Detenshonnan pa manehá bou di influensia di alkohòl
Den e dianan ku a pasa, polis a detené tres shofùr pa manehá bou di influensia di alkohòl. A hasi un tèst di supla ku nan ku resultado positivo.
Djárason 10 di desèmber, alrededor di 3 or di mardugá, a detené un hòmber di inisial S.B. di 36 aña di edat na Kaminda Lagun pa manehá bou di influensia di alkohòl. A para e sospechoso pa un kòntròl rutinario despues di kua a resultá ku e tabata manehá bou di influensia di alkohòl. A konsekuensia di e resultado di un análisis di rosea, e sospechoso a haña un prohibishon di manehá pa 1 ora.
Djamars 9 di desèmber, alrededor di 2.30 or di mardugá, un patruya a mira un outo ta kore den direkshon prohibí (verboden) den centrumgebied di kua e agentenan a duna e shofùr señal pa para. Durante kòntròl a resultá ku e shofùr no por a mustra un prueba di seguro i a haña but pa esaki. Tambe e shofùr tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo di kua a detené. A konsekuensia di e resultado di un análisis di rosea, a konfiská reibeweis di e sospechoso di inisial F.v.J. di 28 aña di edat.
Djaluna 8 di desèmber, alrededor di 2.30 or di mardugá, a detené un dama di inisial N.W.M.v.L. di 19 aña di edat na Bulevar Gobernador N. Debrot despues ku un patruya a par’é pa un kòntròl rutinario. E sospechoso tabata kore riba un skuter i a pasahero no tabatin hèlm bistí. Durante e kòntròl, e shofùr tabata mustra karakterístikanan di un persona ku ta bou di influensia di alkohòl. A hasi un tèst di supla kuné ku resultado positivo. A konsekuensia di e resultado di e tèst di supla, a detené e sospechoso i a konfiská su reibeweis. E pasahero a haña but pa manehá sin hèlm bistí.
Ladronisia for di vehíkulo na sitio di sambuyá
Djaluna 8 di desèmber a drenta keho di ladronisia for di un outo ku tabata stashoná na Kaminda Turístiko. Miéntras e okupantenan tabata snòrkel, deskonosínan a bai ku sèn kèsh for di un pòtmòni ku a keda den e outo. Ta investigando e kaso.
Outo a bòltu
Djasabra 6 di desèmber, alrededor di 4 or di mardugá, ‘meldkamer’ sentral a risibí notifikashon tokante un aksidente riba Kaya Korona. Un outo a bòltu dilanti di entrada di un misa. Na yegada di polis, e shofùr ya a sali for di e vehíkulo. Dor di esaki e shofùr a resultá heridá, pero e no tabata deseá tratamentu médiko di ambulans.
Konforme e maneho di 'botsen is blazen', a hasi tèst di supla ku e shofùr ku resultado positivo. Pa e motibu aki a detené pa manehá bou di influensia di alkohòl. Despues di mas investigashon a resultá ku e sospechoso di inisial G.A.E.A. di 32 aña di edat tabata manehá miéntras ku su reibeweis ta konfiská. A konfiská su reibeweis dia 15 di ougùstùs último despues ku e tabata manehá bou di influensia di alkohòl. Banda di esaki a dun’é but pa manehá sin reibeweis.
Aksidente entre outo i skuter
Djabièrnè 5 di desèmber, alrededor di 1.30 or di atardi, ‘meldkamer’ sentral a risibí notifikashon tokante un aksidente entre un outo i un skuter riba Kaya Internashonal. Na altura di e krusada ku Kaya Maximiliana Rosario, un outo tabata stashoná pendiente pa lora na su man robes. E shofùr di e skuter a mira e outo lat i mester a brek fuerte, dor di kua el a lastra i bai dal tras di e outo. E shofùr di e skuter a resultá heridá, pero a duna di konosé ku e mes ta bai buska yudansa médiko. Konforme e maneho di 'botsen is blazen', a hasi tèst di supla ku e shofùrnan ku resultado negativo.