Outo ta dal den palu di lus
Djasabra 26 di yüli, alrededor di 10.15 or di mainta, ‘meldkamer’ sentral a risibí notifikashon tokante un aksidente riba Kaminda Gurubu, na altura di Bona Bista di kua e shofùr a resultá heridá. Pa motibunan te ainda deskonosí, shofùr di un outo a pèrdè kòntròl dor di kua el a bai dal den un palu di lus. Pa e motibu aki e palu di lus a kibra na dos i tabata menasá di kai kualke momentu riba kaminda. Konforme e maneho di ‘botsen is blazen’ a hasi un tèst di supla ku e víktima. El a supla bou di e límite di alkohòl permití pa lei na momentu ku bo ta manehá un vehíkulo.
A transportá e víktima ku ambulans pa hòspital pa tratamentu médiko. A sera e kaya di tur dos direkshon pa evitá ku tráfiko por sigui te ora ku WEB N.V a finalisá su trabounan.
Detenshon pa intento di ladronisia
Djasabra 26 di yüli, alrededor di 8 or di mainta, a detené un hòmber di inisial R.E.C. di 49 aña di edat na E.E.G. Bulevar pa intento di ladronisia. A rekonosé e sospechoso riba imágennan di kámara di seguridat miéntras e tabata purba kibra pa drenta un negoshi. Mas lat riba e mesun dia a detené. Investigashon den e kaso ta kontinuá.