Ladronisia for di outo na Toeristenweg
Djaluna, 3 di novèmber, alrededor 4.30 or di atardi, polis a risibí keho di ladronisia for di un outo na Kaminda Turístiko.
E víktima a deklará ku despues di sambuyá, el a ripara ku deskonosínan a drenta den su outo i bai ku un tas di lomba ku kontenido. Den e tas di lomba tabatin entre otro e yabi di su pikòp. Ta investigando e kaso.
Si bo a mira algu sospechoso, tuma kontakto ku polis.
Entrada hudisial na Kaya Gramel
Djárason, 4 di novèmber, alrededor di 5.30 or di mainta, polis ku asistensia di Grupo di Tarea Spesial (GBO) a tene un entrada hudisial den un kas na Kaya Gramel.
Durante e entrada, polis a bin topa ku un kantidat di supstansia probablemente narkótiko.
A detené un hòmber di inisial F.J.R. di 44 aña na e mesun sitio en konekshon ku e kaso.
Investigashon den e kaso ta kontinuá.
Dos sospechoso detené pa sospecho di ladronisia
Djárason, 4 di novèmber, alrededor di 1.15 or di mardugá, patruya di polis a bin topa ku dos hóben riba dos fatbike na Bulevar Julio A. Abraham. E hóbennan tabata bistí ku ‘hoodie’ i kapuchon, i un di nan tabata tin un mashin pa kòrta metal den su man.
E situashon a trese sospecho inmediato serka e agentenan di posibel aktividat kriminal. Polis a bira bèk pa tene un kòntròl pero e sospechosonan a hui rápidamente. Polis a kuminsá ku búskeda den e área i a bin topa e fatbikenan. A konfiská tur dos fatbike pa mas investigashon.
Algun ratu despues, polis a hasi detenshon di dos sospechoso den besindario. A detené un hóben di inisial J.C.M.M. di 17 aña di edat i un hòmber di inisial W.A.W. di 19 aña di edat pa sospecha di ladronisia.
Investigashon a mustra ku e fatbikenan riba kua e dos sospechoso tabata i ku polis a konfiská, tabata prosedente di ladronisia for di un akomodashon di turístiko na Kaya Inglatera.
Polis ta enfatisá ku akshon alerta di tantu polis komo siudadano ta di gran importansia pa prevení kriminalidat i pa por aktua rápido. Por reportá situashonnan sospechoso direktamente via 911.
Maltrato na Kaya Kobat
Djaluna, 3 di novèmber, ‘meldkamer’ sentral a risibí notifikashon tokante maltrato ku a tuma lugá djasabra promé di novèmber alrededor 7 or di anochi na Kaya Kobat.
E víktima a deklará ku tres persona a maltrat’é i ku el a sufri herida durante e insidente. Ta investigando e kaso.
Kiebro den kompania na E.E.G. Bulevar
Djárason, 5 di novèmber, alrededor di 7.40 di mainta, ‘meldkamer’ sentral a risibí notifikashon tokante kiebro den un kompania na E.E.G. Bulevar. Deskonosínan a drenta den e edifisio, pero segun informashon konosí te ku awor, no a bai ku nada.
Ta investigando e kaso.
Shofùr menor di edat enkontrá durante kòntròl na E.E.G. Bulevar
Durante anochi di djárason 5 di novèmber, alrededor 2.40 or di mardugá, polis a duna un vehíkulo òrdu pa para pa un kòntròl na E.E.G. Bulevar.
Durante e kòntròl a bin topa ku dos menor di edat: un shofùr di 16 aña i un pasahero di 14 aña.
Shofùr di e vehíkulo a risibí but pa manehá sin reibeweis bálido. A hiba tur dos menor di edat pa warda di polis, kaminda nan mayornan a rekohé nan despues.
Polis ta enfatisá ku manehá sin reibeweis no solamente ta ilegal, sino tambe ta peligroso. Polis ta pidi mayornan i kuidadónan pa keda alerta riba menor di edat.
Detenshon pa violashon di Lei di Arma di Kandela BES
Djaluna 3 novèmber, alrededor di 2.30or di atardi, a detené un hòmber di inisial C.F.F. di 19 aña di edat pa violashon di Lei di Arma di Kandela BES. E detenshon a tuma lugá na warda di polis. Investigashon ta kontinuá.