Kiebro na akomodashon turístiko
Djaweps 23 di òktober a drenta keho di kiebro na un akomodashon turístiko situá na Sabadeco Courts. Deskonosínan a haña akseso na e edifisio via bentana di kushina i a bai ku entre otro un lèptòp, karchi di banko, pòtmòni ku sèn kèsh, un oloshi, telefònnan selular i tasnan. Ta investigando e kaso.
Aksidente entre outo i skuter
Djaweps 23 di òktober, alrededor di 5.10 or di atardi, un aksidente entre un outo i un skuter a tuma lugá riba Kaya L.D. Gerharts. E shofùr di e skuter a resultá herida. Personal di ambulans a dun’é tratamentu médiko na e sitio mes i no mester a bai hòspital. Konforme e maneho di “botsen is blazen”, a hasi un tèst di supla ku ámbos shofùr, ku resultá negativo.
Djárason 22 di òktober, alrededor di 8.40 or di anochi, ‘meldkamer’ sentral a risibí notifikashon tokante un aksidente ku herido entre un outo i un skuter na e krusada di Kaya Sonmontuno i Kaya Calixta. Na yegada di polis, a topa ku e shofùr di skuter heridá na suela. For di investigashon a konstatá, ku e shofùr di e skuter tabata kore hòp riba su wil di patras i a dal den e outo na momentu ku esaki tabata lora.
Konforme e maneho di ‘botsen is blazen’, a hasi un tèst di supla ku shofùr di e outo, ku resultá negativo. Pa motibu di prioridat médiko, no a por hasi un tèst di supla ku shofùr di e skuter. Ambulans a transportá e víktima pa hòspital pa tratamentu médiko. A konfiská e outo pa investigashon di grabashon di ‘dashcam’ pa determiná eksaktamente loke a sosodé. E shofùr di e outo a haña but pa manehá sin seguro bálido.
Despues di mas investigashon, a resultá ku e víktima ta menor di edat i no tin reibeweis. E skuter tampoko no tabata sigurá. E shofùr di e skuter mas despues lo risibí but pa manehá sin reibeweis i pa no ta disponé di un seguro bálido.
Djárason 15 di òktober, alrededor di 10.15 or di mainta, un aksidente entre un outo i un skuter a tuma lugá riba Bulevar Gobernador Nicolaas Debrot. E shofùr di e skuter a resultá herida i a transport’é ku urgensia pa hòspital pa tratamentu médiko.
E skuter tabata kore na banda robes di kaminda i a dal frontal den un outo ku tabata aserkando. Konforme e maneho di ‘botsen is blazen’, a hasi un tèst di supla ku shofùr di e outo ku resultado negativo. Pa motibu di prioridat médiko, no a por hasi un tèst di supla ku shofùr di e skuter.
Detenshon pa bringamentu
Djaluna 20 di òktober, alrededor di 12.55 or di mèrdia, a detené un hòmber di inisial C.J.G.A di 21 aña di edat na Kaya Avelino J. (Abechi) Cecilia. E detenshon a tuma lugá den kuadro di un investigashon relashoná ku un bringamentu ku a tuma lugá durante e anochi di djasabra 11 di òktober den Kaya Grandi. A detené e sospechoso pa maltrato severo i intento di asesinato. E investigashon ta kontinuá.
Detenshon pa manehá bou di influensia di alkohòl
Durante e dianan ku a pasa, a detené seis(6) shofùr pa manehá bou di influensia di alkohòl. A hasi un tèst di supla ku resultá positivo. A detené tur shofùr i a hiba nan warda di polis pa un análisis di rosea.
Ta trata di un hòmber di inisial H.H.C. di 64 aña di edat ku tabata enbolbí den un aksidente entre dos outo na Hanchi Amboina. A konsekuensia di esaki mester a transportá un víktima pa hòspital pa tratamentu médiko. A konfiská reibeweis di e sospechoso.
A detené un hòmber di inisial A.A.G. di 56 aña di edat na Kaya Nikiboko Nort. El a dal den un outo ku tabata stashoná i a sigui kore. Kòrtiku despues a pon’é na altura di e insidente pa motibu ku e no tabata sa ku el a dal den un outo. A konfiská su reibeweis.
A detené un hòmber di inisial J.J.P.V di 62 aña di edat na Kaya Nikiboko Sùit. E shofùr tabata enbolbí den un aksidente ku un otro outo. Apesar di vários intento, e shofùr no por a hasi e tèst di supla ku éksito. Basá riba sufisiente indikashon ku e tabata manehá bou di influensia di alkohòl, a detené e shofùr. A konsekuensia di un análisis di rosea ku a hasi na warda di polis, a konfiská su reibeweis.
A detené un hòmber di inisial W.E.B.P. di 48 aña di edat na Kaya Nikiboko Sùit despues ku el a resultá ku su outo na e banda kontrali di kaminda i a dal den blòkinan di betòn riba asera. E shofùr a entregá un reibeweis inbálido i e no por a mustra un seguro bálido. Despues di investigashon mas aleu a resultá ku reibeweis di e sospechoso tabata registrá komo konfiská, despues ku a konfiská esaki na yüni di e aña aki. Esaki despues ku el a okashoná un aksidente bou di influensia di alkohòl i a sigui kore. A konfiská su reibeweis inbálido i e reibeweis bálido ta keda serka Ministerio Públiko.
A detené un hòmber di inisial M.A.M.J. di 50 aña di edat na Kaya Korona. E sospechoso tabata mustra komportashon peligroso di manehá i polis a par’é pa un kòntròl. Apesar di vários intento, e shofùr no por a hasi e tèst di supla i a detené bou di di sospecho di ta manehá bou di influensia di alkohòl. A transportá e sospechoso pa warda di polis. Apesar di vários intento, aki tampoko e no a logra suplá sufisiente den e aparato. Mirando e echonan ku a konstatá, e agentenan a opta pa konfiská su reibeweis.
A detené un hòmber di inisial E.J.Y.M. di 31 aña di edat na Kaya Korona despues ku polis a par’é pa un kòntròl rutinario. E shofùr a entregá un reibeweis inbálido i no por a mustra un seguro bálido. Despues di investigashon mas aleu a resultá ku anteriormente e aña aki e
sospechoso a haña but pa manehá sin reibeweis i sin seguro. Tambe a detené e shofùr anteriormente e aña aki pa manehá bou di influensia di alkohòl.
Ladronisia na bich
Djárason 22 di òktober a drenta notifikashon di ladronisia na ‘Te Amo Beach’, situá na Kaya Internashonal. Deskonosínan a bai ku diferente artíkulo miéntras e doñonan tabata landa. Ta trata di entre otro dos tas ku telefòn selular di e marka ‘iPhone’, un pòtmòni i paña komo kontenido. Despues di investigashon mas aleu, a enkontrá e artíkulonan hòrtá algun ratu despues na Kaya Sonmontuno.
Djaluna 20 di òktober a drenta keho di ladronisia na ‘Te Amo Beach’, situá na Kaya Internashonal. Deskonosínan a bai ku un tas di kompra ku tabata bou di un palu miéntras e doñonan tabata snòrkel. Den e tas tabatin entre otro un telefòn selular, un pòtmòni ku sèn kèsh, diferente karchinan, un brel i paña. Ta investigando e kaso.
Aksidente entre outo i siklista
Djárason 22 di òktober, alrededor di 12.55 or di mèrdia, ‘meldkamer’ sentral a risibí notifikashon tokante un aksidente entre un outo i un siklista na Kaminda Djabou. Na yegada di polis, e siklista tabata heridá abou na suela. Ambulans a transportá e víktima pa hòspital pa tratamentu médiko. Konforme e maneho di “botsen is blazen”, a hasi un tèst di supla ku shofùr di e outo, ku resultado negativo.
A enkontra artíkulonan probablemente prosedente di ladronisia
Djamars 21 di òktober, alrededor di 3.30 or di atardi, ‘meldkamer’ sentral a risibí notifikashon tokante un skuter sospechoso ku tabata stashoná na Kaya Tanki di Matrimonio. E skuter no tabatin plachi di number, su suich tabata kibrá, e no tabatin lus i tabata probablemente prosedente di ladronisia. Polis a konfiská e skuter pa investigashon mas aleu.
Djaluna 20 di òktober, alrededor 10.25 or di mainta, ‘meldkamer’ sentral a risibí notifikashon tokante algun parti di baiskel ‘fatbike’ i skuter ku a topa na Kaya Doce den Tera Kòrá. Na yegada di polis a topa ku diferente parti di fatbike i skuter den mondi na e kaya menshoná. A konfiská tur e partinan di vehíkulo pa mas investigashon.
Aksidente ku herido
Djamars 21 di òktober, alrededor di 10.30 or di mainta, ‘meldkamer’ sentral a risibí notifikashon tokante un aksidente ku herido den bisindario di Boka Spelònk, na altura di e faro. Un kuad (quad) a bòltu di kua dos okupante a resultá seriamente heridá. Debí ku e kaminda tabata den mal kondishon pa kore, a pidi e helikòpter di Wardakosta pa bin Boneiru pa transportá e víktimanan. Sinembargo, e tabata okupá n'e momentu ei ku transporte di un persona ku a bira malu na Klein Kòrsou. P’esei a opta ku ambulans mes lo transportá e víktimanan. Ambulans i polis a keda pegá den lodo vários biaha durante e rekorido, lokual a pone ku a dura un tempu konsiderabel promé ku e víktimanan a yega hòspital pa tratamentu médiko.
Ladronisia for di supermerkado
Djasabra 18 di òktober a drenta keho di ladronisia for di un supermerkado situá na Kaya Pos di Pepe den Belnem. Dos hòmber deskonosí a bai ku vários bòter di alkohòl sin paga. Ta investigando e kaso.
Kòntròl di velosidat
Djasabra 18 di òktober, a tene dos kòntròl di tráfiko dirigí riba velosidat di vehíkulonan. E kòntròl a tuma lugá na Kaminda Tras di Montaña i na E.E.G. Bulevar. Polis a hasi uso di un ‘lasergun’ pa midi velosidat di outonan ku tabata aserkando.
Durante e kòntròl na Kaminda Tras di Montaña, a duna sinku(5) but pa surpasá e velosidat máksimo permití di 60 km/ora. E velosidatnan ku a midí tabata entre 60 i 127 km/ora.
Na E.E.G. Bulevar, di kua parsialmente e velosidat máksimo permití ta 40 km/ora, a duna kuater (4) but pa surpasá e límite.
Djabièrnè 17 di òktober tambe a tene un kòntròl di tráfiko dirigí riba velosidat di vehíkulonan na E.E.G. Bulevar. No a duna but pa surpasá e velosidat máksimo permití, pero sí pa tene telefòn selular den man miéntras ku ta manehá i pa manehá sin hèlm bistí.
KPCN lo sigui tene kòntròl di velosidat na vários sitio riba e isla i ta atvertí outomobilistanan pa paga tinu riba nan velosidat. Den ‘bebouwde kom’ e velosidat máksimo ta 40 km/ora i pafó di esaki e ta 60 km/ora.
Ladronisia di skuter
Den e anochi di djabièrnè 17 pa djasabra 18 di òktober, alrededor di 12.30 or di mardugá, a drenta keho di ladronisia di un skuter ku tabata stashoná dilanti di un edifisio na Kaya L.D. Gerharts. Na momentu di e keho a duna deskripshon di e skuter i polis a kuminsá mesora ku un investigashon den e área menshoná. Durante e búskeda, a bin topa ku un skuter den Centrumgebied ku tabata korespondé ku e deskripshon duná. Despues di verifikashon, a komprobá ku tabata trata di e skuter hòrtá. A duna e doño su skuter bèk.
Aksidente entre dos outo
Djabièrnè 17 di òktober, alrededor di 6 or di atardi, ‘meldkamer’ sentral a risibí notifikashon tokante un aksidente entre dos outo na E.E.G. Bulevar. Un di e shofùrnan a resultá heridá i ambulans a transport’é pa hòspital pa tratamentu médiko. Pa motibu di prioridat médiko, no a por hasi un tèst di supla. E otro shofùr a haña but pa manehá sin reibeweis i sin dokumento di seguro bálido.
Kiebro den kas
Riba djaweps 16 di òktober, polis a risibí notifikashon tokante kiebro i ladronisia den un kas na Lagun Hill. Deskonosínan a drenta den e kas entre 7.45 i 10.45 di anochi i a bai ku entre otro remedi, perfume, pòtmòni i sèn kèsh. Ta investigando e kaso.