Detenshonnan pa manehá bou di influensia di alkohòl
Djasabra 6 di desèmber alrededor di 3.40 or di mardugá, un hòmber di inisial R.C.G. di 37 aña di edat a keda detené riba Kaya Nikiboko Noord despues ku un patruya a par’é pa un kòntròl pa manehá un bròmfits sin hèlm. Durante e kòntròl, a resultá ku e sospechoso tabatin su hèlm kologá na e stür di e bròmfits. E sospechoso no por a presentá un reibeweis bálido ni prueba di seguro pa e bròmfits, pa e motibu aki a duna e shofùr un but. Ademas, a atvertí e sospechoso ku e no por manehá riba karetera públiko i ku e mester kana bai kas.
Alrededor di mei ora despues, e patruya a bolbe topa ku e sospechoso riba su bròmfits. Tambe e tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo. A konsekuensia di e resultado di e tèst di supla, a detené e sospechoso. i bolbe dun’é but pa manehá sin reibeweis bálido i prueba di seguro.
Riba e mesun dia, alrededor di 2.25 di atardi, a detené un dama di inisial I.P.P. di 56 aña di edat riba Kaya Saturnus despues ku a top’e ta kore zeilu riba kaminda i e patruya a dun’e señal pa para pa un kòntròl. E tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo.
Djaluna 8 di desèmber, alrededor di 1.15 or di mardugá, un patruya a topa un shofùr ta manehá duru i ta kore zeilu riba Kaya Korona i a dun’e un señal pa para pa un kòntròl. Durante e kòntròl, e shfùr no por a mustra un reibeweis bálido ni prueba di seguro, el a haña un but pa esaki. Ademas, e tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo. A detené e hòmber di inisial W.A.R.B. di 31 aña di edat.