Aksidentenan
Den oranan di mardugá di djabièrnè 9 di yanüari, alrededor di 2.50 or di mardugá, ‘meldkamer’ sentral a risibí notifikashon tokante un aksidente riba Kaya International. Na e sitio a resultá ku un outo a dal den un kurá di kua un otro outo tambe a haña daño. E shofùr no por a sali for di e vehíkulo. Brantwer i personal di ambulans a presentá na e sitio pa duna asistensia. Seguidamente ambulans a transportá e víktima pa hòspital pa tratamentu médiko. Polis a sera e kaminda temporalmente i a dirigí tráfiko. Despues di a limpia e superfisie, a habri e kaminda bèk pa tráfiko.
Djaweps 8 di yanüari, alrededor di 6.50 or di mainta, ‘meldkamer’ sentral a risibí notifikashon tokante un aksidente riba Kaya Monseigneur Nieuwindt. Na e sitio a resultá ku un vehíkulo a dal den un kurá di kas. Personal di ambulans a presentá na e sitio i a hasi un chekeo médiko ku e shofùr. Durante kòntròl di polis, a resultá ku e shofùr no por a mustra un reibeweis bálido. A dun’é but pa esaki. Konforme e maneho di ‘botsen is blazen’, a hasi un tèst di supla kuné i a resultá ku e no a konsumí alkohòl.
Detenshon pa manehá bou di influensia di alkohòl
Djabièrnè 9 di yanüari, alrededor di 1.40 or di mardugá, polis a para shofùr di un skuter riba Kaya Korona pa su komportashon remarkabel di manehá. Na e sitio e no por a mustra un reibeweis, prueba di identifikashon ni tampoko dokumentonan di seguro bálido. Durante kòntròl a resultá ku e ta bou di influensia di alkohòl, di kua a detené e shofùr. Ta trata di un dama di inisial A.K. di 27 aña di edat. A konfiská reibeweis di e sospechoso.
No ta pèrmití pa manehá ku solamente un plachi di number
Polis na Boneiru a konstatá últimamente durante patruya i kòntròlnan di tráfiko, ku un kantidat supstansial di vehíkulo motorisá ta kore rònt ku solamente un plachi di number. Kuerpo Polisial Hulanda Karibense (KPCN) ta enfatisá ku esaki no ta pèrmití pa lei i ku lo aktua ku man duru riba esaki.
Segun e Ordenansa di Tráfiko Boneiru 2019 (artíkulo 97, sup 1), tur vehíkulo motorisá, ku eksepshon di skuter, bròmer i motosaikel, mester tin dos plachi di number bálido i bon visibel. Un na e parti dilanti i un na e parti patras di e vehíkulo. Kore sin of ku solamente un plachi di number ta un infrakshon.
Ademas, no ta pèrmití pa stroba e visibilidat di e plachi di number, por ehèmpel dor di usa tapa di plèstik ‘plastic cover’ muchu skur, dekorashon òf ‘frame’ di plachi di number ku no ta ofisial. Pa loke ta skuter, bròmer i motosaikel, e plachi di number mester ta fihá na un manera visibel patras di e vehíkulo.
Shofùrnan ku no kumpli ku e eksigensianan aki, ta riska un but. Si bo a pèrdè un plachi di number, si a hòrt’é òf si e ta dañá, regla esaki mas pronto posibel via e instansianan konserní.
Polis lo vigilá èkstra riba plachinan di number durante tantu kòntròlnan rutinario komo kòntròl planiá den e próksimo periodo. Kontrolá bo vehíkulo promé ku bo sali i sòru ku e ta kumpli ku tur eksigensia legal pa evitá un but.