Detenshon pa manehá bou di influensia di alkohòl
Djamars 5 di ougùstùs, alrededor di 12.05 or di mardugá, a detené un hòmber di inisial C.A.C.S. di 53 aña di edat na Kaya Nikiboko Nort pa manehá bou di influensia di alkohòl. E sospechoso tabata enbolbí den un aksidente entre dos outo riba Kaya Nikiboko Nort na altura di Kaya Sonmontuno. Personal di ambulans a duna tratamentu médiko na tres víktima, pero nan no mester a bai hòspital. Konforme e maneho di ‘botsen is blazen’ a hasi un tèst di supla ku ámbos shofùr for di kua a resultá ku e sospechoso a konsumí mas alkohòl ku ta permití. Ademas a duna ámbos shofùr but pa manehá sin reibeweis i sin seguro.
Aksidente Kaya Amsterdam
Djaluna 4 di ougùstùs, alrededor di 9.30 or di anochi, ‘meldkamer’ sentral a risibí notifikashon tokante un aksidente frontal entre dos outo riba Kaya Amsterdam. Pa motibunan ainda deskonosí, un di e outonan a hala riba e banda robes di kaminda di kua e vehíkulonan a dal frontal. Ámbos outo tabatin daño signifikante. A transportá tres víktima, bou di kua menornan di edat, pa hòspital pa tratamentu médiko. Konforme e maneho di ‘botsen is blazen’ a hasi un tèst di supla ku ámbos shofùr, ku resultado negativo.
Aksidente ku gòlfkar
Djaluna 4 di ougùstùs, alrededor di 6.15 or di atardi, ‘meldkamer’ sentral a risibí notifikashon tokante un aksidente riba Kaya Spelonk na Sabadeco Villas. Un gòlfkar ku dos okupante a dal den un kurá di betòn di un kas. Na momentu ku polis a yega na e sitio, a resultá ku e shofùr pa motibu deskonosí a hasi un maniobra abrupto ku e stür. Pa e motibu aki e pasahero a kai for di e gòlfkar. Ámbos no tabatin faha di seguridat bistí. Konforme e maneho di ‘botsen is blazen’ a hasi un tèst di supla ku e shofùr, ku resultado negativo. Ambulans a transportá e víktima pa hòspital pa tratamentu médiko.
Detenshon despues di ladronisia di skuter
Djaluna 4 di ougùstùs, alrededor di 12.30 or di mèrdia, a detené un hòmber di inisial J.M.A.H. di 60 aña di edat na Kaya Kachu pa enkubrimentu. E detenshon a tuma lugá despues ku a drenta notifikashon tokante ladronisia di un skuter di hür. A hòrta e skuter den oranan di mardugá dilanti di un kompleho di apartamentu na Kaya Krabè. Via di un ‘tracker’ a bin topa ku e skuter na un kas i mesora a detené e sospechoso. Investigashon den e kaso aki ta kontinuá.
Ladronisia di skuter
Djaluna 4 di ougùstùs a drenta keho di ladronisia di un skuter koló shinishi di e marka La Sauris, ku plachi di number MF-4569. E skuter tabata stashoná na lòk dilanti di un kas na Kaya Tintorero. Ta investigando e kaso.
Ladronisia di bateria
Djaluna 4 di ougùstùs a drenta keho di ladronisia riba tereno di un kompania na Kaya Tintorero. Deskonosínan a destruí e baki di bateria di un trùk i bai ku dos bateria. Ta investigando e kaso.
Aksidente ku bròmer
Djasabra 2 di ougùstùs, alrededor di 1.20 or di mardugá, ‘meldkamer’ sentral a risibí notifikashon tokante un aksidente ku un bròmer riba Bulevar Miguel Pourier i ku e víktima tabata abou riba kaya. Na yegada di polis i ambulans a topa ku e bròmer bentá kantu di kaminda. E shofùr no a kalkulá e bògt sufisiente, pa kual motibu el a pèrdè kòntròl i kai. A hasi un kòntròl médiko ku e shofùr na e sitio i despues ambulans a transport’é pa hòspital pa tratamentu médiko. Pa e motibu aki no por a hasi un tèst di supla.