Ladronisia di skuter
Djabièrnè 31 di òktober a drenta keho di ladronisia di un skuter ku tabata stashoná dilanti di un kas na Bulevar Julio A. Abraham. Ta trata di un skuter koló shinishi di e marka Kymco modèl Agility, ku plachi di number MF-1167. Ta investigando e kaso.
Detenshon
Djaweps 30 di òktober, alrededor di 2.20 or di atardi, a detené un hòmber di inisial G.G.B. di 34 aña di edat na Kaya Korona pa intenshonalmente no kumpli ku òrdu di polis.
A detené e sospechoso despues ku a mir’é riba un skuter ku plachi di number inbálido. El a kore bai i kòrtiku despues a mir’é na un establesimentu di hóreka. Ora polis a bai pa atendé kuné tokante e echo, el a mira e agentenan i a kore bai. Despues el a purba skonde tras di un kashi di koriente. Ora el a mira polis atrobe, el a bolbe purba kore bai. Aki polis a gara e hòmber lokual a pone ku el a kai for di e skuter. Seguidamente e agentenan a detené pa intenshonalmente no kumpli ku òrdu di polis. A konfiská e skuter.
E sospechoso no tabatin un prueba di identifikashon kuné i e no por a mustra ni reibeweis ni prueba di seguro. P'esaki el a haña but.
Kòntròl di velosidat
Den oranan di anochi di djárason 29 di òktober, a tene un kòntròl di tráfiko dirigí riba velosidat di vehíkulonan. E kòntròl a tuma lugá na E.E.G. Bulevar. Ku un ‘lasergun’ a midi velosidat di vehíkulonan aserkando.
Parsialmente riba E.E.G. Bulevar, e velosidat máksimo permití ta 40 km/ora. Durante di e kòntròl, a kontrolá diferente vehíkulo, di kua a duna un shofùr di un outo atvertensia pa surpasá e velosidat máksimo permití.
KPCN lo kontinuá ku e tipo di kòntròl dirigí riba velosidat na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.