Insidente
Djárason 2 di yüli, alrededor di 1.15 or di mardugá, ‘meldkamer’ sentral a risibí notifikashon tokante un insidente riba Bulevar Julio A. Abraham. Na e sitio a resultá ku un persona a kai for di un ‘golf cart’ i a resultá heridá. Ambulans a transportá e víktima pa hòspital pa tratamentu médiko.
Detenshonnan pa manehá bou di influensia di alkohòl
Den e último dianan a detené nuebe(9) shofùr pa manehá bou di influensia di alkohòl. A hasi un tèst di supla ku tur shofùr ku resultado positivo, despues di kua a detené nan i a hiba nan warda di polis pa un análisis di rosea.
A detené un hòmber di inisial F.A.P. di 45 aña di edat riba Kaya Internashonal. E sospechoso tabata kore sin hèlm bistí riba un skuter i a par’é pa un kòntròl. El a haña un prohibishon di manehá pa 3 ora.
A detené un dama di inisial Q.M.d.P. di 45 aña di edat den Bario Manparia Kutu. E sospechoso tabata enbolbí den un aksidente di kua el a dal den un otro outo. El a haña un prohibishon di manehá pa 3 ora.
A detené un hòmber di inisial W.E.B.P. di 48 aña di edat na Hanchi Amboina. E sospechoso tabata enbolbí den un aksidente entre dos outo, despues di kua el a sigui kore. A top’é na e kaya menshoná i a detené pa manehá bou di influensia di alkohòl. A konfiská su reibeweis.
A detené un hòmber di inisial G.O.A. di 51 aña di edat na Kaya Mandolin. E shofùr tabata manehá di forma peligroso i p’esei a par’é. For di kòntròl mas aleu a resultá ku e tabata bou di influensia di alkohòl. Ademas a dun’é un but tambe pa manehá sin reibeweis.
A detené un hòmber di inisial R.R.J. di 31 aña di edat i un hòmber di inisial L.M.A.J. di 57 aña di edat na Kaminda Djabou. A detené ámbos pa manehá bou di influensia di alkohòl despues ku nan tabata enbolbí den un aksidente. E sospechoso di inisial L.M.A.J. a haña un prohibishon pa manehá di 3 ora. E sospechoso di inisial R.R.J. no tabatin reibeweis i a haña un but pa esaki.
A detené un hòmber di inisial R.L.O. di 67 aña di edat na Kaya Neerlandia. E sospechoso a kore dal ku su vehíkulo den un muraya riba e kaya menshoná. For di kòntròl mas aleu a resultá ku e tabata bou di influensia di alkohòl. A konfiská su reibeweis.
A detené un hòmber di inisial J.L.P.B. di 50 aña di edat na Kaya Korona. Un patruya a duna e vehíkulo ku e tabata manehá señal pa para pa motibu ku e tabatin solamente un lus di dilanti ku ta funshoná. E sospechoso no a kumpli ku e òrdu di polis i a sigui kore. Na altura di e krusada ku Kaya Neerlandia, e patruya a para e vehíkulo. E sospechoso a nenga baha for di e outo, di kua e agentenan mester a intervení físikamente pa detené e shofùr. Despues di investigashon mas aleu a resultá ku e tabata kore outo sin reibeweis i sin seguro. Ademas e tabata bou di influensia di alkohòl. A detené e sospechoso i a konfiská e vehíkulo.
A detené un hòmber di inisial H.K di 32 aña di edat na Kaya Nikiboko Sùit, despues ku a par’é pa un kòntròl rutinario. El a haña un but pa no bisti faha di seguridat i pa manehá sin seguro. Durante kòntròl a resultá ku e tabata bou di influensia di alkohòl. A konfiská su reibeweis.
Outo ta bòltu
Djamars 1 di yüli, alrededor di 5.40 or di atardi, ‘meldkamer’ sentral a risibí notifikashon tokante un aksidente riba e kaminda pa bai Rincon na altura di Sabana Piedra Krus. Un outo a bòltu. Personal di ambulans a duna e shofùr tratamentu médiko na e sitio mes. Ademas el a haña un but pa manehá sin reibeweis. Konforme e maneho ‘botsen is blazen’ a hasi un tèst di supla ku e shofùr, ku resultado negativo.
Kiebro den negoshi
Djamars 1 di yüli a drenta keho di kiebro den un establesimentu di hóreka na Kaya Avelino J. (Abechi) Cecilia. Deskonosínan a haña akseso na e edifisio via un porta i a bai ku kaha di laiter, pakete di sigaria (Marlboro i Chesterfield), karchinan di telefòn i sèn kèsh. Ta investigando e kaso.
Detenshonnan pa violashon Lei di Arma di Kandela
En konekshon ku un investigashon andando relashoná ku violashon di Lei di Arma di Kandela BES, e Grupo di Tarea Spesial (GBO) a hasi dos detenshon den oranan di anochi di djaluna 30 di yüni.
Ta trata di un hòmber di inisial G.G.G.P. di 22 aña di edat pa violashon di Lei di Arma di Kandela BES i menasa, i un hòmber di inisial R.N.C. di 24 aña edat, pa violashon di Lei di Arma di Kandela BES. Ambos detenshon a tuma lugá na un negoshi situá na E.E.G. Bulevar.
Relashoná ku e detenshonnan aki, dos entrada hudisial a tene dos entrada hudisial na kasnan situá na Kaya Manuwa i Kaya Pos di Frances. A konfiská algun artíkulo relevante pa e investigashon.
Investigashon den e kaso ta kontinuá.
A topa kurpa sin bida
Djaluna 30 di yüni, alrededor di 11 or di mainta, ‘meldkamer’ sentral a risibí notifikashon ku a topa ku un persona ku no tabata duna señal di bida den un kas situá na Kaya Jolanda. Durante investigashon preliminar na e sitio no a konstatá indikashon ku ta trata di un krímen òf ku tabata tin señal di uzo di violensia. Dòkter ku a bin na e sitio a konstatá morto di e hòmber di inisial G.R.E.M. di 48 aña di edat, nasé riba 17 di ougùstùs 1976 na Boneiru.
Detenshon pa maltrato
Djadumingu 29 di yüni, alrededor di 7 or di anochi, a detené un hòmber di inisial C.E.J.A. di 44 aña di edat na Bulevar Miguel Pourier pa maltrato. Ta investigando e kaso.
Akshon di listramentu preventivo
Den kuadro di listramentu preventivo, Kuerpo Polisial Hulanda Karibense(KPCN) den kolaborashon ku Koninklijke Marechaussee(Kmar) a tene kòntròl den oranan di anochi di djabièrnè 27 di yüni. Esaki a tuma lugá na vários sitio i establesimentu di hóreka. Durante e akshon aki, a kontrolá tantu persona komo vehíkulo. A bishitá un total di diesdos (12) establesimentu di hóreka i a listra un grupo di persona den bisindario di Kaya Grandi, Kaya Kòrsou i Kaya Boneiru.
Durante di e akshon a konfiská entre otro supstansianan probablemente narkótiko, artíkulo ku ta usa pa prepará droga pa benta, machete, bate di beisbòl i kuchú.
Alrededor di 11.30 or di anochi, a detené un hòmber di inisial J.N.S.J. di 23 aña di edat den bisindario di Kaya Kòrsou pa violashon di Lei di Opio BES.
Den oranan di anochi riba djasabra 28 di yüni tambe a tene kòntròlnan na diferente sitio bou di kua kuater (4) establesimentu di hóreka. A konfiská un kantidat chikitu di supstansianan probablemente narkótiko, artíkulo ku ta usa pa prepará droga pa benta, un skèr i un kuchú.
Listramentu preventivo
Fiskal mayó ta outorisá kuerpo polisial pa listramentu preventivo. Esaki ta nifiká ku por listra tur hende den sierto áreanan di riesgo di seguridat designá sin ku ta nesesario ku tin sospecho òf indikashon pa hasi esei.
Polis ta konta ku bo(so) koperashon. Esun ku nenga di koperá ku listramentu preventivo ta kore riesgo di detenshon.
Listramentu preventivo ta keda un instrumento den e lucha kontra poseshon di arma i otro echonan kastigabel.
Kòntròl di tráfiko
Den oranan di anochi di djasabra 28 di yüni, a tene kòntròl di tráfiko na Kaya Korona en konekshon ku seguridat den tráfiko. Durante di e kòntròl a kontrolá un total di diestres(13) vehíkulo di kua a duna dos(2) but. Unu pa manehá sin reibeweis i unu pa manehá sin seguro bálido.
KPCN ta rekordá un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Di e forma aki bo tambe ta kontribuí na un tráfiko seif riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Detenshon pa violashon Lei di Arma di Kandela
En konekshon ku un investigashon andando, riba djabièrnè 27 di yüni a detené un mucha hòmber di inisial R.R.M.P. di 14 aña di edat na warda di polis pa violashon di Lei di Arma di kandela- i pa violashon di Lei di Arma BES. Ta investigando e kaso.
Imágen: © KPCN
Aksidente entre outo i skuter
Djabièrnè 27 di yüni, alrededor di 10.30 or di mainta, ‘meldkamer’ sentral a risibí notifikashon tokante un aksidente entre un skuter i un outo na altura di e rotònde riba Kaya Internashonal. Personal di ambulans a duna e shofùr di e skuter tratamentu médiko na e sitio. Konforme e maneho di 'botsen is blazen', a hasi un tèst di supla ku ámbos shofùr, i e resultado tabata negativo. Polis a dirigí tráfiko temporalmente te ora ku e servisionan konserní a terminá ku nan trabou. Dokumentonan di ámbos shofùr tabata na òrdu.
Detenshon pa violashon Lei di Arma di Kandela
Djabièrnè 27 di yüni, alrededor di 10 or di mainta, a detené un hòmber di inisial U.S.S. di 30 aña di edat na Kaya C.E.B. Hellmund. E detenshon a tuma lugá den kuadro di e investigashon di e tiroteo ku a tuma lugá den oranan di mardugá di djadumingu 8 di yüni.
Investigashon den e kaso ta kontinuá.
Kòntròl di velosidat
Den oranan di mainta di djabièrnè 27 di yüni, Kuerpo Polisial Hulanda Karibense (KPCN) a tene un kòntròl di tráfiko dirigí un bes mas riba velosidat di vehíkulonan. E kòntròl a tuma lugá riba Bulevar Gobernador Nicolaas Debrot. A midi velosidat di e vehíkulonan ku tabata aserkando ku un mididó spesial di velosidat (lasergun).
Riba Bulevar Gobernador Nicolaas Debrot e velosidat máksimo ku ta permití ta 40 km pa ora. Durante e kòntròl a midi velosidat di un total di 35 vehíkulo i a duna 8 but pa surpasá e velosidat máksimo di 40 km pa ora ku ta permití den área urbanisá (bebouwde kom). E velosidat ku a midi tabata entre 50 pa 65 km pa ora.
KPCN lo kontinuá ku e tipo di kòntròl dirigí riba velosidat aki den e próksimo dianan na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.
Atrako riba rekohedó di sèn
Djárason 25 di yüni, alrededor di 10.25 or di anochi, ‘meldkamer’ sentral a risibí notifikashon tokante un atrako armá riba un kompania di transportá sèn na un pòmp di gasolin situá na Kaya Neerlandia.
E sospechoso a menasa e rekohedó di sèn ku arma di kandela i a logra bai ku plaka kèsh. Despues e sospechoso a bandoná e sitio na pia pa despues subi un skuter huntu ku un di dos sospechoso i hui for di e sitio.
Polis ta pidi un i tur ku por a mira òf sa algu tokante e atrako armá aki pa yama 715 8000 òf e liña di tep anónimo 9310.
Investigashon den e kaso ta andando.
Vehíkulo na kandela
Djárason 25 di yüni, alrededor di 5.30 or di atardi, ‘meldkamer’ sentral a risibí notifikashon tokante un vehíkulo na kandela na Kaya Monseigneur Nieuwindt. Brantwer a bai na e sitio i a paga e kandela. A resultá ku e kandela a originá na e bateria di e outo. No tabatin herido.
Kiebro den kas
Djárason 25 di yüni a drenta keho di kiebro den un kas den bario Mexico. Deskonosínan a haña akseso via un bentana i a bai ku sèn kèsh. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.
Imágen: © KPCN