Detenshon pa kiebro i ladronisia
Djaweps 20 di novèmber, alrededor di 2.50 or di atardi, a detené un hòmber di inisial D.J.S. di 33 aña di edat na warda di polis en konekshon ku un investigashon andando tokante un kaso di kiebro i ladronisia ku a tuma lugá na un negoshi di buseo riba 11 di novèmber 2025. Investigashon den e kaso ta kontinuá.
Ladronisia di baiskel
Djaweps 20 di novèmber a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl V8. E baiskel tabata stashoná na un skol situá na Kaya Frater Odulfinus.
Djamars 18 di novèmber a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu di e marka Ouxi. E baiskel tabata stashoná na lòk pegá ku entrada di un skol situá na Kaya Korona..
Ta investigando e kasonan.
Ladronisia for di vehíkulo
Djaweps 20 di novèmber a drenta keho di ladronisia for di un pikòp na Altamira Unjo den Rincon. Mientras e okupantenan a baha for di e vehíkulo i a kana bai na e miradó, deskonosínan a kue dos kòmpiuter di sambuyá for di vehíkulo. Ta trata di un kompiuter di buseo di e marka Aqualung i un kòmpiuter di buseo di e marka Scuba Pro. Ta investigando e kaso.
Kiebro den negoshi
Djárason 19 di novèmber a drenta keho di kiebro den un negoshi situá na Kaya Industria. Deskonosínan a haña akseso na e edifisio dor di fòrsa e ròldùr i seguidamente a listra e edifisio parti abou i ariba. Durante ku nan a drenta, nan a bai ku dos kaha di sèn ku kontenido. Mas aleu nan a destruí un porta di ofisina i un kashi buskando artíkulonan di balor. Ta investigando e kaso.
Aksidente ku detenshon pa manehá bou di influensia
Djamars 18 di novèmber, alrededor di 6.15 or di atardi, ‘meldkamer’ sentral a risibí notifikashon tokante un aksidente riba Kaya Korona. Na yegada di polis a resultá ku un outo a dal un persona den ròlstul ora ku e persona tabata krusa kaya.
Personal di ambulans a duna e víktima tratamentu médiko na e sitio mes i no mester a hib’é hòspital.
Konforme e maneho di 'botsen is blazen', a hasi tèst di supla ku shofùr di e outo ku resultado positivo, di kua a detené. A konsekuensia di e resultado di un análisis di rosea, e hòmber di inisial R.M.P. di 64 aña di edat a haña un prohibishon di manehá pa 4 ora.
Destrukshon na skol
Djamars 18 di novèmber, alrededor di 12 or di mèrdia, polis a risibí notifikashon tokante un kaso di destrukshon ku a tuma lugá riba tereno di un skol situá na Kaya Frater Odulfinus. Na yegada di polis a resultá ku algun studiante a sende vürwèrk den tualèt di e skol, di kua a destruí un pòchi di wc kompletamente. Na e sitio polis a konfiská tambe un vürwèrk (cake) di 16 tiru. E skol a entregá keho di destrukshon. Ta investigando e kaso.
Persona a bira malu durante ku e tabata snòrkel
Djamars 18 di novèmber, alrededor di 9:50 or di mainta, 'meldkamer' sentral a risibí notifikashon tokante un boto ku tabata aserkando kosta ku un persona ku a bira malu durante ku e tabata snòrkel i no tabata reakshoná.
Na yegada di e boto a resultá ku e víktima a guli awa di laman durante ku e tabata snòrkel. E mes a logra landa bèk bai na e boto, pero poko despues el a bira malu i no tabata reakshoná, motibu pa kua a kuminsá ku reanimashon.
Poko despues e víktima a kuminsá reakshoná. Na yegada na kosta, personal di ambulans a duna tratamentu na e víktima i a transport’é pa hòspital pa tratamentu médiko.
Eksploshon na skol di buseo
Djamars 18 di novèmber, alrededor di 8.30 or di mainta, 'meldkamer' sentral a risibí notifikashon tokante un eksploshon na un skol di buseo situá na Bulevar Julio A. Abraham. Na yegada di polis, personal di ambulans tabata duna dos víktima ku a sufri kemaduranan asistensia pa motibu di e eksploshon. A resultá ku e eksploshon a tuma lugá ora tabata yena e tankinan di oksígeno di buseo. A transportá total tres víktima pa hòspital pa tratamentu médiko. Brantwer tambe a bini na e sitio pa hasi un inspekshon mas detayá ma e skol di buseo.
A konfiská skuter
Djaluna 17 di novèmber, alrededor di 8.40 or di anochi, un patruya a señalá un skuter riba Kaya Esther. E shofùr no tabatin un hèlm bistí i e lus patras di e vehíkulo
menshoná tabata dañá. Pa e motibu aki e agentenan a disidí di duna e shofùr señal pa para pa un kòntròl.
E shofùr a neglishá e señal pa para i a hisa velosidat, di kua e patruya a sigui e skuter den vários kaya. E shofùr a kore drenta kurá di un kas na Kaya Dr. J.G. Hernandez ku su skuter.
Durante kòntròl mas aleu, e shofùr no por a mustra, ni reibeweis ni seguro bálido di e vehíkulo. E shofùr a haña but pa manehá sin reibeweis bálido, manehá sin seguro bálido, manehá sin lus patras, manehá sin hèlm bistí i pa no a kumpli ku un señal pa para. Ademas, a konfiská e skuter.