Detenshon di tres biaha pa manehá bou di influensia di alkohòl
Djabièrnè 5 di desèmber, alrededor di 2.55 or di mardugá, a detené un dama di inisial M.S.T.M. di 20 aña di edat riba Kaya Nikiboko Nort despues ku un patruya a par’é pa un kòntròl rutinario.
Durante kòntròl a resultá ku e shofùr no por a mustra un reibeweis i prueba di seguro bálido. tambe e tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo. A konsekuensia di e resultado di e tèst di supla, a detené e sospechoso.
A konfiská outo di e sospechoso tambe pa motibu ku den un periodo kòrtiku, riba 25 di novèmber i 2 di desèmber, a detené pa vários echo: manehá bou di influensia di bebida alkohóliko i surpasá e límite legal (wettelijke limiet). Pero tambe pa manehá sin reibeweis i manehá sin dokumentonan di seguro.
Aksidente entre dos vehíkulo
Djaweps 4 di desèmber, alrededor di 9.20 or di mainta, ‘meldkamer’ sentral a risibí notifikashon tokante un aksidente entre dos outo riba Kaminda Gurubu. Shofùr di outo 1 a pèrdè kòntròl den un bògt, di kua outo 1 a bai resultá riba e banda kontrali di kaminda. Outo 2 ku tabata bini di direkshon kontrali, no por a hasi nada pa evitá e aksidente i pa e motibu aki el a bai dal patras di outo 1. Dor di esaki outo 1 a resultá kasi den mondi na banda di kaminda.
Personal di ambulans a hasi un chekeo médiko ku ámbos shofùr na e sitio mes pero nan no mester a bai hòspital. Konforme e maneho di 'botsen is blazen', a hasi tèst di supla ku ámbos shofùr ku resultado negativo.