Ladronisia di kònteiner di sushi
Djaweps 4 di sèptèmber a drenta keho di ladronisia di un kònteiner di sushi koló bèrdè skur. E kònteiner di sushi tabata pafó di un kurá di kas na Kaya Sirena. Ta investigando e kaso.
Ladronisia for di pakus di paña
Djaweps 4 di sèptèmber a drenta keho di ladronisia for di un pakus di paña den Kaya Grandi. Un hòmber deskonosí a bai ku vários karson di bich i bikini sin paga. Ta investigando e kaso.
Insendio
Djárason 3 di sèptèmber, alrededor di 8 or di anochi, ‘meldkamer’ sentral a risibí notifikashon tokante un grupo di hóben ku intenshonalmente a pega un mondi na kandela na Kaya Calixta. Despues e hóbennan a hui for di e sitio. Habitantenan di e kaya a paga e kandela en espera di brantwer ku tambe a presentá na e sitio.
Alrededor di 9 or di anochi, riba e mesun anochi, ‘meldkamer’ sentral a risibí notifikashon atrobe tokante un grupo di hóben ku a pega un kònteiner di sushi na un parke na Kaya Vicentius F. Gomez den Antriol na kandela. Brantwer a paga e kandela. Ta investigando e kaso.
Entrada hudisial ku detenshon
Djárason 3 di sèptèmber, alrededor di 12.40 or di mèrdia, e Grupo di Tarea Spesial (Groep Bijzondere Opdrachten, GBO) a detené un hòmber di inisial H.M.N. di 21 aña di edat pa violashon di Lei di Arma di Kandela BES. Banda di esaki, a tene un entrada hudisial den un kas na Kaya Tonkawa, di kua a konfiská algun artíkulo relevante pa e investigashon. Investigashon den e kaso ta kontinuá.
Ladronisia di baiskel eléktriko
Djárason 3 di sèptèmber a drenta keho di ladronisia di un baiskel eléktriko. Deskonosínan a bai ku un fatbike di hür durante e mardugá di djamars pa djárason. E baiskel tabata stashoná dilanti di un kas na Kaya Embira, i tabata di lòk ku un kadena. Ta trata di un fatbike koló shinishi, modelo Eb2. Ta investigando e kaso.