Ladronisia di tas
Djaweps 11 di sèptèmber a drenta keho di ladronisia di un tas di lomba ku kontenido na un supermerkado na Kaya Industria. E doño a lubidá su tas. Riba imágennan di kámara, por a mira kon un hòmber deskonosí a kue e tas i a bai kuné. Ta investigando e kaso.
A tou diferente vehíkulo
‘Meldkamer’ sentral diariamente ta risibí notifikashon tokante molèster di stashoná outo òf di vehíkulonan mal stashoná den i rònt di ‘Centrumgebied’. Den e simannan ku a pasa, atrobe a tou vários vehíkulo na diferente sitio, entre otro na Kaya Bonaire i den sentro di siudat.
E vehíkulonan aki tabata stashoná na sitionan ku no ta permití pa stashoná. Stashoná riba asera òf na sitionan ku no ta destiná pa stashoná vehíkulo ta prohibí i ta kousa molèster i situashonnan peligroso pa otro usuarionan di tráfiko. Esaki por hasié difísil òf asta imposibel pa pasada di peaton òf vehíkulo, e ta stroba bista di otro shofùrnan, òf krea otro situashonnan peligroso.
Den oranan di mainta di djaweps 12 di sèptèmber, a duna but atrobe na vários shofùr. Asta si e shofùrnan kier a kita nan vehíkulo na e momentu ei, tòg nan a haña un but. Kuater (4) shofùr a haña but i kran a tou un pikòp.
Kuerpo Polisial Hulanda Karibense (KPCN) ta atvertí ku lo tou vehíkulonan mal stashoná na sitionan ku no ta permití. Personanan ku kometé violashon por haña un but i e gastunan di tou ta bini riba kuenta di e shofùr di e vehíkulo.
Tuma bo responsabilidat komo usuario di karetera i kontribuí na un tráfiko seif.
Detenshon
Relashoná ku un investigashon andando, djaweps 10 di sèptèmber, alrededor di 1:35 or di atardi, a detené un hòmber di inisial J.J.s.J. di 25 aña di edat na Kaya Pos di Amor pa violensia públiko. Investigashon di e kaso aki ta kontinuá.
Detenshon i entrada hudisial
Djárason 10 di sèptèmber, alrededor di 4 or di atardi, e Grupo di Tarea Spesial (Groep Bijzondere Opdrachten, GBO) a detené un hòmber di inisial D.F.J.D. di 38 aña di edat na Kaya Niagara pa menasa i violashon di Lei di Arma di kandela BES. En konekshon ku e investigashon, a tene entrada hudisial na un kas na e kaya menshoná. Investigashon den e kaso ta kontinuá.
Ladronisia for di vehíkulo
Djasabra 10 di sèptèmber a drenta keho di ladronisia for di un pikòp ku tabata stashoná na Tolo, situá na Kaminda Turístiko. Deskonosínan a bai ku un hèngel di piska i un djùk for di baki di e pikòp, mientras e doñonan tabata snòrkel. Ta investigando e kaso.