Aksidente entre skuter
Djárason 10 di sèptèmber, alrededor di 12.15 or di mèrdia, ‘meldkamer’ sentral a risibí notifikashon tokante un aksidente riba Kaya C.E.B. Hellmund, na altura di Plasa Machi Mimi. Un skuter a subi asera i a dal tras di un skutmobil ‘scootmobiel’. Despues di e impakto, e skuter a kai for di e muraya haltu den laman. Personal di ambulans a hasi un chekeo médiko ku ámbos shofùr na e mes i nan no mester a bai hòspital.
Detenshon pa menasa
Djamars 9 di sèptèmber, alrededor di 2.40 or di atardi, a detené un hòmber di inisial L.M.H. di 41 aña di edat na Kaya Benz pa menasa. Investigashon den e kaso ta kontinuá.
Ladronisia for di vehíkulonan na sitio di sambuyá
Djaluna 8 di sèptèmber a drenta keho di ladronisia for di un auto ku tabata stashoná na e sitio di sambuyá 'Weber’s Joy', situá na Kaminda Turístiko. Deskonosínan a listra e vehíkulo i a bai ku tasnan di sambuyá ku kontenido, miéntras e doñonan tabata sambuyá.
Djasabra 6 di sèptèmber a drenta keho di ladronisia for di un pikòp ku tabata stashoná na e sitio di sambuyá 'Something Special', situá na Kaya Playa Lechi. Deskonosínan a listra e vehíkulo i a bai ku un telefòn di marka Iphone, modèl 13, miéntras e doño tabata sambuyá.
Ta investigando e kasonan.
Ladronisia di skuter
Djaluna 8 di sèptèmber a drenta keho di ladronisia di un skuter koló shinishi di marka Vespa, modèl Sprint ku plachi di number MF-4198. E skuter tabata stashoná na un kompleho di apartamentu na Kaya Breda. Ta investigando e kaso.
Ladronisia for di kònteiner
Djaluna 8 di sèptèmber a drenta keho di kiebro i ladronisia for di un kònteiner riba un tereno di un kas ku ta den konstrukshon na Kaya Berilo, den Republiek. Deskonosínan a drenta e kònteiner dor di kibra e slòtnan i a bai ku un gran kantidat di hèrmènt, bou di kua kargadó, bateria, mashin di skruf, un zag di sírkulo, i un ‘breekhamer’. Ta investigando e kaso.