Kiebro den kas
Djaweps 3 di yüli a drenta keho di kiebro den un kas na Sabadeco Courts. Deskonosínan a bai ku entre otro un laptop Lenovo, un Macbook Pro di e marka Apple, un Apple Ipad, un armbant di Pandora, dos kámara di saka potrèt di e marka Minolta, un IPhone, un kòmpiuter di sambuyá i sèn kèsh. Ta investigando e kaso.
Detenshon pa manehá bou di influensia di alkohòl
Djaweps 3 di yüli, alrededor di 12.05 or di mèrdia, a detené un hòmber di inisial C.R.P.V. di 63 aña di edat na Kaya Dominico Herrera pa manehá bou di influensia di alkohòl. E sospechoso tabata enbolbí den un aksidente entre dos outo riba e kaya menshoná. E tabata mustra vários karakterístika di un persona ku ta bou di influensia di alkohòl i a hasi un tèst di supla kuné. For di esaki a resultá ku el a konsumí mas alkohòl ku ta permití. A detené i a hib’é warda di polis pa un análisis di rosea. A konsekuensia di e resultado di esaki a konfiská su reibeweis. E otro shofùr tabatin un resultado negativo riba e tèst di supla.
Outo ta alkansá peaton
Djárason 2 di yüli, alrededor di 7.15 or di anochi, ‘meldkamer’ sentral a risibí notifikashon tokante un aksidente riba Kaya Grandi. Un mucha a krusa kaya for di patras di un outo ku tabata stashoná. Un outo ku tabata aserkando na e momentu ei no por a brek mesora i a alkansá e mucha di kua el a kai. Despues e mucha a lanta i a kore bai na un kas. A transportá e víktima ku un vehíkulo privá pa hòspital pa kòntròl médiko.
Ladronisia na sitio di sambuyá
Djárason 2 di yüli a drenta keho di ladronisia for di un vehíkulo ku tabata stashoná na e sitio di sambuyá 'Andrea 2', na Sabadeco Courts. Deskonosínan a listra den e vehíkulo i a bai ku sèn kèsh miéntras e doñonan tabata snòrkel. E persona ku a mèldu a deklará ku el a mira un persona deskonosí na e outo, despues di kua e sospechoso a hui na pia.
Riba e mesun dia, a drenta otro keho di ladronisia na e sitio di sambuyá 'Andrea 2', na Sabadeco Courts. Miéntras e doñonan tabata snòrkel, deskonosínan a bai ku sèn kèsh for di un tas ku a keda riba bich.
Alrededor di 1 or di mèrdia, a detené un hòmber di inisial R.G.M. di 39 aña di edat na Sabadeco Keys, na altura di e sitio di sambuyá 'Andrea 1'. E sospechoso tabata kuadra ku e deskripshon duná mas trempan riba e dia pa personanan ku tabata víktima di ladronisia na sitionan di sambuyá. Tambe a konfiská algun artíkulo ku e sospechoso tabata tin kuné. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.