Ladronisia di baiskel eléktriko
Djaweps 25 di sèptèmber a drenta keho di ladronisia di un baiskel eléktriko. Deskonosínan a bai ku un fatbike di hür koló pretu, modèl v8. E baiskel tabata stashoná na lòk, dilanti den un kurá di kas, na Kaya Oktaaf. Ta investigando e kaso.
A lokalisá turista pèrdí sano i salvo
Kuerpo Polisial Hulanda Karibense (KPCN) ta informá ku a haña e turista merikano, Jessica Collins di 47 aña di edat, sano i salvo. Ku esaki ta kanselá su búskeda.
Djaweps 25 di sèptèmber, polis por konfirmá ku Jessica Collins ta seif i bon. E departamentu di Supervishon di Estranhero (Vreemdelingentoezicht) di KPCN a bai ku señora Collins (staande gehouden) pa kòntròl debí na su estadia indokumentá riba Boneiru.
KPCN ta gradisí tur partner i siudadano ku a kontribuí na e búskeda di señora Collins.
Aksidente entre outo i skuter
Djaweps 25 di sèptèmber, alrededor di 9.35 or di anochi, un aksidente entre un outo i un skuter a tuma lugá riba Bulevar Gobernador Nicolaas Debrot. E skuter a dal patras di e outo na momentu ku esaki tabata lora. Konforme e maneho di ‘botsen is blazen’, a hasi un tèst di supla ku ámbos shofùr. E shofùr di e outo a supla negativo pero a resultá ku e koredó di skuter a konsumí mas alkohòl ku ta pèrmití na momentu ku bo ta manehá un vehíkulo. Debí na prioridat di kuido médiko, ambulans a transportá e víktima pa hòspital pa tratamentu médiko.
Djárason 24 di sèptèmber, alrededor di 4.45 or di atardi, ‘meldkamer’ sentral a risibí notifikashon tokante un aksidente entre un outo i un skuter riba Kaya Korona. Pa e motibu aki e koredó di skuter a resultá heridá, pero el a indiká di no ke asistensia médiko. Konforme e maneho di ‘botsen is blazen’, a hasi un tèst di supla ku ámbos shofùr, ku resultado negativo. Dokumentunan di ámbos vehíkulo tabata na òrdu.
Kiebro na akohida
Djaweps 25 di sèptèmber a drenta keho di kiebro na un akohida despues di skol na Kaminda Nieuw Amsterdam. Deskonosínan a haña akseso na e edifisio i seguidamente a listra den un ofisina. Nan a bai ku un telefòn selular di e marka Samsung, modèl Galaxy A14. Ta investigando e kaso.
Aksidente entre motorfits i buriku
Djárason 24 di sèptèmber, alrededor di 3 or di atardi, ‘meldkamer’ sentral a risibí notifikashon tokante un aksidente riba kaminda pa bai Rincon, na Kaminda Tras di Montaña na altura di Tanki Maraka. Un koredó di motorfits a kai i a resultá heridá. Na yegada di polis a resultá ku e motorfits a dal den un buriku. E koredó di motorfits tabata heridá na suela i ambulans a transport’é pa hòspital pa tratamentu médiko. Debí na prioridat di kuido médiko, e shofùr no por a hasi un tèst di supla. E buriku no a sobrebibí e aksidente i Selibon a bai kuné.