Entrada hudisial i detenshon pa violashon di Lei di Arma di Kandela
Den oranan di anochi di djaweps 19 di yüni, reshèrshinan di Kuerpo Polisial Hulanda Karibense, huntu ku e Grupo di Tarea Spesial (Groep Bijzondere Opdrachten, GBO), a tene un entrada hudisial den un kas den bario Mexico. E entrada hudisial ta den kuadro di un investigashon andando relashoná ku violashon di e Lei di Arma di Kandela BES.
En konekshon ku e investigashon aki, riba djabièrnè 20 di yüni, alrededor di 9 or di mainta, a detené un mucha hòmber di inisial G.R.J.C. di 16 aña di edat na un instituto na Bulevar Gobernador Nicolaas Debrot. Investigashon den e kaso aki ta kontinuá.
Detenshonnan den investigashon di tiroteo
Djaweps 19 di yüni, alrededor di 5.30 or di atardi, a detené un hòmber di inisial H.M.N. di 21 aña di edat na aeropuerto riba Kaya Internashonal. E detenshon ta en konekshon ku e investigashon di e kaso di tiroteo ku a tuma lugá den oranan di mardugá di djadumingu 8 di yüni.
Den oranan di mainta di djárason 18 di yüni, a detené un hòmber di inisial G.R.O. di 19 aña di edat pa violashon di Lei di Arma di kandela BES. E detenshon a tuma lugá na warda di polis. En konekshon ku e detenshon aki a tene entrada hudisial na un kas na Kaya Tonkawa i na Kaya Shawnee.
Djamars 17 di yüni, alrededor di 4 or di atardi, a detené un mucha hòmber di inisial J.J.W. di 15 aña di edat pa violashon di Lei di Arma di Kandela BES. E detenshon a tuma lugá na un kas na Kaya Caribe Despues di e detenshon, a tene un entrada hudisial na e mesun kas.
A konfiská artíkulonan relevante pa e investigashon.
E detenshonnan ta en konekshon ku e investigashon di e kaso di tiroteo di djadumingu 8 di yüni na Kaya Prinsès Marie. Investigashon den e kaso ta kontinuá.
Ladronisia di pikòp
Djárason 18 di yüni a drenta keho di ladronisia di un pikòp koló blanku di e marka Nissan, ku plachi di number V-6604. E vehíkulo, tin un baki di palu i tabata stashoná dilanti di un kas na Kaya Breda i deskonosínan a bai kuné. Ta investigando e kaso.
Mondi na kandela
Djárason 18 di yüni, alrededor di 2.30 or di atardi, ‘meldkamer’ sentral a risibí notifikashon tokante un mondi na kandela na altura di Kaya Dradu i Kaminda Djabou. Kasnan den serkania di e kandela tabata kore peliger. Na yegada di e patruya, a resultá ku e mondi ku tabatin entre otro partinan di baiskel i otro artíkulonan, tabata na kandela. E kandela tabata banda di un kas i tabata menasá di ekspandé. Kuerpo di Bombero a paga e kandela. No tabatin herido.
Kiebro den kas
Djárason 18 di yüni a drenta keho di kiebro den un kas na Kaya Sabana. Deskonosínan a haña akseso via un porta i a bai ku entre otro un telefòn selular di e marka Samsung i un baiskel ‘mountainbike’ koló pretu di e marka Storck, modèl Adrenaline. Ta investigando e kaso.
Djárason 18 di yüni a drenta keho di kiebro den un kas na Kaya Krabè. Deskonosínan a haña akseso via un bentana, a listra e kas kompletu i a bai ku entre otro un telefòn selular di e marka Samsung Galaxy. Ta investigando e kaso.
Detenshon pa manehá bou di influensia di alkohòl
Den e ultimo dianan a detené dos shofùr pa manehá bou di influensia di alkohòl. A hasi un tèst di supla ku ámbos shofùr un resultado positivo, di kua a detené nan i a hiba nan warda di polis pa un análisis di rosea.
A detené un hòmber di inisial S.Q.L di 25 aña di edat na Kaya Korona, despues ku e tabata kore zeilu ku su skuter riba kaya. Polis mesora a dun’é òrdu pa para. Durante kòntròl a resultá ku e tabata bou di influensia di alkohòl. A konfiská su reibeweis.
A detené un hòmber di inisial D.K di 49 aña di edat na Kaya Korona, despues ku e tabata kore zeilu i sin lus di patras ku ta funshoná. A konfiská su reibeweis.
Ladronisia for di vehíkulo
Djamars 17 di yüni a drenta keho di ladronisia for di un vehíkulo ku tabata stashoná na altura di e sitio di sambuyá ‘Alice in Wonderland’, situá na E.E.G. Bulevar. Deskonosínan a bai ku un tas di lomba koló shinishi skur ku kontenido, bou di kua un iPhone 14 koló pretu. Ta investigando e kaso.
Djaluna 16 di yüni a drenta keho di ladronisia for di un vehíkulo ku tabata stashoná na altura di e bich ‘Sweet Dreams’, situá na E.E.G. Bulevar. Deskonosínan a bai ku vários pertenensia personal, bou di kua un oloshi di e marka Armani i un Apple AirPods. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.