Violashon di orario di sera
Den oranan di mardugá di djaweps 1 di yanüari, alrededor di 4.40 or, polis a konstatá ku un establesimentu di hóreka na Kaya L.D. Gerharts na e orario menshoná, tabata bende bebida ku kliente via un bentana. Relashoná ku esaki a papia seriamente ku e trahadó di e bar, debí ku e negoshi mester a sera for di 3 or di mardugá. Debí na violashon di e orario di sera permití, lo traha un prosèsferbal pa violashon di Lei di Bebida i Hóreka BES (de Drank- en Horecawet BES).
Notifikashonnan durante kambio di aña
Den e oranan promé i durante kambio di aña, ‘meldkamer’ sentral a risibí vários notifikashon. E notifikashonnan aki tabata entre otro tokante molèster di vürwèrk, situashonnan peligroso i maldat kometé pa hóbennan. Ademas, a drenta notifikashon tambe tokante klikonan, mata i mondi ku tabata na kandela. Na algun di e insidentenan aki, kuerpo di bombero mester a presentá, miéntras ku den otro kasonan personanan ku tabata den serkania òf agentenan polisial mes a paga e kandela.
Djabièrnè 2 di yanüari, alrededor di 12.45 or di mardugá, a drenta notifikashon tokante un kliko ku tabata na kandela bou di un dak na un edifisio na Kaya L.D. Gerharts. Na yegada di polis a resultá ku tabata trata di un kònteiner i sushi grandi ku algu promé, personanan den serkania a kita for di bou di e dak i a poné mei mei riba un tereno di stashoná outo. Danki na e akshon rápido aki, nan a prevení daño i un kandela grandi. Kuerpo di bombero a paga e kandela.
Djaweps 1 di yanüari, alrededor di 8.45 or di anochi, a drenta notifikashon tokante un grupo di hóben den bario di Nieuw Amsterdam ku tabata tira vürwèrk riba otro. Polis a topa ku un grupo di mas o ménos 15 hóben riba ‘fatbike’, pero na momentu ku nan a mira polis, nan tur a hui bai.
Den oranan di anochi di djaweps 1 di yanüari, a drenta notifikashon di personanan ku tabata tira vürwèrk riba e tereno di stashoná outo di e Instituto Hudisial Hulanda Karibense (JICN). E patruya a topa ku e personanan aki i a splika nan bon kla ku no ta pèrmití esaki na e lokashon ei.
Alrededor di 4.40 or di atardi, polis a risibí notifikashon tokante mas o ménos sinku hóben den bario Mamparia Kutu ku tabata tira vürwèrk den direkshon di kasnan i den buzon di karta (brievenbus). Polis a topa ku e grupo i a konfiská vürwèrk di tur presente. A papia seriamente ku e hóbennan i a hala nan atenshon riba e peligernan di nan akshonnan. E hóbennan a indiká ku nan a komprendé e atvertensia.
Alrededor di 3 or di mardugá, ‘meldkamer’ sentral a risibí notifikashon tokante un kandela grandi riba e tereno di stashoná outo di un supermerkado na Kaya Industria. Un hòki pa warda garoshi di kompras tabata kompletamente na kandela. Tin sospecho ku personanan deskonosí a pone kartòn den e garoshinan i a sende esaki na kandela.
Riba tereno di un kompleho di apartamentu na Bulevar Gobernador N. Debrot tambe tabatin un kandela pa motibu di vürwèrk, i personanan den serkania mes a logra paga esaki. Na Kaya Neerlandia un palma di mas o ménos tres meter di altura tabata na kandela. E palu tabata kologá riba dak di un kas, di kua brantwer a presentá na e sitio pa paga e kandela. Na entrada di Suikerpalm na Belnem, tabatin palètnan na kandela. Na yegada di polis, ya personanan den serkania a paga e kandela.
Alrededor di 12.10 or di mardugá, tabatin un mondi na kandela den serkania di un kas. Un mondi den serkania di un kas. Brantwer tabatin e kandela bou di kòntròl i a pag'é. Polis a lanta e habitante di e kas for di soño pa inform'é tokante e situashon.
Alrededor di 8 or di anochi di djárason 31 di desèmber, ‘meldkamer’ sentral a risibí notifikashon ku tabata tira vürwèrk na e bichnan na Kaya Internashonal i E.E.G. Bulevar. Esaki tabata stroba aterisahe di avionnan. Pa e motibu aki a bai na e bichnan i e kasnan den besindario di aeropuerto pa duna e personanan presente órden, na interes di seguridat di aviashon, pa no tira vürwèrk.
Kuerpo Polisial ta bolbe enfatisá ku tiramentu di vürwèrk riba persona, vehíkulo, bestia òf edifisio no solamente ta kastigabel pa lei, pero tambe sumamente peligroso. E komportashon aki por kondusí na leshon físiko grave, manera kemadura. Ademas, vürwèrk por kousa daño material na propiedat.
Kuerpo Polisial ta hasi un yamada urgente na tur mayor i tutor pa nan ta alerta riba loke nan yu(nan) ta hasi i pa papia ku nan tokante e peliger i konsekuensia di esaki. Tene na kuenta ku pa lei por tene mayornan responsabel pa e daño ku nan yu(nan) menor di edat kousa. E dispensashon general ku Gezaghebber a duna pa tira vürwèrk, tabata bálido te ku 1 di yanüari 2026, konforme artíkulo 31, sub b, di e Ordenansa General di Polis 'Algemene Politie Keur' (APK) di Boneiru. Despues di e fecha aki no ta permití pa tira vürwèrk mas sin un pèrmit.
Aksidente ku tres detenshon
Djaweps 1 di yanüari, alrededor di 6 or di atardi, ‘meldkamer’ sentral a risibí notifikashon tokante un aksidente entre dos vehíkulo na e krusada Kaya Caribe i Kaya Amsterdam. Un pikòp i un outo di famia tabata enbolbí.
Segun presentenan, mesora despues di e aksidente dos hòmber a baha for di e outo i a kore bai. Un patruya ku tabata den besindario a topa dos persona riba Kaya Amsterdam ku tabata kuadra ku e deskripshonnan duná. Un di e hòmbernan aki tabata huma un 'joint' na e momentu ei, kual a destruí esaki mesora. E otro hòmber tabatin dos tas huntu kuné. El a deklará ku un tas tabata di dje i e otro tabata di un amigu ku a keda na e sitio di e aksidente.
Durante un kòntròl, basá di e Lei di Opio BES, a haña loke supstansianan probablemente narkótiko den tur dos tas. A detené e hòmber di inisial L.G.H. di 21 aña di edat na Kaya Amsterdam. A detené su amigu tambe, e hòmber di inisial J.R.A.B. di 23 aña di edat na e sitio di e aksidente pa violashon di Lei di Opio BES. A kontrolá e otro personanan ku tambe tabata den e outo huntu ku e sospechosonan i e outo mes tambe, pero no a topa ku nada partikular.
Konforme e maneho di 'botsen is blazen' a hasi tèst di supla ku ámbos shofùr. E shofùr di e pikòp a supla riba e límite pèrmití pa lei. A detené e shofùr, un hòmber di inisial H.E.M. di 60 aña di edat pa manehá bou di influensia di alkohòl. A konfiská su reibeweis. Ámbos vehíkulo a haña daño signifikante a konsekuensia di e aksidente.
Persekushon ta terminá ku detenshon
Djaweps 1 di yanüari, alrededor di 7.20 or di mainta, a detené un hòmber di inisial A.R.W. di 50 aña di edat riba Kaya Bernadeta pa manehá bou di influensia di alkohòl i pa neglishá señal pa para.
Un patruya ku tabata riba Kaya Korona a duna shofùr di un pikòp òrdu pa para pa un kòntròl. E hòmber a neglishá esaki i a sigui kore di forma imprudente den diferente kaya. Despues di un persekushon kòrtiku, e sospechoso a para su vehíkulo dilanti di un kas na Kaya Bernadeta.
Durante kòntròl, e sospechoso tabata mustra señalnan di ta bou di influensia di alkohòl. Un tèst di supla a konfirmá ku e shofùr a surpasá e límite pèrmití pa lei di kua a hib’é warda di polis pa un análisis di rosea.
Despues di mas investigashon a resultá ku dia 19 di desèmber 2025, a detené e shofùr kaba pa manehá bou di influensia di alkohòl despues di un persekushon. Debí ku riba e dia ei a konfiská su reibeweis, e hòmber a bolbe manehá un vehíkulo dia 1 di yanüari miéntras su reibeweis ta konfiská ainda.
‘Hit and run’ ku herido
Djaweps 1 di yanüari, alrededor di 6.20 or di mainta, ‘meldkamer’ sentral a risibí notifikashon tokante un aksidente entre un outo i un skuter na Kaya Kamari. Pa e motibu aki e shofùr di e skuter a resultá heridá riba kaya. Ambulans a transportá e víktima pa hòspital pa tratamentu médiko. E outo ku a alkansá e skuter, no tabata na e sitio mas. A resultá ku e vehíkulo a sigui kore despues di e aksidente.
Bo a mira algu òf bo tin mas informashon tokante e kaso di ‘hit & run’ aki? E ora ei tuma kontakto ku polis via 715 8000, 911 òf via e liña di tep anónimo 9310.
Detenshon pa stroba órden públiko i buracheria públiko
Djaweps 1 di yanüari, alrededor di 5.55 or di mainta, a detené un hòmber di inisial F.W. di 27 aña di edat na Kaya Seminole pa stroba órden públiko i buracheria públiko. E detenshon a tuma lugá despues ku polis a risibí notifikashon di un problema den esfera familiar. Na yegada di polis, e sospechoso tabata mustra komportashon agresivo, tantu ferbal komo físiko.
E agentenan a purba kalma e hòmber, pero sin e resultado deseá. Maske diferente biaha a dun’é òrdu pa bandoná e sitio, e no a duna oido na esaki. E sospechoso a purba drenta kurá di un kas pa buska konfrontashon. Pa de-eskalá e situashon, a pone e hòmber den vehíkulo polisial ku e intenshon di hib'é su kas. Sinembargo, e sospechoso a purba kologá for di e bentana di e outo di polis, di kua mesora a detené.
Detenshon pa manehá bou di influensia di alkohòl
Djaweps 1 di yanüari, alrededor di 2.10 or di mardugá, polis a duna shofùr di un vehíkulo ku tabata kore zeilu riba Kaya Maximiliana Rosario, señal pa para. Durante kòntròl, e shofùr tabata mustra diferente señal klave di un persona ku a konsumí alkohòl. A hasi un tèst di supla kuné ku a konfirmá ku e hòmber a surpasá e límite pèrmití pa lei. A detené e hòmber di inisial I.A.D.P. di 32 aña di edat pa manehá bou di influensia di alkohòl. A konsekuensia di e resultado di un análisis di supla el a haña un prohibishon pa manehá di tres ora.