Marechaussee, kuido di ambulansia, kuerpo di bombero i wardakosta. A base di evaluashon i di prioritashon ta duna e asistensia adekuá. Ademas, e Unidat Meldkamer ta responsabel pa uso di vehíkulo i unidat di asistensia, i e meldkamer ta kordiná i sostené e komunikashon entre servisionan, unidatnan, i esnan embolbí durante insidente. E Unidat Meldkamer ta vigilá preparashon pa aktua mesora i disponibilidat di vehíkulo i unidat di tantu polis komo kuerpo di bombero. Ademas, e Unidat Meldkamer ta enkargá ku ampliashon (yama funshonario) i ku komunikashon den kaso di insidente di eskala grandi.

6. Outorisashon i siguridat di informashon

Outorisashon

Solamente kolaboradónan ku tin outorisashon ta haña akseso na dato. Nan por mira solamente e datonan ku nan mester pa por hasi nan trabou. Ta posibel pa nos duna akseso na kolaboradó di otro organisashon ku tarea di investigashon. Nan tambe ta haña akseso solamente na e datonan ku nan mester pa por hasi nan trabou.

Ta hasi uso di datonan di logging

• pa kontrolá legitimidat di e prosesamentu di dato;

• pa kontrolnan interno;

• pa garantisá integridat i siguridat di dato polisial;

• pa prosedura penal.

Siguridat di informashon

Polis ta tuma medida adekuá – na nivel tékniko i organisatorio – pa protehá dato polisial òf personal kontra prosesamentu sin outorisashon òf ílegal, kontra pèrdida, destrukshon, òf daño intenshonal.

7. Periodo di warda

Wet politiegegevens (Wpg)

E Wpg (Lei di dato polisial) ta kontené periodo fiho pa warda dato personal. Tambe, e Wpg ta distinguí entre eliminashon i destrukshon di dato. Ora nos eliminá dato, ainda nan no a bai definitivamente. Ta manera nos ta pone nan tras di un skòt digital, i en prinsipio ya no ta posibel pa wak nan. Esei ta posibel solamente ora tin motibu urgente pa hasié, i bou di kondishonnan.

Destrukshon ta un akto definitivo. No ta posibel pa buska e datonan bèk mas.

Artíkulo 13 ta un artíkulo apart den e Wpg, i e ta trata di prosesamentu mas aleu di dato. Esei ta nifiká ku por papia di un otro meta for di e motibu dikon a kompilá e datonan. E periodonan pa warda dato pa e meta saká for di artíkulo 13 Wpg ta stipulá den un protokòl apart.

Periodo pa warda dato di logging pa dato di Wpg
E periodo di warda datonan di logging tin konekshon ku e ouditoria di privasidat periódiko ku polis tin e obligashon di hasi. E ouditoria eksterno aki ta tuma lugá kada 4 aña, despues di kua posiblemente un chekeo por bolbe tuma lugá. P’esei a fiha un periodo máksimo di 5 aña pa warda dato di log. 

Wet bescherming persoonsgegevens BES (Wbp BES)

E Wbp BES (Lei di protekshon dato personal) no ta menshoná un periodo di warda konkreto. Serka polis, nos ta warda dato personal pa e tempu nesesario pa e meta ku a kompilá nan p’e, òf ku ta rekerí a base di e lei di archivo. No ta warda dato mas largu ku lei ta pèrmití. Tin biaha tin otro leinan na vigor ku ta stipulá un periodo di warda spesífiko. 

Periodo di warda dato di logging pa dato di Wbp BES
Datonan di Wbp BES tambe ta warda en prinsipio pa 5 aña, pero ta posibel pa warda dato di logging di sierto aplikashon di maneho interno pa un periodo mas kortiku. E ora ei ta trata di kasonan unda wardamentu di dato no ta nesesario mas pa motibu di responsabilisashon. Aki por pensa na e logging riba sistema pa reservá sala.

8. Eliminashon i destrukshon

Wet politiegegevens (Wpg)

E Wpg (Lei di dato polisial) ta hasi distinshon entre eliminashon i destrukshon di dato. Ora nos eliminá dato, ainda nan no a bai definitivamente. Ta manera nan ta bai para tras di un skòt digital, i no ta posibel pa konsultá nan mas. Pero si resultá ku nos tin mester di e datonan pa un prosedura di keho, òf pasobra mester duna kuenta tokante di nan, nos por pidi pa nan.

Ora mester hasi un investigashon grandi ku tin un impakto grandi riba e órden legal, e ora ei por bolbe prosesá, i pues tambe konsultá, e datonan aki. Esaki ta posibel solamente ora e fiskal duna enkargo pa hasi esei. 

Destrukshon ta un akto definitivo. No ta posibel pa haña e datonan bèk.
 

Wet bescherming persoonsgegevens (Wbp BES)

E Wbp BES (Lei protekshon dato personal) no ta hasi un diferensia entre eliminashon i destrukshon, i solamente ta papia di destrukshon. Nos no por warda dato mas largu ku ta nesesario pa e meta di prosesamentu. Despues nos mester destruí nan. E pregunta kon largu nos ta warda e datonan ta diferente pa kada kaso.

9. Kompartimentu di dato

Wet politiegegevens (Wpg)

Fuera di polis, e Wpg tambe ta aplikabel riba Koninklijke Marechaussee, Reshèrshi di Reino, i Wardakosta.

E Wpg tambe ta aplikabel riba prosesamentu di dato personal dor di agente ekstraordinario di polis (Bavpol). Nan ta traha entre otro na:

• Ofisina di Impuesto Hulanda Karibense, departamento di Duana

• Arbeidsinspectie Caribisch Nederland (AI-CN, Inspekshon di Labor Hulanda Karibense)

• Entidat Públiko Boneiru (OLB) - serka e direktiva di Toezicht en Handhaving (T&H, Supervishon i Mantenshon) ámtenar pa enseñansa obligatorio

• Stichting Nationale Parken Sint Eustatius (Stenapa, Fundashon Parke Nashonal Sint Eustatius)

• Stichting Nationale Parken Bonaire (Stinapa, Fundashon Parke Nashonal Boneiru)

• Saba Conservation Foundation (SCF, Fundashon Konservashon Saba)

Ora ta nesesario pa e tareanan di e partidonan aki, polis ta hasi dato polisial disponibel p’esei. Esaki no ta konta pa instansia ku no ta kai bou di e Wpg.

Polis por suministrá dato únikamente na partido ku no ta kai bou di e Wpg ora tin un base legal p’esei.

Na benefisio di e supervishon di stranhero tambe polis ta haña dato personal di stranhero, di un persona embolbí manera un intérprete òf un apoderado, i/òf di partnernan di kolaborashon (den e kadena di stranhero). 

Tin kompartimentu di dato ku partnernan di kolaborashon; esnan prinsipal ta:

• Immigratie- en Naturalisatiedienst (IND, Servisio di Inmigrashon i Naturalisashon);

• Dienst Terugkeer & Vertrek (DT&V, Servisio Regreso & Salida); 

• Arbeidsinspectie Caribisch Nederland (AI-CN, Inspekshon di Labor Hulanda Karibense). 

10. Derechonan di esnan embolbí

E persona na ken e datonan personal òf e datonan polisial ta referí nos ta yama e persona embolbí. Esun embolbí tin algun derecho, manera e derecho riba:

• konsulta

• rektifikashon

• eliminashon/destrukshon di dato

• limitashon di prosesamentu di dato

• opheshon/apelashon

Bo ke hasi uso di un di e derechonan menshoná aki riba? E ora ei, entregá un petishon por eskrito na KPCN. Pèrkurá pa manda un kopia di un tarheta di identifikashon bálido huntu ku esaki pa verifikashon di bo identidat. 

11. Supervishon

11.a. Funshonario di privasidat (PF)

Polis tin un funshonario di privasidat (PF). E persona aki ta duna konseho, pero tambe ta enkargá ku supervishon interno di aplikashon i kumplimentu ku legislashon di privasidat.  

11.b. Komishon protekshon dato personal BES

E Commissie bescherming persoonsgegevens BES (Cbp BES, Komishon protekshon di dato personal BES) ta e supervisor di Hulanda Karibense enkargá ku supervishon di aplikashon di e legislashon di  privasidat. Persona ku keho tokante uso di dato personal òf polisial dor di KPCN por akudí na Cbp BES.

Komishon protekshon di dato personal BES

Kaya Industria 15E
Tel: 0599 – 7159114

12. Uso di dato personal riba e wepsait di polis

Den e formularionan riba Politie.nl semper ta pidi nòmber, adrès, kódigo postal, lugá di biba, telefòn i adrès di meil. Tur felt ta opshonal, pues no ta obligatorio pa yena bo datonan personal. Pa e adrès di meil a hasi un eksepshon. Pa por sirbi bo mas mihó posibel, polis ke tin e posibilidat pa tuma kontakto ku bo. Por ehèmpel pa por hasi bo un pregunta, i klaro pa por kontestá ora bo mes a hasi un pregunta.

Bo internetprovider outomátikamente ta manda un parti di bo adrès IP huntu ku e formulario ku bo ta manda via Politie.nl. Si bo ke kompartí informashon ku polis di forma anónimo, bo por tuma kontakto ku e liña di tep anónimo  9310.

Pa midi statistik di web, polis ta kompilá dato anónimo tokante uso di e wepsait aki. Análisis di e datonan kompilá ta hasié posibel pa drecha e wepsait, di moda ku e bishitante por haña e informashon deseá mas fásilmente posibel. Ademas, polis por optimalisá su servisio mas aleu dor di e statistiknan di web. Lo no usa e datonan kompilá pa un otro propósito, ni pone nan na disposishon di terser persona.

Ta trata di e siguiente datonan: bo adrès IP, adrès di bo internetprovider, e browser ku bo ta usa (manera Chrome, Firefox, Internet Explorer òf Safari), e ora i e durashon di bo bishita, i kua ta e páginanan ku bo a bishitá. Tambe nan ta hasi uso di cookies.

13. Privasidat i solisitut

Via e wepsait aki bo por solisitá riba vakatura serka polis. Bo ke lesa mas tokante privasidat i solisitut? E ora ei klek aki.

A publiká e deklarashon di privasidat aki riba  @@  Nos por adaptá e deklarashon di privasidat aki. P’esei wak riba e wepsait aki regularmente pa e último vershon.