Kandela den kas
Djadumingu 9 di novèmber, alrededor di 5.30 or di mainta, ‘meldkamer’ sentral a risibí notifikashon tokante kandela den un kas na Kaya Maria Carmen Hellmund-Boom. A resultá ku un stof tabata na kandela den un kompleho di apartamentu na e kaya menshoná. E habitante mes a logra paga e kandela pero durante e proseso aki a surgi un eksploshon di kua e habitante a kima su man. Pa e motibu aki mester a transportá e víktima pa hòspital pa tratamentu médiko. Na yegada di brantwer a inspekshoná e kas i a sera e bòternan di gas.
Menornan di edat detené ku skuter prosedente di ladronisia
Djasabra 8 di novèmber, alrededor di 6.30 or di anochi, un patruya a mira un skuter ku dos persona riba Kaya Internashonal. Pa motibu ku ámbos persona no tabatin hèlm bistí, e agentenan a duna nan señal pa para. Aki a konstatá tambe ku e skuter no tabatin plachi di number.
Despues di mas investigashon a resultá ku e skuter ta hòrtá i ku riba 31 di òktober 2025 a entregá keho di ladronisia. Pa e motibu aki a detené ámbos persona i a konfiská e skuter.
Ta trata di dos menor di edat: un mucha hòmber di inisial R.R.M.P. di 14 aña di edat i un mucha hòmber di inisial Q.J.T. di 17 aña di edat, ku a detené pa enkubrimentu i ladronisia.
Despues di mas investigashon a resultá ku e mesun hóbennan aki mas trempan a skonde un skuter riba E.E.G. Bulevar. Na momentu ku polis a deskubrí e skuter, a konstatá ku tabatin señalnan probablemente di ladronisia. A konfiská e skuter aki tambe pa mas investigashon.
Detenshon pa menasa i maltrato
Djasabra 8 di novèmber, alrededor di 3.30 or di atardi, a detené un hòmber di inisial A.J.L.A. di 37 aña di edat na Kaya Rosaura pa menasa i maltrato. Despues di mas investigashon a resultá ku e sospechoso tabata permanesé di forma ilegal riba e isla. A entreg’é na e Departamentu di Supervishon di Estranhero (Vreemdelingen Toezicht) di KPCN pendiente deportashon pa su pais di orígen.
A topa ku skuter hòrtá
Den oranan di anochi di djabièrnè 7 di novèmber, polis a risibí notifikashon tokante un skuter deskonosí ku tabata stashoná den kurá di un kas na Kaya Korona. E skuter no tabata di e habitantenan. Despues di mas investigashon a resultá ku un dia promé a entregá keho di ladronisia di e skuter aki. A konfiská e skuter pa mas investigashon.
Detenshon pa manehá bou di influensia di alkohòl
Den e wikènt ku a pasa, polis a detené un shofùr pa manehá bou di influensia di alkohòl. A hasi un tèst di supla kuné ku resultado positivo. Pa e motibu aki a detené i a hib’é warda di polis pa un análisis di rosea.
Djabièrnè 7 di novèmber, alrededor di 6.30 or di anochi, a detené un hòmber di inisial A.A.G. di 46 aña di edat na Plasa Reina Wilhelmina pa manehá bou di influensia di alkohòl. E sospechoso tabatin flèt tayer i tabata opstakulisá tráfiko. Na momentu ku polis a bai atendé kuné, a resultá ku e tabata mustra diferente karakterístika di un persona ku ta bou di influensia di alkohòl. A hasi un tèst di supla kuné ku resultado positivo di kua a detené. A konsekuensia di e resultado di e análisis di rosea, a konfiská reibeweis di e sospechoso.
Aksidente entre skuter i pikòp
Djabièrnè 7 di novèmber, alrededor di 1.25 or di atardi, un aksidente entre un skuter i un pikòp a tuma lugá na e krusada di Kaya Internashonal i Bulevar Julio A. Abraham. Na momentu ku e pikòp tabata bai lora na su man robes, e skuter a dal patras di e pikòp. Ambulans a transportá shofùr di e skuter pa hòspital pa tratamentu médiko. Konforme e maneho di ‘botsen is blazen’ a hasi un tèst di supla ku ámbos shofùr, ku resultado negativo. Dokumentunan di ámbos shofùr tabata na òrdu.
Detenshon pa violashon di Lei di Arma di Kandela
Djaweps 6 di novèmber, alrededor di 4.35 or di atardi, a detené un hòmber di inisial N.L.R.C.T. di 25 aña di edat na Kaya Industria pa violashon di Lei di Arma di Kandela BES. E detenshon a tuma lugá den kuadro di un investigashon andando. Investigashon den e kaso ta kontinuá.