Kiebro den negoshi
Djaluna 29 di desèmber a drenta keho di kiebro den un negoshi na Kaya Industria. Deskonosínan a haña akseso na e edifisio i seguidamente a drenta den un ofisina. Aki a bai ku un suma di sèn. Ta investigando e kaso.
Dos detenshon pa violashon di Lei di Arma di Kandela
Djadumingu 28 di desèmber, alrededor di 8 or di anochi, polis a detené dos persona riba Kaya Macario (Cai) Sint Jago pa violashon di Lei di Arma di Kandela BES. Polis a topa ku e sospechosonan riba un skuter i ámbos tabata sin hèlm bistí. Pa e motibu aki, a duna e shofùr señal pa para pa kòntròl. Durante kòntròl, polis a konstatá ku nan tabata mustra komportashon sospechoso i a bai ofer pa listra ámbos.
Den tas di un di e sospechosonan, a topa ku un arma di kandela i e otro sospechoso tabatin munishon huntu kuné. Ta trata di dos hòmber, unu di inisial T.K. di 19 aña di edat i e otro di inisial H.A.W. di 20 aña di edat.
A konfiská e arma di kandela, munishon i e skuter pa mas investigashon mas.
En konekshon ku e kaso aki a tene dos entrada hudisial. Ta trata di un kas na Kaya Maya i e otro na Kaya Blòkflùit. No a enkontrá nada relevante pa e investigashon.
Aksidente entre outo i minibùs
Djadumingu 28 di desèmber, alrededor di 10.55 or di mainta, ‘meldkamer’ sentral a risibí notifikashon tokante un aksidente entre un outo i un minibùs na e krusada di Kaya Nikiboko Nort i Kaya Pos di Amor. keda sin duna preferensia a result di ta kousa di e aksidente, despues di kua un di e vehíkulonan a bai dal den un kurá di kas. Ambulans a transportá shofùr di e outo i un menor di edat pa hòspital pa tratamentu médiko. Konforme e maneho di 'botsen is blazen', a hasi tèst di supla ku shofùr di e minibùs. E shofùr a supla bou di e límite pèrmití pa lei. Pa motibu di prioridat médiko, no por a hasi tèst di supla ku shofùr di e outo. A sera e kaya parsialmente i polis a dirigí tráfiko temporalmente.
Aksidente entre dos vehíkulo
Djadumingu 28 di desèmber, alrededor di 10.40 or di mainta, ‘meldkamer’ sentral a risibí notifikashon tokante un aksidente entre dos vehíkulo riba E.E.G. Bulevar. Un di e outonan tabata kantu di kaminda i kier a subi kaminda, na mesun momentu ku un segundo outo tabata aserkando ku velosidat haltu patras di di dje. E outo aki a dal na e banda robes dilanti di e promé outo i a bai dal den un kurá di kas na e kaya menshoná. Konforme e maneho di 'botsen is blazen', a hasi tèst di supla ku shofùr di e promé outo. E shofùr a supla bou di e límite pèrmití pa lei. Pa motibu di prioridat médiko, no por a hasi tèst di supla ku shofùr di e di dos outo. Ambulans a transportá shofùr di e outo aki pa hòspital pa tratamentu médiko. A hiba algun menor di edat ku tambe tabata den e outo aki, pa hòspital pa kòntròl médiko.
Kòntròl di tráfiko ku detenshon
Den oranan di mainta di djadumingu 28 di desèmber, a tene un kòntròl planiá di tráfiko na Kaya Korona en konekshon ku seguridat den tráfiko. Durante di e kòntròl a kontrolá total 23 vehíkulo. Aki a duna 8 but i 6 atvertensia.
E butnan tabata pa lo siguiente:
5x pa manehá sin seguro bálido;
2x pa manehá sin faha di seguridat bistí;
1x pa manehá sin reibeweis bálido.
E atvertensianan tabata pa e siguiente violashonnan:
3x pa manehá sin faha di seguridat bistí;
1x pa manehá sin seguro bálido;
1x pa manehá sin reibeweis bálido;
1x pa manehá ku un plachi di number ku no ta bon kla visibel.
Den oranan di mainta di djadumingu 28 di desèmber, tambe a tene un kòntròl di tráfiko riba E.E.G. Bulevar. A kontrolá total 9 vehíkulo. tur shofùr tabata den poseshon di un reibeweis bálido i e vehíkulonan tabatin seguro bálido.
Den oranan di anochi di djabièrnè 26 di desèmber, a tene un kòntròl planiá di tráfiko na Julio A. Abraham Bulevar pa kontrolá kumplimentu ku Ordenansa di Tráfiko. Durante di e kòntròl aki a kontrolá total 15 vehíkulo. A duna 6 but pa e siguiente violashonnan:
2x pa manehá sin seguro bálido;
1x pa manehá sin faha di seguridat bistí;
3x pa manehá sin reibeweis bálido.
Alrededor di 11.15 or di anochi, a detené un hòmber di inisial R.H.K.S.J.J.B. di 48 aña di edat pa manehá bou di influensia di alkohòl. E sospechoso tabata mustra señalnan di un persona ku a konsumí alkohòl, di kua a hasi un tèst di supla kuné. E shofùr a supla riba e límite pèrmití pa lei. En konekshon ku resultado di un anàlisis di rosea, e sospechoso a risibí un prohibishon pa manehá di 2 ora.
Lo tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Aksidente entre tres vehíkulo
Djasabra 27 di desèmber, alrededor di 6.30 or di anochi, un aksidente a tuma lugá riba Kaya Nikiboko Sùit di kua tres vehíkulo tabata enbolbí. Shofùr di un outo tabata transportando un persona ku a bira malu. E outo aki diripiente a wanta brek, di kua un skuter a bin dal tras di e outo i seguidamente un pikòp a dal den e skuter. E skuter a keda pegá mei mei di e outo i e pikòp.
Ambulans a transportá un persona pa hòspital pa tratamentu médiko. Konforme e maneho di 'botsen is blazen', a hasi tèst di supla ku tur tres shofùr i nan a supla bou di e límite pèrmití pa lei.
Detenshonnan pa manehá bou di influensia di alkohòl
Den e último dianan, a detené vários shofùr na diferente sitio pa manehá bou di influensia di alkohòl.
Djasabra 27 di desèmber, alrededor di 2 or di mardugá, polis a konstatá un vehíkulo ku tabata kore zeilu riba Kaya Dr. Jose Girigorio Hernandez. Despues di a para e vehíkulo pa kòntròl, e shofùr tabata mustra vários señal di ta bou di influensia di alkohòl. E shofùr a supla riba e límite pèrmití pa lei. A detené e hòmber di inisial E.J.G.W. di 58 aña di edat pa manehá bou di influensia i el a haña un prohibishon pa manehá di 2 ora.
Djabièrnè 26 di desèmber, alrededor di 4.40 or di mardugá, ‘meldkamer’ sentral a risibí notifikashon tokante un vehíkulo ku tabata stashoná mei mei di kaminda riba Kaya Nikiboko Nort. Na e sitio un patruya a topa ku e vehíkulo ku motor sendé, i e shofùr na soño tras di stür. Durante e kontrol, a hasi un test di supla ku e shofùr i el a supla riba e límite pèrmití pa lei. A detené e hòmber di inisial A.B.M. di 39 aña di edat pa manehá bou di influensia. E tambe a haña un prohibishon pa manehá di 4 ora.
Djaweps 25 di desèmber, alrededor di 10 or di anochi, un patruya a para un vehíkulo ku tabata mustra komportashon di manehá imprudente di kua e lusnan di patras no tabata funshoná riba Julio A. Abraham Bulevar. E shofùr no por a mustra un reibeweis, prueba di seguro òf prueba di identifikashon bálido. Durante e kòntròl, e shofùr a purba skonde bou di un vehíkulo i e tabata mustra señalnan bisto di ta bou di influensia di alkohòl. E shofùr a supla riba e límite pèrmití pa lei. A detené e dama di inisial I.P.P. di 56 aña di edat i el a haña un prohibishon pa manehá di 5 ora. Ta e di dos biaha den e mesun luna ku a detené e sospechoso pa manehá bou di influensia di alkohòl.
Kuerpo Polisial ta enfatisá ku manehá bou di influensia ta forma un peliger serio pa e shofùr mes i pa otro usuarionan di tráfiko. Ta urgi shofùrnan pa no manehá un vehíkulo bou di influensia di alkohòl. Huntu nos ta traha riba un tráfiko seif.
Detenshon pa maltrato i destrukshon
Djabièrnè 26 di desèmber, alrededor di 7.10 or di anochi, a detené un hòmber di inisial C.S.C.J. di 21 aña di edat na Kaya Monica pa maltrato i destrukshon. Investigashon den e kaso ta kontinuá.
Detenshon pa violashon di Lei di Opio
Djabièrnè 26 di desèmber, alrededór di 2.45 or di atardi, polis a risibí notifikashon ku un dama probablemente a drenta ku droga den e Instituto Hudisial Hulanda Karibense (JICN) na Plantashi Aruba. A detené e dama di inisial R.L.M. di 27 aña di edat pa violashon di Lei di Opio BES. A konfiská e supstansianan probablemente narkótiko. Polis ta kontinuá ku e investigashon di e kaso aki.
Insidente ku skuter
Djabièrnè 26 di desèmber, alrededór di 10.20 or di mainta, un insidente ku skuter a tuma lugá riba Bulevar Gobernador N. Debrot. Pa motibu ainda deskonosí, shofùr di un skuter ku un pasahero a pèrdè kòntròl i kai. Tantu e shofùr i e pasahero a resultá riba kaminda. Ambos a resultá heridá. Konforme e maneho di 'botsen is blazen', a hasi tèst di supla ku e shofùr i el a supla bou di e límite pèrmití pa lei. Ambulans a transportá e pasahero pa hòspital pa tratamentu médiko.
Violashon di orario di sera
Den oranan di mardugá di djabièrnè 26 di desèmber, alrededor di 3.15 or, polis a sera un lokalidat di hòreka na Kaya Libertador Simon Bolivar. Esaki tabata pa motibu di violashon di e orario di sera pèrmití.
Durante kòntròl, tabatin un grupo di mas o ménos 25 persona presente den e lokalidat. A sera e negoshi mesora pasobra nan no tabatin pèrmit pa keda habrí na e orario ei. Ademas, e pèrmit bálido no tabata na un lugá visibel, e doño no por a mustra esaki i el a pasa e ora di sera. E doño a haña but pa violashon di Lei di Bebida i Hòreka BES (de Drank- en Horecawet BES).