Kasita di piskadó na kandela
Den oranan di anochi di djadumingu 6 di yüli, ‘meldkamer’ sentral a risibí notifikashon tokante un kas na kandela na E.E.G. Bulevar. Na yegada di polis a konstatá ku un kasita di palu tabata na kandela na altura di Atlantis Beach/Kite Beach. No tabatin ningun persona den e kasita di piskadó. Kousa di e kandela no ta konosí. Debí ku no tabatin peliger pa e alrededor, brantwer a tuma e desishon pa di un manera kontrolá, laga e kandela paga.
Ladronisia for di vehíkulo na sitio di sambuyá
Djadumingu 6 di yüli a drenta keho di ladronisia for di un vehíkulo ku tabata stashoná na un sitio di sambuyá 'Weber’s Joy', situá na Kaminda Turístiko. Deskonosínan a listra e vehíkulo i a bai ku sèn kèsh i un ‘verrekijker’, miéntras e doñonan tabata sambuyá. Ta investigando e kaso.
Kasonan di tiroteo
Djadumingu 6 di yüli, alrededor di 10.20 or di mainta 'meldkamer' sentral a risibí notifikashon tokante un kaso di tiroteo na Kaya Kuarta den Nikiboko. Na yegada di polis na e sitio a tuma nota di probablemente perforashon di bala na e kas i tambe na un outo stashoná den kurá.
Miéntras polis tabata na e adrès ariba menshoná, a drenta otro notifikashon tokante un di dos kaso di tiroteo ku a tuma lugá na Kaya Baracoa den Nieuw Amsterdam. Na yegada di polis na e sitio a tuma nota di probablemente perforashon di bala na un outo den besindario. A konfiská ámbos vehíkulo i investigashon den ámbos kaso ta andando.
KPCN ta pidi kualke persona ku por a mira algu, tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.
Detenshonnan pa manehá bou di influensia di alkohòl
Den e wikènt ku a pasa, a detené total tres (3) shofùr pa manehá bou di influensia di alkohòl. Tur shofùr a hasi un tèst di supla, ku resultado positivo dor di kua a detené nan i a hiba nan warda di polis pa un análisis di rosea.
A detené un hòmber di inisial J.G.S.M. di 34 aña di edat na Kaya Nikiboko Nort. E tabata enbolbí den un aksidente entre dos vehíkulo. E sospechoso no tabatin reibeweis, e tabatin un sedulá kaduká i e no por a mustra un seguro bálido.
A detené un hòmber di inisial F.B.S. di 45 aña di edat na Bulevar Gobernador Nicolaas Debrot. E tabata enbolbí den un aksidente entre dos vehíkulo. El a haña un prohibishon di manehá pa 5 ora.
A detené un dama di inisial M.v.T. di 30 aña di edat den ‘Centrumgebied’, despues ku e tabata kore zeilu ku su vehíkulo i manehá ku un komportashon peligroso riba kaminda. Un patruya a par’é pa un kòntròl. For di esaki a resultá ku e tabata bou di influensia di alkohòl. A konfiská su reibeweis.
Kiebro den negoshi
Djadumingu 6 di yüli a drenta notifikashon di kiebro i ladronisia den un negoshi na Kaya Amsterdam. Deskonosínan a haña akseso na e edifisio via un porta di patras i a bai un seif for di un ofisina.
Djasabra 5 di yüli a drenta keho di kiebro i ladronisia na un misa na Kaya Triton. Deskonosínan a listra den e edifisio i a bai ku sèn kèsh for di un ofisina.
Djabièrnè 4 di yüli a drenta keho di kiebro i destrukshon na un snèk na Kaya Avelino J. (Abechi) Cecilia. Deskonosínan a destruí un porta i a bai ku probablemente merkansia. Banda di esaki nan a kibra bentana di un outo, probablemente pa buska kosnan di balor.
Investigashon den ámbos kaso ta andando.
Detenshon pa maltrato
Djasabra 5 di yüli, alrededor di 9.15 or di anochi, a detené un hòmber di inisial C.C.B.C. di 30 aña di edat na Kaya Salsa pa maltrato. Ta investigando e kaso.
Detenshon pa ladronisia i kiebro
Djabièrnè 4 di yüli, alrededor di 6 or di atardi, a detené un hòmber di inisial D.E.G.Q. di 26 aña di edat na Kaya Triton pa ladronisia i kiebro. Tambe a konfiská algun artíkulo ku e sospechoso tabata tin kuné. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.