Detenshon pa violashon Lei di Arma di Kandela
Djaluna 29 di sèptèmber, alrededor di 11:20 or di mainta, e Grupo di Tarea Spesial (GBO) a hasi un detenshon na Kaya Neerlandia, relashoná ku e investigashon andando den e kaso di tiroteo ku a tuma lugá den mardugá di djadumingu 8 di yüni. A detené e hòmber di inisial O.O.C. di 22 aña di edat pa violashon di Lei di Arma di Kandela BES.
Relashoná ku e detenshon aki e tene un entrada hudisial den un kas na Kaya Herman J. Pop den Playa Pabou. Aki a konfiská artíkulonan relevante pa e investigashon. Investigashon den e kaso ta kontinuá.
Detenshonnan pa manehá bou di influensia di alkohòl
Den wikènt último a detené dos shofùr ku tabata manehá bou di influensia di alkohòl. A hasi un tèst di supla ku nan ku resultado positivo. Pa e motibu aki a detené nan i hiba nan warda di polis pa un análisis di rosea.
A detené un hòmber di inisial B.S.A.B. di 20 aña di edat despues ku el a dal den kurá di un kas na Kaya Silesi. A resultá ku e shofùr no tin reibeweis i el a haña but pa esaki.
A detené un hòmber di inisial J.G.S.N. di 71 aña di edat na Kaya Nikiboko Sùit despues ku el a dal den un otro vehíkulo. El a haña un prohibishon pa manehá di 3 ora.
Trùk na kandela
Djaluna 29 di sèptèmber, alrededor di 2 or di mardugá, ‘meldkamer’ sentral a risibí notifikashon tokante un trùk, ku ta uza komo skol di wentsùrf móbil, ta na kandela riba e bich di Sorobon. Na yegada di Brantwer, e kabina di e trùk tabata kompletamente na kandela. Brantwer a paga e kandela. Kousa di e kandela ainda no ta konosí.
Detenshon pa (intento di) homisidio
Djadumingu 28 di sèptèmber, alrededor di 5’or di atardi, ‘meldkamer’ sentral a risibí notifikashon tokante un outo ku a alkansá un persona riba Kaya Zircön, na Republiek. Na yegada di ambulans a kuminsá ku reanimashon i despues a transportá e víktima ku urgensia pa hòspital pa tratamentu médiko mas avansá.
Na e sitio, polis a detené e shofùr, un hòmber di inisial M.A.A.V. di 65 aña di edat pa (intento di) homisidio, maltrato severo i maltrato ku un arma. A konfiská e vehíkulo pa mas investigashon.
Den oranan di anochi riba e mesun dia, polis a risibí notifikashon tokante fayesimentu di e dama di inisial M.T.A.L.Q di 43 aña di edat, nasé riba 16 di sèptèmber 1982, na Peru.
Diferente notifikashon tokante bringamentu
Durante wikènt ku a pasa, riba djasabra, djadumingu i djaluna mardugá, polis a risibí diferente notifikashon tokante bringamentu na vários sitio. Entre otro na un bar na Kaya Bonaire, ku na yegada di polis na e sitio, a kore ku tur hende for di e sitio.
Tambe a drenta notifikashon tokante bringamentu entre un grupo di persona na un establesimentu di hóreka na Kaya Nikiboko Nort. Na yegada di polis, no tabatin ningun bringamentu mas andando, pero a topa ku rastro di sanger riba kaya.
A drenta tambe un otro notifikashon tokante bringamentu entre un grupo di persona den Centrumgebied. Na yegada di polis, a tuma nota ku tabatin un bringamentu, pero e personanan enbolbí no ke a duna ningun deklarashon.
Polis ta tuma e notifikashonnan aki na serio, ta keda vigilá esaki i lo aktua kaminda ta nesesario.
Kandela den kas
Djadumingu 28 di sèptèmber, alrededor di 4.10 or di atardi, ‘meldkamer’ sentral a risibí notifikashon tokante kandela den un kas na Kaya Mariana, di kua por a skucha eksploshon tambe. Ademas a resultá ku tabatin un persona den e kas. Na yegada di brantwer, a lanta e persona for di soño i hib’é pafó, despues di kua a paga e kandela. E persona a indiká ku e no mester di asistensia médiko. E parti di e kas ku e tabata drumi, no tabata na kandela. Kousa di e kandela no ta konosí..
Detenshon pa ladronisia
Djadumingu 28 di sèptèmber, alrededor di 12.45 or di mèrdia, a detené un dama di inisial C.S. di 26 aña di edat na warda di polis. Ta sospech’é di ladronisia di un pòtmòni ku kontenido na un supermerkado na Kaya Industria. Ta investigando e kaso.
Quad ta dal den muraya
Djasabra 27 di sèptèmber, alrededor di 2 or di atardi, un quad a dal den kurá di kas na Kaya Utrecht. E shofùr menor di edat a resultá heridá. Na yegada, polis no a topa ku niun hende. Despues a resultá ku a transportá e víktima ku un outo privá pa hòspital. Deskonosínan a bai ku e quad tambe i polis a papia serio ku e mayor di e menor di edat pa laga e mucha manehá riba kaminda públiko.
Ladronisia for di vehíkulonan
Djasabra 27 di sèptèmber, a drenta keho di ladronisia for di un outo riba un lugá di parker serka di un establesimentu di hóreka na Bulevar Gobernador N. Debrot. Deskonosínan a bai ku un telefòn mobil di marka Samsung Galaxy, modelo A53.
Riba djasabra 26 di sèptèmber, a hasi denunsia di ladronisia for di un pikòp di hür ku tabata stashoná na e sitio di sambuyá Sweet Dreams na E.E.G. Boulevard. Deskonosínan a kibra e bentana patras di e vehíkulo i a bai ku un tas di man blou i un tas di lomba pretu. Den e tas tabatin, entre otro, dos iPhone modelo 15 i 17, un linterna di sambuyá ku su kargadó, i un pòtmòni ku kontenido.
Polis ta investigá tur dos kaso.
Detenshon, konfiskashon di outo i butnan na Kaya Grandi
Wikènt último polis a tene èkstra supervishon preventivo den Kaya Grandi i besindario, dirigí riba kombatí molèster di bròmer i fivermentu. E vigilansia aki ta kontribuí na seguridat den e área i ta redusí e molèster.
Durante e supervishon, a duna vários shofùr atvertensia pa diferente violashon manera kore ku lus defekto, falta di un plachi di number dilanti, transportá mucha sin stul spesial pa mucha i pa manehá sin faha di seguridat bistí. Den algun kaso, a duna atvertensia na shofùrnan sin reibeweis i a pèrmití un shofùr ku reibeweis bálido pa sigui bai ku e vehíkulo. Tambe a papia ku hóbennan riba nan komportashon ku e-bikes, manera kore sin lus i pa kore hasi kenshi riba kaya i entre outonan.
Polis a duna total 7 but:
3x pa no tin un plachi di number dilanti;
1x pa manehá den direkshon prohibí;
1x pa manehá sin reibeweis;
1x pa no kumplí ku señal di polis pa para;
1x pa kousa peliger òf komportashon opstruktivo di manehá.
Durante e supervishon aki, un shofùr no a kumpli ku señal di polis pa para i kasi a dal un agente polisial ku su vehíkulo. Seguidamente e shofùr a hui ku velosidat haltu. Un outo ku tabata bini den direkshon kontrali mester a desviá pa evitá un aksidente.
Kòrtiku despues, polis a topa ku e vehíkulo riba un tereno na Kaya L.D. Gerharts. A detené e shofùr, un hòmber di inisial A.V.C.M. di 20 aña di edat pa no a kumplí ku señal di polis pa para i intento di maltrato severo. Ademas, e no por a identifiká su mes i a detené tambe pa violashon di e Lei di Identifikashon BES. A konfiská e outo.
A para un otro shofùr despues ku el a skuer (drift) ku su vehíkulo. Polis a atendé severo kuné tokante su komportashon di manehá imprudente i el a pidi su diskulpa. Un tèst di supla a konfirmá ku e no tabata bou di influensia di alkohòl.
Ku e akshonnan aki, a aktua kontra diferente forma di manehá peligroso i molestioso den Kaya Grandi i bisendario. Di e manera aki por a duna but pa e diferente violashon.
Kòntròl di tráfiko
Djabièrnè 26 di sèptèmber, a tene un kòntròl di tráfiko riba Bulevar Miguel A. Pourier den Rincon. A para i kontrolá diferente vehíkulo di kua a duna 3 but.
E butnan tabata pa lo siguiente:
1x pa manehá sin seguro bálido;
1x pa manehá sin reibeweis bálido;
1x pa no tin faha di seguridat bistí.
Lo tene kòntròl regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.