Aksidente entre outo i skuter
Djárason 17 di desèmber, alrededor di 11.20 or di anochi, un aksidente entre un outo i un skuter a tuma lugá na e krusada di Kaya Gilberto F. Croes i Kaya Internashonal. Personal di ambulans a duna shofùr di e skuter tratamentu médiko na e sitio mes. Konforme e maneho di 'botsen is blazen', a hasi un tèst di supla ku ámbos shofùr ku resultado negativo. E shofùr di e skuter a haña but pa manehá sin reibeweis i sin seguro.
Ladronisia di pikòp
Djárason 17 di desèmber, alrededor di 10.40 or di anochi, ‘meldkamer’ sentral a risibí notifikashon tokante ladronisia di un pikòp na un establesimentu di hóreka situá na Kaya Sonmontuno. E vehíkulo tabata stashoná ku motor sendé, mientras e doño a bai paden pa paga. Na momentu ku e doño a sali pa bai for di e sitio, a resultá ku deskonosínan a bai ku e pikòp. Mesora despues a kuminsá ku un akshon di búskeda den diferente bario. Algu despues, alrededor di 12.30 or di mardugá, polis a risibí notifikashon ku a topa ku e pikòp den Antriol. A hiba e vehíkulo warda di polis.
Detenshonnan pa manehá bou di influensia di alkohòl
Entre djabièrnè 12 di desèmber i djárason 17 di desèmber, polis a detené nuebe(9) shofùr pa manehá bou di influensia di alkohòl. A hasi un tèst di supla ku nan ku resultado positivo.
Djárason 17 di desèmber, alrededor di 3.45 or di mardugá, a detené un hòmber di inisial A.E.J.S. di 21 aña den Amboina pa manehá bou di influensia di alkohòl. Un patruya a para e sospechoso despues ku a midi su velosidat ku un lasergun riba Kaya Korona. Aki a resultá ku e tabata kore 130 km/ora, mientras ku 60 km/ora ta e velosidat máksimo permití. E patruya a bai tras di e bròmer pa par’é pa un kòntròl. E shofùr diripiente a drenta den direkshon prohibí i a lora vários biaha sin duna señal di direkshon. E bròmer no tabatin plachi di number tampoko. E patruya a logra para e bròmer den Amboina. E shofùr no tabatin reibeweis pa manehá bròmer, e no por a mustra un prueba di identifikashon i tampoko dokumentunan di seguro. Pa motibu ku e sospechoso tabata mustra karakterístikanan di un persona ku a konsumí alkohòl, a hasi un tèst di supla kuné. Aki a resultá ku el a konsumí mas alkohòl ku ta permití na momentu ku bo ta manehá un vehíkulo. A detené i a hib’é warda di polis pa un análisis di rosea. A konsekuensia di e resultado di esaki el a haña un prohibishon pa manehá di 4 ora. Tambe el a haña but pa e infrakshonnan kometé.
Djárason 17 di desèmber, alrededor di 1.30 or di mardugá, a detené un hòmber di inisial D.A.C. di 25 aña di edat na Kaya Gilberto F. Croes pa manehá bou di influensia di alkohòl. Un patruya a mira e sospechoso ta manehá ku velosidat haltu. A par’é pa un kòntròl, di kua a resultá ku e tabata manehá bou di influensia di alkohòl. A konsekuensia di e resultado di esaki el a haña un prohibishon pa manehá di 2 ora.
Djamars 16 di desèmber, alrededor di 9 or di anochi, ‘meldkamer’ sentral a risibí notifikashon tokante un aksidente riba Kaminda Lagun. Un vehíkulo a dal den kurá di un kas i seguidamente el a kore bai. E patruya ku a bai na e sitio a kuminsá ku búskeda den bisendario i a topa ku e vehíkulo na un kas. Un hòmber a sali for di e kas i a deklará ku e ta shofùr di e vehíkulo. E tabata mustra karakterístika di un persona ku ta bou di influensia di alkohòl di kua a hasi un tèst di supla kuné. E resultado tabata positivo i a detené e hòmber pa manehá bou di influensia di alkohòl. Ta trata di un hòmber di inisial J.M. di 31 aña di edat. A konsekuensia di e resultado di e análisis di rosea a konfiská reibeweis di e sospechoso.
Djaluna 15 di desèmber, alrededor di 10.45 or di anochi, ‘meldkamer’ sentral a risibí notifikashon tokante un pikòp ku a dal den kurá di un kas na Kaya Mendelssohn i seguidamente a kore bai. Doño di e kas a sali tras di e pikòp i a logra par’é riba Kaya Dr. Jose Girigorio Hernandez. Na yegada di polis, konforme e maneho di 'botsen is blazen', a hasi un tèst di supla ku e shofùr ku resultado positivo. A detené e homber di inisial D.A.C.H. di 39 aña di edat pa manehá bou di influensia di alkohòl. Despues di investigashon mas aleu a resultá ku e sospechoso no tabatin reibeweis bálido i a haña un but pa esaki.
Djaluna 15 di desèmber, alrededor di 3.50 or di mardugá, a detené un hòmber di inisial W.A.T.Q. di 55 aña di edat riba Kaya Avelino J. (Abechi) Cecilia pa manehá bou di influensia di alkohòl. E detenshon a tuma lugá despues ku el a dal ku su vehíkulo den kurá di un kas. Na yegada di e patruya, e homber ainda tabata den e outo i e agentenan a hasi un test di supla kuné. E resultado di esaki tabata positivo. A hiba e sospechoso warda di polis pa un análisis di rosea. A konsekuensia di e resultado di e análisis di rosea a konfiská reibeweis di e sospechoso.
Djaluna 15 di desèmber, alrededor di 2.05 or di mardugá, un patruya a para un skuter riba Kaya Caribe pa kòntròl, pa motibu ku e tabata kore zeilu riba kaminda. Durante di e kòntròl a hasi un tèst di supla ku e shofùr ku resultado positivo. A detené e hòmber di inisial M.A.F. di 26 aña di edat pa manehá bou di influensia di alkohòl i a konfiská su reibeweis.
Djadumingu 14 di desèmber, alrededor di 2.15 or di mardugá, a detené un hòmber di inisial E.P.M. di 36 aña di edat riba Kaya Nikiboko Sùit pa manehá bou di influensia di alkohòl. E sospechoso tabata kore huntu ku un pasahero riba e skuter i ámbos no tabatin hèlm bistí. E skuter no tabatin plachi di number tampoko, di kua e patruya a para nan pa kòntròl. Durante di e kòntròl, e shofùr no por a mustra un reibeweis bálido òf prueba di identifikashon. Ademas a resultá ku e skuter no ta segurá i a hasi un tèst di suplá ku e shofùr ku resultado positivo. Durante transporte di e sospechoso, e agentenan a mira e hòmber ku anteriormente tabata pasahero, tabata manehá e mesun skuter i atrobe sin hèlm bistí. Durante kòntròl a resultá ku e tambe tabata bou di influensia di alkohòl i a detené. A detené e hòmber di inisial A.A.J.R. di 33 aña di edat na Kaya Misoa pa manehá bou di influensia di alkohòl. A duna ámbos sospechoso but pa e infrakshonnan kometí.
Djadumingu 14 di desèmber, alrededor di 1.35 or di mardugá, polis a haña notifikashon di un aksidente den bisendario di Seru Bentana, di kua un outo a dal den un kurá. Na yegada di polis a topa ku okupantenan di e outo. E shofùr a deklará ku el a pèrdè kòntròl i pesei el a dal den e kurá. E shofùr tabata mustra karakteristiká di un persona ku ta bou di influensia di alkohòl di kua a hasi un tèst di supla kuné ku resultado positivo. A detené e hòmber di inisial R.R.A.P. di 49 aña di edat pa manehá bou di influensia di alkohòl i a konsekuensia di e resultado di un análisis di rosea, e sospechoso a haña prohibishon pa manehá di 5 ora.
Detenshon en konekshon ku atrako armá
En konekshon ku un investigashon andando relashoná ku e atrako ku a tuma lugá 6 di mei na ofisina di pòst na Playa, riba djamars 16 di desèmber, alrededor di 4.15 or di atardi, a detené un hòmber di inisial S.C.W.R. di 31 aña di edat riba Kaya Macario (Cai) Sint Jago.
Banda di esaki a tene dos entrada hudisial: na un kas den bario Mamparia Kutu i na un kompleho di apartamentu na Kaya Maximiliana Rosario. Aki a konfiská algun artíkulo relevante pa e investigashon, di kua outo di e sospechoso. Investigashon den e kaso ta kontinuá.
KPCN ta pidi kualkier persona ku por a mira algu, a tende algu òf ku tin informashon tokante e sospechoso(nan) òf e atrako na ofisina di pòst na Playa, pa tuma kontakto ku polis na 715 8000 òf via e liña di tep anónimo 9310.
Ladronisia na bich
Djamars 16 di desèmber a drenta notifikashon tokante ladronisia na Playa Pal’i Mangel (Donkey’s Beach), situá na E.E.G. Bulevar. Deskonosínan a bai ku un tas ku kontenido miéntras e doñonan tabata snòrkel. Den e tas tabatin entre otro un telefòn selular, brelnan di solo, un yabi di outo i pòtmòni ku sèn kèsh i karchinan. Despeus di investigashon mas aleu a topa algun ratu despues ku e tas hòrtá den mondi na Kaya Nieuw Amsterdam. E pertenensianan tabatei ainda den e tas pero deskonosínan a bai ku sèn kèsh.
Dùmp sushi
Djamars 16 di desèmber, alrededor di 10.15 or di mainta, un patruya a topa un persona ku un pikòp, ku tabata tira restu di sushi di kurá kantu di kaminda na Kaya Shastan. A papia severamente ku e personá riba su komportashon i a dun’é òrdu pa piki e sushi di kua mesora el a duna oido na esaki.
Benta sushi kantu di kaminda ta prohibí i ta kousa kontaminashon i situashonnan insigur. Polis ta hasi un yamada na un i tur pa deshasí di sushi na e manera korekto i na e lugánan destiná pa esei
Detenshon pa menasa
Djaluna 15 di desèmber, alrededor di 6.20 or di atardi, a detené un hòmber di inisial E.T.B. di 53 aña di edat na Kaya Kariñoso pa menasa i intento di maltrato ku un arma. Ta investigando e kaso.
Kòntròl di velosidat
Djadumingu 14 di desèmber a detené un kòntròl di velosidat. E kòntròl a tuma lugá na E.E.G. Bulevar. Ku un ‘lasergun’ a midi velosidat di vehíkulonan aserkando. Durante e kòntròl, a duna un but pa surpasá e velosidat máksimo permití di 40 km/ora. E velosidatnan ku a midí tabata entre 40 i 76 km/ora. Tambe a duna un shofùr but pa no tin faha di seguridat bistí i pa manehá ku telefòn den man. Banda di esaki a duna un shofùr atvertensia pa manehá sin seguro bálido. KPCN lo kontinuá ku e tipo di kòntròl aki dirigí riba velosidat na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.
Ladronisia for di outo
Djasabra 13 di desèmber a drenta keho di ladronisia for di un outo ku tabata stashoná riba tereno di un akomodashon turístiko na Kaya Internashonal. Deskonosínan a bai ku kuater (4) rim original koló pretu ku rant di plata for di un outo di marka Kia Picanto. Seguidamente deskonosínan a pone kuater otro rim bou di e outo. Ta investigando e kaso.
Ladronisia di baiskel eléktriko
Djabièrnè 12 di desèmber a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl V8. E baiskel tabata stashoná banda di un kònteiner na un fèlt di futbòl na Kaminda di Lac. Ta investigando e kaso.
Destrukshon
Djabièrnè 12 di desèmber a drenta keho di destrukshon di un winshil di patras di un outo ku tabata stashoná na Kaya J.N.E. Craane. Deskonosínan a destruí e winshil di patras ku un blòki. No a hòrta nada for di den e outo. Ta investigando e kaso.