Bringamentu ku herido i detenshon
Djaluna 12 di yanüari, alrededor di 2 or di mardugá, ‘meldkamer’ sentral a risibí notifikashon tokante un bringamentu entre un grupo di persona na un establesimentu di hóreka na Kaya Nikiboko Nort. Na yegada di polis a topa ku un grupo grandi di hende pafó dilanti entrada di e establesimentu.
A pidi asistensia di ambulans tambe, pa motibu ku dos persona a resultá heridá ku machete durante e bringamentu. A transportá ámbos víktima pa hòspital pa tratamentu médiko. A detené un hòmber di inisial R.D.C. di 53 aña di edat na e sitio pa maltrato ku un arma. A listra vehíkulo di e sospechoso di kua a haña i konfiská e machete usá.
Aksidente entre bròmer i outo
Djadumingu 11 di yanüari, alrededor di 7.25 or di anochi, ‘meldkamer’ sentral a risibí notifikashon tokante un aksidente riba Kaya Korona. Na yegada di polis a topa ku un bròmer ku daño signifikante bentá riba kaya.
A resultá ku ta trata di un aksidente entre un bròmer i un outo. E outo a lora dilanti di e bròmer pa drenta Kaya Isabella, di kua e bròmer a dal den e outo. A konsekuensia di e impakto, tantu e shofùr di e bròmer komo e pasahero, un mucha, a resultá heridá. A hiba ámbos víktima hòspital den un vehíkulo partikular promé ku polis a yega na e sitio.
Mas despues, personal di ambulans a presentá na e sitio i a duna asistensia médiko na pasahero di e outo. No mester a transport'é pa hòspital. Konforme e maneho di ‘botsen is blazen’, a hasi tèst di supla ku shofùr di e outo, i shofùr di e skuter na hòspital. Den tur dos kaso no tabatin señal di uso di alkohòl.
Departamentu di Tráfiko di KPCN ta enkargá ku e investigashon.
Kandela na lèntfel
Djadumingu 11 di yanüari, alrededor di 3.10 or di mardugá, ‘meldkamer’ sentral a risibí notifikashon tokante un kandela na lèntfel na Kaminda Lagun. Na yegada di polis i brantwer a konfirmá ku en bèrdat tabatin un kandela riba e tereno. Na entrada di lèntfel por a komprondé ku un èkskavetor (excavator) ya tabata tapa e kandela ku tera.
Detenshon pa destrukshon
Djadumingu 11 di yanüari, alrededor di 01.40 or di mardugá, a detené un hòmber di inisial J.M. di 31 aña di edat na Kaya Amsterdam pa destrukshon. E detenshon a tuma lugá despues ku ‘meldkamer’ sentral a risibí notifikashon tokante un hòmber deskonosí ku tabata bula dilanti di vehíkulonan ku tabata pasa. Poko despues a drenta notifikashon ku e hòmber a tira piedra riba dos outo ku tabata pasa. Un vehíkulo a haña daño na su winshil dilanti i e otro na su banda robes. A topa ku e sospechoso den serkania na un kas i a detené.
Kòntròl planiá di tráfiko
Den oranan trempan di anochi di djasabra 10 di yanüari, a tene un kòntròl planiá di tráfiko na Kaya Nikiboko Nort. A para i kontrolá un total di dies (10) vehíkulo, di kua a duna sinku (5) but.
E butnan tabata pa e siguiente violashonnan:
2x pa manehá sin seguro bálido;
2x pa manehá sin reibeweis bálido;
1x pa no tin faha di seguridat bistí.
Djabièrnè 9 di yanüari tambe a tene un kòntròl planiá di tráfiko. E kòntròl a tuma lugá riba Kaya Korona. A para i kontrolá un total di dieskuater (14) vehíkulo, di kua a duna kuater (4) but.
E butnan tabata pa e siguiente violashonnan:
2x pa manehá sin seguro bálido;
1x pa manehá sin reibeweis bálido;
1x pa no tin faha di seguridat bistí.
Durante e kòntròl aki a konfiská un bròmer pa motibu ku e shofùr no por a mustra ningun dokumentu. E tabata manehá riba kaminda públiko sin hèlm bistí, sin reibeweis i sin seguro. Ademas el a mustra un karchi di identifikashon (sédula) kaduká. E bròmer ta keda na warda di polis te ora ku e doño por mustra tur e dokumentunan bálido nesesario.
Lo tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225
Detenshon pa manehá bou di influensia di alkohòl
Djasabra 10 di yanüari, alrededor di 2.45 or di mardugá, a detené un hòmber di inisial M.B. di 47 aña di edat riba Bulevar Gobernador N. Debrot pa manehá bou di influensia di alkohòl. Polis a par’é pa un kòntròl despues ku e tabata kore zeilu riba un skuter. Durante e kòntròl, e sospechoso no por a mustra ningun dokumentu i tabata mustra señal di un persona ku a konsumí alkohòl, di kua a hasi un tèst di supla kuné. For di esaki a resultá ku el a supla riba e límite pèrmití pa lei. Despues di mas investigashon a konfiská reibeweis di e sospechoso. Ademas e sospechoso a haña but pa manehá sin prueba di seguro i pa no por mustra un reibeweis na momentu ku a pidi esaki.
A konfiská artíkulonan durante kòntròl di seguridat na skol
Djabièrnè 9 di yanüari, polis a konfiská vürwèrk, sigaria i seis pòchi ku tabata kontené saku ku un puiru deskonosí. A topa ku e artíkulonan aki durante un kòntròl di seguridat na un skol na Kaya Frater Odulfinus.
Alabes a haña dos laiter, dos kuchú (stanleymes) i un 'vape' serka algun alumno. Ta urgi mayornan pa konsientisá nan yu(nan) riba esaki i pa kontrolá kiko nan ta bai skol kuné. Polis lo aktua debidamente den kaso di infrakshon.