Outo na kandela
Den oranan di anochi di djamars 6 di yanüari, alrededor di 11.45 or di anochi, ‘meldkamer’ sentral a risibí notifikashon tokante un vehíkulo na kandela na Kaya Ciboney. Na yegada di e patruya, a bin topa ku un outo na kandela.
Miéntras tabata warda riba brantwer, polis a kuminsá paga e kandela ku un slan di awa. Na yegada di brantwer, a kaba atendé esaki. Polis a tuma keho di sospecho di insendio i a kuminsá un investigashon.
Detenshonnan pa manehá bou di influensia di alkohòl
Djárason 7 di yanüari, alrededor di 3.20 or di mardugá, a detené un hòmber di inisial R.M.R. di 39 aña di edat pa manehá bou di influensia di alkohòl. A kontrolá e shofùr despues ku agentenan a mir’é pasa ku velosidat haltu riba Kaya Nikiboko Sùit. Na momentu di kòntròl, a resultá ku e tabata bou di influensia di alkohòl. A konfiská reibeweis di e sospechoso.
Djamars 6 di yanüari, alrededor di 3.40 or di atardi, un aksidente entre dos outo a tuma lugá na e krusada di Kaya Italia i Kaya Gilberto F. (Betico) Croes. Durante kòntròl, a duna un shofùr but pa manehá sin reibeweis bálido. Ademas, a detené e otro shofùr, un dama di inisial F.A.S.M. di 28 aña di edat pa manehá bou di influensia di alkohòl. A hasi un análisis di rosea kuné na warda di polis i a resultá ku sospechoso a konsumí alkohòl, pero a supla bou di e limité pèrmití pa lei. P’esei a laga e sospechoso den libertat.
Detenshon pa manehá bou di influensia i poseshon di supstansia probablemente narkótiko
Djárason, 7 di yanüari, alrededor di 3:35 or di mardugá, a detené un hòmber di inisial J.M.S. di 34 aña di edat despues ku polis a mira e vehíkulo ta zeilu riba Kaya Korona. Pa e motibu aki a dun’é señal pa para.
Durante e kòntròl a resultá ku e shofùr tabata bou di influensia di alkohòl i a detené. El a haña un prohibishon di manehá pa 7 ora. Na warda di polis a listra e sospechoso i a bin topa ku supstansianan probablemente narkótiko i a konfiská esaki.
A konfiská vürwèrk durante kòntròl na skol
Polis a konfiská un kantidat di vürwèrk i un laiter serka kuater studiante durante un kòntròl di tas na un skol na Kaya Frater Odulfinus i na Kaya Barakuda. Esaki despues ku a tira vürwèrk riba dak di e skol i okashoná daño.
Polis ta enfatisá ku no ta pèrmití pa hiba vürwèrk skol i ku esaki ta peligroso. Ademas, e último dia pèrmití pa tira vürwèrk tabata 1 di yanüari 2026. Ta urgi mayornan pa konsientisá nan yu(nan) riba esaki i pa kontrolá kiko nan ta bai skol kuné. Polis lo aktua debidamente den kaso di infrakshon.
A konfiská skuter i hèrmènt despues di persekushon
Durante un patruya den e anochi di djamars 6 di yanüari, alrededor di 1.05 or di mardugá, polis a konfiská dos skuter i hèrmènt den centrumgebied. Agentenan a topa dos skuter ta kore di kua e shofùrnan tabatin nan kara tapá.
Despues ku a duna ámbos señal pa para, nan a neglishá e ordu i a drenta un hanchi i kore bai. Un ratu despues polis a topa ku e skuternan bandoná na altura di Kaya Kòrsou i e sospechosonan a logra hui na pia. Na momentu di kòntròl na e skuternan, polis a topa tambe ku algun hèrmènt.
A konfiská tantu e skuternan komo e hèrmèntnan pa mas investigashon. Na warda di polis a resultá ku tur dos skuter tabata registrá komo hòrtá. Ta investigando e kaso.
Detenshon pa destrukshon
Djaluna 5 di yanüari, alrededor di 6.35 or di atardi, ‘meldkamer’ sentral a risibí notifikashon di un insidente na un instansia na Kaminda Nieuw Amsterdam. Na e sitio, polis a konstatá ku un bentana tabata kibrá i ku tabatin daño na un vehíkulo. A detené un mucha muhé di inisial A.K.W. di 16 aña di edat pa destrukshon i a hib’é warda di polis. Investigashon ta kontinuá.