Ladronisia di baiskel eléktriko
Djadumingu 26 di òktober, polis a haña notifikashon tokante ladronisia di un baiskel eléktriko. Deskonosínan a bai ku un ‘fatbike’ koló pretu, modèl Eb2. E baiskel tabata stashoná na un establesimentu di hóreka na Sorobon. Ta investigando e kaso.
Ladronisia for di vehíkulo na sitio di sambuyá
Djadumingu 26 di òktober a drenta keho di ladronisia for di un pikòp ku tabata stashoná na e sitio di sambuyá 'Andrea II', situá na Sabadeco Keys. Miéntras e okupantenan tabata sambuyá, deskonosínan a bai ku un kaha di ‘EHBO’ i un ‘iPhone 14 Pro’ for di e vehíkulo.
Djabièrnè 24 di òktober a drenta keho di ladronisia for di un pikòp ku tabata stashoná na e sitio di sambuyá ‘Weber’s Joy, situá na Kaminda Turístiko. Miéntras e okupantenan tabata sambuyá, deskonosínan a bai ku un tas di lomba ku kontenido for di e vehíkulo. Kòrtiku despues di un búskeda, e okupantenan a topa ku e tas den matanan riba e kaya menshoná. Tur kos tabata den e tas ainda ku eksepshon di un brel koló maron i un estuche koló bèrdè.
Ta investigando e kasonan.
Kaso di hinkamentu ku detenshon
Djadumingu 26 di òktober, alrededor di 5.25 or di atardi, ‘meldkamer’ sentral a risibí notifikashon tokante un kaso di hinkamentu na un kas na Kaya Doce. Na yegada di polis nan a topa ku un hòmber heridá. Probablemente a hink’é ku un opheto skèrpi durante un diskushon. Ambulans a transportá e hòmber pa hòspital pa tratamentu médiko.
Na e sitio a detené un dama di inisial L.W. di 45 aña di edat pa maltrato ku un arma. Sinembargo, na hòspital, e víktima a nenga ku a hink’é i no tabata ke entregá keho kontra e sospechoso. Pa e motibu aki, mas lat riba e dia, a laga e sospechoso den libertat.
Motosiklista heridá den aksidente
Djadumingu 26 di òktober, alrededor di 2.20 or di atardi, ‘meldkamer’ sentral a risibí notifikashon tokante un aksidente na Kaminda Turístiko. Aki solamente un vehíkulo tabata enbolbí, di kua un persona a kai for di un bròmer i a resultá heridá. Kousa di e aksidente ainda no ta konosí. Ambulans a transportá e víktima pa hòspital pa tratamentu médiko.
Detenshonnan pa manehá bou di influensia di alkohòl durante wikènt
Durante e wikènt di 24 di òktober, polis a detené vários shofur pa manehá bou di influensia di alkohòl. A hasi un tèst di supla ku tur shofùr ku resultado positivo. Dor di esaki a detené nan i a hiba nan warda di polis pa un análisis di rosea.
Djasabra 25 di òktober, alrededor di 10.15 or di anochi, un aksidente a tuma lugá riba Kaya Saturnus di kua un pikòp a dal den un vehíkulo stashoná. Polis tabatin indikashon ku un e shofùr tabata bou di influensia di alkohòl. E hòmber a hasi un tèst di supla ku resultado positivo. Pa e motibu aki a detené e shofùr di inisial A.D.L.D. di 54 aña di edat pa manehá bou di influensia di alkohòl i a hib’é warda di polis pa un análisis di rosea. El a haña un prohibishon pa manehá di kuater ora.
Djabièrnè 24 di òktober, alrededor di 10:50 or di anochi, ‘meldkamer’ sentral a risibí notifikashon tokante un outo ku a dal den kurá di un kas riba Kaya Nikiboko Sùit. E patruya na e sitio a laga e shofùr hasi un tèst di supla for di kua a resultá ku e tabata bou di influensia di alkohòl. A detené e hòmber di inisial I.M.B. di 46 aña di edat i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Djabièrnè 24 di òktober, alrededor di 8.40 or di anochi, un aksidente entre dos vehíkulo a tuma lugá riba rotònde Soeurnan di Rozendal. Polis tabatin indikashon ku un di e shofùrnan tabata bou di influensia di alkohòl. E hòmber di inisial B.I.C. di 69 aña di edat a hasi un tèst di supla ku resultado positivo i a detené pa manehá bou di influensia di alkohòl. A konfiská su reibeweis.
Ladronisia di plachi di number
Djasabra 25 di òktober a drenta keho di ladronisia di un plachi di number. Entre djaweps 24 di òktober i djabièrnè 25 di òktober, deskonosínan a bai ku un plachi di number for di un pikòp stashoná dilanti di un kas na Kaya Chi ku Cha. Ta trata di e plachi di number V-731.
Bo a mira algu sopechoso òf tin informashon tokante e ladronisia aki? Tuma kontakto e ora ei ku polis.
Aksidente entre outo i pikòp
Djasabra 25 di òktober, alrededor di 4.50 or di atardi, un aksidente entre un outo i un pikòp a tuma lugá riba Kaya Korona. Shofùr di e outo a resultá heridá i ambulans a transport’é pa hòspital pa tratamentu médiko.
Konforme e maneho di ‘botsen is blazen’, e shofùr di e pikòp a hasi un tèst di supla ku resultado negativo. Pa motibu di prioridat médiko, e shofùr di e outo no por a hasi tèst di supla.