Ladronisia for di outo
Djaluna 9 di ougùstùs 2025, alrededor di 11or di anochi, a drenta un keho di ladronisia for di un outo ku tabata stashoná na Julio A. Boulevard den bisindario di Plaza Resort Bonaire. For di e outo a bai ku un kartera. E kaso ta bou di investigashon.
Detenshon pa manehá bou di influensia di alkohòl
Riba djasabra 9 di ougùstùs 2025, alrededor di 9:20 or di anochi, riba Kaminda Djabou, a detené hòmber di inisial R.C.P. di 20 aña di edat pa manehá bou di influensia di alkohòl. E sospechoso a dal ku su vehíkulo kontra di un muraya. El a risibí un but pa manehá sin reibeweis i un seguro bálido. E sospechoso a haña un prohibishon pa manehá pa dos ora.
Motosaikel konfiská
Riba djadumingu 10 di ougùstùs, alrededor di 1:40 or di mèrdia, a konfiská un motosaikel na Antriol pa manehá di manera iresponsabel i pa motibu ku no a sigui òrdu di polis. Un patruya di polis a duna e shofùr di e motosaikel un señal di stòp pa un kòntròl. E shofùr a ignorá e señal i a sigui manehá di forma iresponsabel. E shofùr a para na un kas na Antriol. E shofùr a risibí un but pa e forma iresponsabel ku e tabata manehá i pa a ignorá e señal di stòp. E motosaikel a keda konfiská pa polis.
Aksidente Kaya Nikiboko Noord
Riba djadumingu 10 di ougùstùs, alrededor di 9:30 or di mainta, e shofùr di un outo a aksidentá kontra di un palu di lus na Kaya Nikiboko Noord. E shofùr a deklará ku e la trata na evitá un trùk, ku a konsekuensia e la slep i aksidentá kontra di un palu di lus. Pa motibu di e daño na e palu di lus, a sera e kaminda temporalmente pa hasi trabounan di reparashon.
Detenshon riba Kaya Korona
Riba djadumingu 10 di ougùstùs, alrededor di 7or di mainta, ‘meldkamer’ sentral a risibí notifikashon di un hòmber ku tabata maltratá un señora na Kaya Korona. Na e sitio, e patruya a bin topa ku e víktima. El a duna un deklarashon di kiko a pasa i a deskribí e sospechoso i su outo.
Despues di un búskeda kòrtiku, e patruya a bin topa ku e vehíkulo na Kaya Lisboa i a duna e shofùr un señal di stòp. E shofùr, un hòmber di inisial C.S.C.J. di 21 aña di edat a keda detené relashoná ku e kaso.
But pa infrakshon den tráfiko
Riba djadumingu 10 di ougùstùs, alrededor di 3or di atardi, un patruya a topa ku un skuter sin plachi number i a duna señal di stòp pa un kòntròl. E shofùr tampoko por a mustra un reibeweis bálido i dokumentonan di seguro. A konsekuensia e shofùr a risibí un but pa e tres infrakshonnan.
E mesun anochi, alrededor di 00:55 or di mardugá, un otro shofùr a risibí un but na Kaya Princes Marie. Polis a duna e shofùr señal di stòp un kòntròl i no por a mustra un reibeweis bálido.
Ladronisia den kas
Riba djaluna 11 di ougùstùs 2025, alrededor di 11:42 or di mainta, a drenta un keho di ladronisia den un kas na Kaminda Essequibo. Deskonosínan a fòrsa e porta i a bai ku aparatonan di kas. E kaso ta bou di investigashon.