Pikòp a bòltu
Djasabra 6 di sèptèmber, alrededor di 8 or di anochi, ‘meldkamer’ sentral a risibí notifikashon tokante un aksidente entre un outo i un pikòp riba kaminda pa bai Rincon, na altura di Fontein. E pikòp a bòltu despues di e impakto i a resultá den e mondi. E pasaheronan a sali for di e vehíkulo riba nan propio forsa.
Na promé instante, e personanan enbolbí a bisa ku nan no tabatin mester di asistensia médiko, pero despues a yama ambulans debí na e impakto di e aksidente. A hasi un kòntròl médiko na e sitio mes i niun di e personanan no mester a bai hòspital. Konforme e maneho di ‘botsen is blazen’, a hasi un tèst di supla ku ámbos shofùr, ku resultado negativo.
Tur dos shofùr a haña atvertensia pa motibu ku nan no por a mustra dokumentonan di seguro bálido.
Detenshon di menor di edat
Djabièrnè 5 di sèptèmber, alrededor di 11.20 di mainta, ‘meldkamer’ sentral a risibí notifikashon tokante bringamentu entre grupo di studiantenan na un skol na Kaya Barakuda. Na yegada di polis, a resultá ku tabatin un konfrontashon entre dos grupo di hóben.
Durante ku polis tabata papia ku e personanan enbolbí, un di e studiantenan a resistí kontra instrukshonnan di polis. A detené e mucha hòmber. Ta trata di un mucha hòmber di inisial P.A.D.C. di 15 aña di edat. A hiba un otro studiante warda di polis, di kua den presensia di su mayor a atendé fuerte kuné riba su komportashon.