Detenshonnan pa manehá bou di influensia di alkohòl
Durante e último dianan, polis a detené dos shofùr pa manehá bou di influensia di alkohòl. A hasi un tèst di supla ku nan ku resultado positivo. Pa esaki a detené nan i hiba nan warda di polis pa un análisis di rosea.
Djabièrnè 7 di novèmber, alrededor di 3.05 or di mardugá, polis a para un outo riba Bulevar Julio A. Abraham pa kòntròl. E outo tabata kore sin ku su lusnan di patras tabata funshoná. Durante kòntròl, e shofùr por a mustra un reibeweis bálido pero no un prueba di seguro. Durante kombersashon, e agentenan a haña indikashon ku e shofùr ta bou di influensia di alkohòl. E hòmber a hasi un tèst di supla ku resultado positivo. A detené e shofùr di inisial N.T.F. di 58 aña di edat pa manehá bou di influensia di alkohòl i a hib’é warda di polis pa un análisis di rosea. El a haña un prohibishon pa manehá di 5 ora i un but pa manehá sin seguro.
Djárason 5 di novèmber, alrededor di 7.40 or di anochi, un aksidente entre dos outo a tuma lugá na Kaya Tintorero. Polis tabatin indikashon ku un di e shofùrnan no tabata den poseshon di un reibeweis. Konforme e maneho di ‘botsen is blazen’ a hasi un tèst di supla ku ámbos shofùr. E hòmber di inisial G.G.E.M. di 45 aña di edat a hasi e tèst di supla ku resultado positivo i a detené pa manehá bou di influensia. El a haña un prohibishon pa manehá di 3 ora i un but pa manehá sin reibeweis.
Sèn falsu den sirkulashon
Djaweps 6 di novèmber a drenta notifikashon na warda di polis tokante probablemente biyetenan di sèn falsu ku ta den sirkulashon. Aki a entregá un biyete di 20 dòler merikano. A konfiská e biyete di sèn pa mas investigashon.
A konfiská ‘pepperspray’ ilegal
Djárason 5 di novèmber a konfiská diferente ‘pepperspray’ ku un supermerkado na Boneiru tabata bende. Pa e motibu aki, a traha un akuerdo ku e empleado enkargá di e supermerkado pa no bestèl ni bende ‘pepperspray’ mas. For di investigashon mas aleu a resultá ku a bende kaba algun di e produktonan aki ku kliente.
Ta den poseshon di ‘pepperspray’ ta peligroso i ilegal, loke por hinka bo den situashonnan peligroso, problemanan hurídiko, un but òf te asta detenshon.
KPCN ta hasi un yama urgente na tur persona ku tin ‘pepperspray’, pa entreg’é boluntariamente na warda di di polis na Playa. Esaki por tuma lugá na kualke momentu, sin ningun konsekuensia. Personanan ku no por yega warda di polis, por tuma kontakto telefóniko pa ku polis por bini rekohé e artíkulo.
Den kaso ku topa ku ‘pepperspray’ den lugá públiko, polis ta tuma akshon mesora.
Ta pidi mayornan tambe pa papia ku nan yunan tokante e riesgonan i konsekuensianan di ta den poseshon di ‘pepperspray’.
Outo a alkansá peaton
Djárason 5 di novèmber, alrededor di 9.30 or di anochi, ‘meldkamer’ sentral a haña notifikashon tokante un aksidente riba Kaya Internashonal dilanti di aeropuerto. Ta trata di un aksidente entre un outo i un peaton ku a krusa kaya
Na yegada di polis i polis i personal di ambulans, a topa ku e víktima abou riba kaya despues di kua mesora a kuminsá dun’é tratamentu. E shofùr di e outo tabata kore direkshon sùit i no a mira e peaton na momentu ku e tabata krusa kaya.
Pa e motibu aki el a alkansá e víktima, despues di kua e víktima a kai abou. Konforme e maneho di ‘botsen is blazen’ a hasi un tèst di supla ku shofùr di e outo, ku resultado negativo. Ambulans a transportá e víktima ku urgensia pa hòspital pa tratamentu médiko.
Ladronisia di outo
Djárason 5 di novèmber a drenta keho di ladronisia di un outo koló blou/püs di e marka Hyundai Accent, modèl Hatchback ku plachi di number B-6414. Deskonosínan a bai ku e outo entre 10 or di anochi di djamars 4 di novèmber i 6 or di mainta di djárason 5 di novèmber. E outo tabata stashoná na lòk den kurá di un kas na Kaya Andres A. Emerenciana. Ta investigando e kaso.