Ladronisia na bich
Djamars 13 di yanüari, alrededor di 12.20 or di mèrdia, un kaso di ladronisia a tuma lugá na Playa Pal’i Mangel (Donkey’s Beach) situá na E.E.G. Bulevar. A entregá keho di ladronisia di un tas di lomba ku a keda sin supervishon riba e bich. Miéntras e denunsiante tabata snòrkel, deskonosínan a bai ku su tas. Den e tas tabatin entre otro dos telefòn selular, sèn kèsh i pertenensianan personal. Polis a tuma keho i a start un investigashon.
Aksidente entre skuter i trèker
Djaluna 12 di yanüari, alrededor di 3.15 or di atardi, ‘meldkamer’ sentral a risibí notifikashon tokante un aksidente riba Kaya International.
Na e sitio a resultá ku ta trata di un aksidente entre un trèker i un skuter. Shofùr di e skuter a bai pasa e trèker nèt na momentu ku esaki a lora na su man robes, ku e choke komo konsekuensia. Debí na esaki, e shofùr di e skuter a resultá heridá.
Konforme e maneho di 'botsen is blazen', a hasi tèst di supla ku shofùr di e trèker i no tabatin señal di uso di alkohòl. Pa motibu di prioridat médiko, no por a hasi tèst di supla ku shofùr di e skuter. Ambulans a transportá e víktima pa hòspital pa tratamentu médiko.
Detenshon pa violashon di Lei di Arma di Kandela
Djaluna 12 di yanüari, alrededor di 10.30 di mainta, a detené un mucha hòmber di inisial R.Y.C.H.E.N.F. di 17 aña di edat na Hanchi Amboina pa violashon di Lei di Arma di Kandela BES.
E detenshon a tuma lugá despues ku a drenta notifikashon ku a haña artíkulonan ilegal den tas di un alumno durante kòntròl na entrada di un skol na Kaya Gavilan. Na momentu ku polis a yega, e sospechoso a kore bai. Despues di un persekushon kòrtiku na pia, a logra deten’é.
Relashoná ku e detenshon aki, mas lat riba e mesun dia, a tene entrada hudisial na un kas na Kaya Taki. Durante e entrada hudisial no a bin topa ku nada relevante pa e investigashon.
Investigashon den e kaso aki ta kontinuá.
Ladronisia den negoshi di sambuyá
Djaluna 12 di yanüari a entregá keho di ladronisia den un negoshi di sambuyá situá na Kaya Internashonal. Deskonosínan a haña akseso na e edifisio i a bai ku un kaha fuerte ku un montante di sèn. Ta investigando e kaso.