Detenshon pa menasa i destrukshon
Riba djaluna 11 di ougùstùs, alrededor di 9:20 or di anochi, ‘meldkamer’ sentral a risibí notifikashon tokante destrukshon i menasa na un instansia di kuido na Kaya Korona. E sospechoso a destruí e outo di e persona ku a notifiká i a menas’é ku morto. E sospechoso a bandoná e sitio promé ku e patruya a yega.
E mesun anochi, e patruya a buska e sospechoso, pero sin resultado.
E siguiente dia, e sospechoso a mèldu su mes na warda di polis, kaminda a deten’é pa menasa i destrukshon. Ta trata di un hòmber di inisial W.G di 59 aña.
Aksidente na Kaya Nikiboko Sùit
Riba djaluna 11 di ougùstùs, alrededor di 9:15 or di anochi, ’meldkamer’ sentral a risibí notifikashon tokante un aksidente na Kaya Nikiboko Sùit entre un pikòp ku un garoshi i un outo. E shofùr di e outo a aksidentá den un garoshi ku un pikòp tabata transportá, ora ku e ker a dobla tras di e pikòp. Na momento di kontròl, e shofùr di e outo no por a mustra su reibeweis i dokumentonan di seguro, pa kual e a risibí un but.
Ladronisia di generator
Riba djaluna 11 di ougùstùs, alrededor di 8:40 or di anochi, polis a risibí un denunsia di ladronisia na un supermerkado na Hanchi Amboina. Deskonosínan a drenta e edifisio e anochi anterior i a bai ku un generator. Polis ta investigando e kaso.
Detenshon pa kore bou di influensia
Riba djaluna 11 di ougùstùs, alrededor di 4:40 or di atardi, ‘meldkamer’ sentral a risibí notifikashon tokante un aksidente na Kaya J.N.E. Craane, kaminda e shofùr di un outo a aksidentá den un vehíkulo stashoná. Na e sitio, e patruya a hasi un tèst di supla ku e shofùr, ku a mustra ku e sospechoso a kunsumí mas alkohòl ku ta permití. A detené un hòmber di inisial G.T.C. di 63 aña pa manehá bou di influensia.
Butnan
Riba djamars 12 di ougùstùs 2025, a duna un 2 shofùr but pa motibu ku no por a mustra un prueba di seguro.
Riba djárason 13 di ougùstùs 2025, a duna un shofùr pa manehá kore un skuter sin hèlmu.
‘Hit & Run’
Riba djárason 13 di ougùstùs, alrededor di 2:05 or di mèrdia, un 'hit-and-run' a tuma lugá na Kaya Sonmontuno. E kaso ta bou di investigashon.