Kandela den kas
Den oranan di mainta di djaluna 2 di yüni, alrededor di 7.40 or, ‘meldkamer’ sentral a risibí notifikashon tokante kandela den un kas na Ser’i sùit. Na yegada di brantwer i polis a resultá ku e habitante huntu ku bisiñanan mes a logra paga e kandela. Un èrko den un kamber a pega kandela probablemente pa motibu di korto sirkuito. E èrko a kima kompletamente. Kuerpo di bombero a kontrolá si e kandela a paga kompletamente. Empleadonan di WEB N.V. tambe a akudí na e sitio. Personal di ambulans a hasi un chekeo médiko ku habitante di e kas pa motibu ku el a inhalá huma. No tabatin herido.
Detenshonnan pa manehá bou di influensia
Den wikènt tras di lomba, a detené un total di 3 shofùr pa manehá bou di influensia di alkohòl. Dos di e tres nan a hasi un tèst di supla, ku resultado positivo dor di kua a detené nan i a hiba nan warda di polis pa un análisis di rosea. E otro shofùr no kier a koperá ku e proseso i a detené mesora.
A detené un hòmber di inisial M.A.M.J. di 49 aña di edat pa manehá bou di influensia di alkohòl despues ku a par'é pa un kòntròl rutinario. A konsekuensia di esaki a konfiská su reibeweis.
Un hòmber di inisial P.K. di 32 aña di edat a haña un prohibishon pa manehá di 6 ora. E sospechoso tabata kore den un vehíkulo sin lus di patras i a par’é pa un kòntròl. Aki a resultá ku e tabata bou di influensia di alkohòl.
A detené un hòmber di inisial D.L.B.P. di 44 aña di edat despues ku e el a dal ku su vehíkulo den un otro outo riba Kaya Nikiboko Sùit. A detené e sospechoso anteriormente e aña aki pa manehá bou di influensia di alkohòl despues di kua a konfiská su reibeweis. Algun dia pasá e por a haña su reibeweis bèk, pero a konfiská esaki atrobe.
Aksidente ku herido
Djadumingu 1 di yüni, alrededor di 7 or di anochi, ‘meldkamer’ sentral a risibí notifikashon tokante un aksidente riba Kaya IR. Randolph Statius Van Eps den kua un ‘quad/raptor’ tabata enbolbí i ku e shofùr a resultá heridá. Na yegada di ambulans i polis, a topa ku e víktima heridá riba kaya. No a topa ku e vehíkulo i esnan ku tabata einan no kier a deklará nada. Ambulans a transportá e víktima pa hòspital pa tratamentu médiko.
Kiebro na skol
Djadumingu 1 di yüni a drenta keho di kiebro na un skol situá na Kaya Frater Odulfinus. Deskonosínan a haña akseso na e edifisio i a bai ku un kaha fuerte ku un kantidat di plaka kèsh komo kontenido. Ta investigando e kaso.
A topa ku vehíkulo hòrtá
Djadumingu 1 di yüni a drenta keho di ladronisia di un Toyota Vitz koló shinishi skur ku plachi di number B-4180. Entre 11 or di anochi, djasabra 31 di mei i 7 or di mainta, djadumingu 1 di yüni, deskonosínan a bai ku e outo. Mas lat riba e mesun dia, polis a topa ku e outo na Kaya Veronica. A entregá keho di ladronisia i ta investigando e kaso.
Aksidente
Djadumingu 1 di yüni, alrededor di 5 or di mardugá, ‘meldkamer’ sentral a risibí notifikashon tokante un aksidente na e krusada di Kaya Papa Cornes i Hanchi Amboina. Un vehíkulo ku tabata kore riba Hanchi Amboina, a dal den un outo, seguidamente sigui kore dal den un kurá di kas i dal den dos otro outo ku tabata stashoná riba e tereno. A transportá e shofùr pa hòspital pa tratamentu médiko i pa motibunan médiko no por a hasi un tèst di supla kuné. Su reibeweis i dokumentonan di seguro tabata na òrdu. E outonan enbolbí a haña basta daño material.
Detenshon pa maltrato
Djasabra 31 di mei, alrededor di 4.25 or di mardugá, a detené un hòmber di inisial B.A.G.A. di 30 aña di edat na Kaya C.E.B. Hellmund pa maltrato. E detenshon a tuma lugá despues ku ‘meldkamer’ sentral a risibí notifikashon tokante un bringamentu entre un grupo di persona na e kaya menshoná. Na yegada di polis, un dama a deklará ku durante bringamentu ku otro muhénan, e hòmber a dal e. Mesora a detené e sospechoso pa maltrato.
Aksidente
Djasabra 31 di mei, alrededor di 3.10 or di mardugá, ‘meldkamer’ sentral a risibí notifikashon tokante un aksidente riba Kaya Nikiboko Nort na altura di Hanchi Amboina. Na yegada di polis a resultá ku un outo ku tabata kore riba Hanchi Amboina, no por a para na e krusada i sigui kore drenta mondi. Pa e motibu aki e outo a resultá riba su banda drechi. Ku yudansa di personanan presente i polis, a logra saka e shofùr for di e outo, pa asina e por a haña tratamentu médiko serka personal di ambulans i pa despues transport’é pa hòspital.
Bo a mira algu sospechoso? Yama 717 8000 òf e liña di tep anónimo 9310.