Ladronisia na sitio di sambuyá i detenshon
Djadumingu 13 di yüli a drenta keho di ladronisia na e sitio di sambuyá '1000 Steps', situá na Kaminda Turístiko. Den oranan trempan di anochi, na momentu ku e doñonan a drenta laman, deskonosínan a bai ku un tas ku kontenido. Den e tas tabatin entre otro un Iphone, un pòtmòni ku sèn, un bòshi di yabi i un pasport. Testigunan a deklará di a mira un persona sospechoso a kana drenta mondi.
Alrededor di 7 or di anochi, a detené un hòmber di inisial R.G.M. di 39 aña di edat na Bulevar Gobernador Nicolaas Debrot. E sospechoso tabata kuadra ku e deskripshon duná. Tambe a konfiská algun artíkulo ku e sospechoso tabata tin kuné.
Despues di un búskeda den mondi na altura di e sitio di sambuyá menshoná, e agentenan a bin topa ku vários tas, probablemente prosedente di ladronisia. Den un di e tasnan tabatin pasport di e víktima mas trempan riba e dia. Ta investigando e kaso.
Ladronisia treiler di boto
Djabièrnè 11 di yüli a drenta keho di ladronisia di un treiler di boto koló shinishi. E treiler tabata stashoná na un slepwei riba Julio A. Abraham Bulevar. Na momentu ku e doño a yega pa buska su treiler di boto, esaki no tabata tei mas riba e tereno. Ta investigando e kaso.
Aksidente entre dos outo
Djabièrnè 11 di yüli, alrededor di 9.40 or di mainta, ‘meldkamer’ sentral a risibí notifikashon tokante un aksidente entre dos outo riba Kaya Gilberto F. (Betico) Croes, na altura di Kaya Internashonal. Dor di e impakto, un di e outonan a resultá den roi kantu di kaminda. Pa e motibu aki na promé instante e shofùr no por a sali.
Pa e motibu aki tambe a dirigí brantwer na e sitio. Sinembargo na yegada, polis a logra saka e shofùr for di e outo.
E shofùr di e otro outo tabata keha di doló a konsekuensia di e aksidente. Personal di ambulans a hasi un chekeo médiko ku ámbos shofùr na e sitio mes. A hasi un tèst di supla ku tur dos partido i dokumentunan di ámbos tabata na òrdu.
Bo a mira algu sospechoso? Yama 717 8000 òf e liña di tep anónimo 9310.