Detenshonnan pa manehá bou di influensia di alkohòl
Den e dianan ku a pasa, polis a detené dos shofùr pa manehá bou di influensia di alkohòl. A hasi un tèst di supla kuné ku resultado positivo.
Djárason 12 di novèmber, alrededor di 3.30 or di mardugá, a detené un hòmber di inisial P.B. di 26 aña di edat na Kaya Linda pa manehá bou di influensia di alkohòl. A para e sospechoso pa un kòntròl rutinario, despues di kua a resultá ku e tabata manehá bou di influensia di alkohòl. A konsekuensia di e resultado di un análisis di rosea, a konfiská reibeweis di e sospechoso.
Djárason 12 di novèmber, alrededor di 3.25 or di mardugá, un patruya riba Kaya Korona a mira un skuter ku dos persona. E pasahero no tabatin hèlm bistí di kua a duna nan señal pa para. Durante kòntròl a resultá ku e shofùr tabata mustra diferente karakterístika di un persona ku ta bou di influensia di alkohòl. A hasi un tèst di supla kuné ku resultado positivo di kua a detené. A konsekuensia di e resultado di un análisis di rosea, a konfiská reibeweis di e dama di inisial F.S.W.H. di 18 aña di edat. E pasahero a haña but pa manehá sin hèlm bistí.
Kiebro na skol di buseo
Djamars 11 di novèmber a drenta keho di kiebro na un skol di buseo na E.E.G. Bulevar. Deskonosínan a drenta e edifisio dos biaha riba e mes anochi i a listra den esaki. Durante ku nan a drenta e edifisio, nan a bai ku vários artíkulo, inkluso artíkulonan di buseo. Ta investigando e kaso.
Outo ta alkansá peaton
Djamars 11 di novèmber, alrededor di 6.30 or di mainta, outo a alkansá un peaton riba Kaminda Lagun. Na yegada di polis i personal di ambulans, a topa ku e víktima heridá riba kaya despues di kua mesora a kuminsá dun’é tratamentu. Despues ambulans a transport'é pa hòspital pa tratamentu médiko. E outo tabata direkshon Lagun i a hañ’é konfrontá ku e peaton nèt despues di un bògt. Konforme e maneho di ‘botsen is blazen’ a hasi tèst di supla ku shofùr di e outo i e promilage di alkohòl a mustra ku el a konsumí alkohòl pero no mas ku lei ta permití. Ademas e shofùr di e outo no por a mustra un reibeweis i a haña but.
Kiebro na akomodashon turístiko
Djamars 11 di novèmber a drenta keho di kiebro na un akomodashon turístiko na E.E.G. Bulevar. Deskonosínan a bai ku entre otro brelnan di solo, brelnan di bista, pasportnan, sèn kèsh, artíkulonan di snòrkel, un oloshi, prendanan, paña i bukinan. Ta investigando e kaso.
Kòntròl di velosidat
Den oranan trempan di anochi di djaluna 10 di novèmber a tene un kòntròl di tráfiko dirigí riba velosidat di vehíkulonan. E kòntròl a tuma lugá na E.E.G. Bulevar. Ku un ‘lasergun’ a midi velosidat di vehíkulonan aserkando.
Parsialmente riba E.E.G. Bulevar, e velosidat máksimo permití ta 40 km/ora. Durante e kòntròl, a kontrolá vários vehíkulo, di kua a duna un but pa surpasá e velosidat máksimo permití. E velosidatnan ku a midí tabata entre 40 i 80 km/ora.
Den oranan trempan di anochi di djadumingu 9 di novèmber, tambe a tene un kòntròl di tráfiko dirigí riba velosidat di kua a kontrolá vários vehíkulo. Pero durante e kòntròl aki no a duna but.
KPCN lo kontinuá ku e tipo di kòntròl dirigí riba velosidat na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.
Ladronisia na bich
Djaluna 10 di novèmber a drenta notifikashon di ladronisia na 'Te Amo Beach', situá na Kaya Internashonal. Deskonosínan a bai ku un tas koló pretu di e marka Heuschel. Den e tas tabatin algun sèrbètè i un kamisa.
Ladronisia for di kònteiner
Djaluna 10 di novèmber a drenta keho di kiebro i ladronisia for di dos kònteiner riba tereno di un kas den konstrukshon na Kaya Palladium. Deskonosínan a haña akseso na e kònteinernan i a bai ku diferente hèrmènt, bou di kua di marka Makita i Hitachi. E artíkulonan ku a hòrta ta konsistí entre otro di un mashin di bora, un sleiptòl, un mashin di meskla i un zag. Ta investigando e kaso.