Huma for di vehíkulo
KRALENDIJK – Djamars 14 di òktober, alrededor di 12.30 or di mèrdia ‘meldkamer’ sentral a risibí notifikashon tokante un pikòp ku mester tabata na kandela na Bulevar Gobernador N. Debrot. Na yegada di polis i brantwer a resultá ku e vehíkulo no tabata na kandela sino ku el a ‘overheat’ ku konsekuensia ku el a kuminsá saka basta huma. A tou e pikòp bai kuné.
Detenshon den kaso di hinkamentu
Djaluna 13 di òktober, alrededor di 6.4o or di atardi a detené un dama di inisial M.M.d.l.C. di 31 aña di edat na warda di polis. E detenshon tabata den kuadro di e investigashon di e kaso di hinkamentu ku a tuma lugá den e mardugá di djaluna 6 di òktober. A detené e sospechoso en konekshon di maltrato i maltrato severo ku uzo di un arma. Investigashon den e kaso ta kontinuá.
Aksidente riba Kaminda Lagun
Djaluna 13 di òktober, alrededor di 4.10 di atardi, un aksidente a tuma lugá riba Kaminda Lagun. Un pikòp, un motosaikel i un siklista tabata enbolbí den e aksidente. Na yegada di polis a resultá ku e pikòp a lora dilanti di e motosaikel ku konsekuensia ku e shofùr di motosaikel no por a wanta brek na tempu i dal den e pikòp. Dor di esaki shofùr di e motosaikel a kai i e motosaikel a sigui slep riba kaminda bai dal den un siklista ku a konsekuensia di esaki tambe a kai. Personal di ambulans a trata e shofur di e motosaikel na e sitio mes. E siklista si ambulans a transportá pa hospital pa kòntròl médiko.
Kòntròl di velosidat
Djaluna 13 di òktober a tene dos kòntròl di tráfiko dirigí riba velosidat di vehíkulonan. E kòntròl nan a tuma lugá na Kaya Ir. Randolph Statius van Eps i na Kaminda Tras di Montaña. Ku un skòpèt di laser a midi velosidat di e outonan ku tabata aserkando.
Riba un parti di Kaya Ir. Randolph Statius van Eps e velosidat permití ta 60 km/ora. Durante di e kòntròl di velosidat a kontrolá algun vehíkulo, di kua a duna dos (2) but pa a surpasá e velosidat máksimo permití. Un di e shofùrnan no tabatin un reibeweis bálido i haña un but pa esaki tambe.
Durante di e kòntròl na Tras di Montaña a duna sinku (5) but pa a surpasá e velosidat máksimo permití di 60 km/ora. E velosidatnan ku a midi tabata varia entre 60 i 116 km/ora.