Detenshon pa manehá bou di influensia di alkohòl
Djaluna 17 di novèmber, alrededor di 3 or di mardugá, a detené un hòmber di inisial T.B.N.W. di 19 aña di edat na Kaya Internashonal. E sospechoso tabata kore zeilu ku su skuter riba kaminda di kua polis a dun’é señal pa para. Durante kòntròl a resultá ku e shofùr tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo, di kua a detené. A konsekuensia di e resultado di un análisis di rosea, a konfiská reibeweis di e sospechoso.
Aksidente entre dos outo
Djasabra 15 di novèmber, alrededor di 10.20 or di mainta, ‘meldkamer’ sentral a risibí notifikashon tokante un aksidente ku herido riba Kaya Nikiboko Sùit. Na yegada di polis a topa ku dos outo ku tabata enbolbí den e aksidente. Personal di ambulans a duna na e sitio mes tratamentu médiko na pasahero di un di e outonan enbolbí.
A resultá ku outo 1 tabata den direkshon nort riba e kaya menshoná i a dal den outo 2, ku tabata stashoná kantu di kaminda. E shofùr i pasahero di outo 2 na e momentu ei ahinda tabata den outo. E shofùr di outo 1 a indiká ku e ta bira malu regularmente ora e ta manehá i e no tabata sa eksaktamente kiko a sosodé. Despues di mas investigashon, riba òrdu di fiskal, polis a konfiská reibeweis di e sospechoso. Konforme e maneho di 'botsen is blazen', a hasi un tèst di supla ku ámbos shofùr ku resultado negativo.
Kòntròl di velosidat
Djabièrnè 14 di novèmber a tene un kòntròl di tráfiko dirigí riba velosidat di vehíkulonan. E kòntròl a tuma lugá na Kaya Amsterdam. Ku un ‘lasergun’ a midi velosidat di vehíkulonan aserkando.
Riba Kaya Amsterdam, e velosidat máksimo permití ta 40 km/ora. Durante e kòntròl, a kontrolá vários vehíkulo, di kua a duna dos but pa surpasá e velosidat máksimo permití. E velosidatnan ku a midí tabata entre 40 i 70 km/ora. Ademas, a duna un di e shofùrnan but pa no a bisti faha di seguridat i pa a kore sin seguro bálido.
KPCN lo kontinuá ku e tipo di kòntròl dirigí riba velosidat na diferente parti di nos isla i ta atvertí tur outomobilista pa paga tinu riba nan velosidat. Den área urbanisá
(bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.