Detenshonnan pa manehá bou di influensia
Den wikènt último a detené un total di kuater(4) shofùr ku tabata manehá bou di influensia di alkohòl. A hasi un tèst di supla ku tur shofùr ku resultado positivo. Dor di esaki a detené nan i a hiba nan warda di polis pa un análisis di rosea.
A detené un hòmber di inisial H.A.I. di 34 aña di edat despues ku el a kore dal ku su outo den porta di kurá di un kas na Kaya Flamingo. A resultá ku e sospechoso no tin reibeweis.
Un hòmber di inisial R.A.M. di 70 aña di edat a haña un prohibishon pa manehá di 4 ora. E sospechoso a kore dal ku su outo den muraya na entrada di un supermerkado riba Kaya Industria. Aki a resultá ku e tabata bou di influensia di alkohòl.
A detené dos hòmber, un di inisial E.J.Y.M. di 31 aña di edat i e otro di inisial I.A.V. di 44 aña di edat riba Kaya Korona despues ku nan tabata enbolbí den un aksidente. E sospechoso di inisial E.J.Y.M. a haña un prohibishon pa manehá di 4 ora i a konfiská reibeweis di e sospechoso di inisial I.A.V.
Trùk ku ta transportá semènt a kèntel
Djabièrnè 25 di yüli, alrededor di 10.15 or di mainta, ‘meldkamer’ sentral a risibí notifikashon tokante un trùk ku a kèntel na Tras di Montaña, na altura di Subi Colombia, riba kaminda pa bai Rincon. Polis i personal di ambulans a bai na e sitio. Na yegada di polis a topa ku un trùk ku tabata transportá semènt ku no por a subi na e subida i a kuminsá kore bai patras. E shofùr a disidí pa dirigí e trùk kantu di kaminda, pero e karga a pone ku e vehíkulo a bòltu.
Polis a sera e kaya ku e aksidente a tuma lugá te ora ku a finalisá ku e trabounan. Personal di ambulans a hasi un chekeo médiko ku e shofùr i no mester a transport’é pa hòspital. E shofùr a haña atvertensia pa manehá ku reibeweis inbálido.
Kiebro na sentro pa hubentut
Djabièrnè 25 di yüli a drenta keho di kiebro na un sentro pa hubentut situá na Kaya Libertador Simon Bolivar. Deskonosínan a haña akseso na e edifisio i a bai ku un ‘tablet’, un ‘laptop’, bòternan di refresko i sèn kèsh. Ta investigando e kaso.