Detenshon pa intenshonalmente no kumpli ku òrdu di polis
Djaluna 19 di yanüari, alrededor di 3.35 or di mardugá, a detené dos sospechoso na Kaya Korona. E detenshonnan a tuma lugá despues ku polis a mira aktuashon sospechoso di un outo na momentu ku nan a mira e vehíkulo polisial.
Durante kòntròl, e shofùr a nenga di mustra su reibeweis i seguro, i el a insultá un agente. Pa e motibu aki a detené e hòmber di inisial J.J.W. di 21 aña di edat. Durante su detenshon, e sospechoso a resistí fuertemente, loke a pone ku e agentenan a hañanan obligá di usa forsa pa por a domin’é. A detené pa intenshonalmente no kumpli ku òrdu di polis i pa insulto di un ámtenar den funshon.
Durante e detenshon aki, e pasahero a kuminsá zundra e agentenan i tabata mustra un komportashon agresivo. Ademas, e tabata mustra señalnan kla di ta bou di influensia di alkohòl. Komo ku el a nenga diferente biaha pa kumpli ku òrdu di polis i e tabata bou di influensia di alkohòl, a detené e pasahero tambe, e hòmber di inisial A.d.l.C.S di 21 aña di edat pa intenshonalmente no kumpli ku òrdu di polis i pa buracheria públiko. E sospechoso aki tambe a resistí fuertemente kontra su detenshon. A hiba vehíkulo di e sospechosonan warda di polis.
Kiebro na kapsalòn
Djaluna 19 di yanüari a drenta keho di kiebro na un kapsalòn na Bulevar Gobernador N. Debrot. Deskonosínan a haña akseso na e edifisio i a bai ku sèn kèsh. Ta investigando e kaso.
Detenshonnan pa manehá bou di influensia di alkohòl
Den e dianan ku a pasa, a detené dos shofùr pa manehá bou di influensia di alkohòl.
Djaluna 19 di yanüari, alrededor di 2 or di mardugá, un patruya a mira un outo tabata kore zeilu riba Kaya Industria. Despues ku a para e vehíkulo, a konstatá ku e shofùr tabata mustra señalnan kla di a hasi uso di alkohòl. For di un tèst di supla a resultá ku el a konsumí mas alkohòl ku ta pèrmití pa lei. A detené e sospechoso, un dama di inisial T.Y.C.M di 39 aña di edat na Kaya Internashonal pa manehá bou di influensia di alkohòl. Ademas a resultá ku e sospechoso no tabata den poseshon di un reibeweis i e vehíkulo no tabata segurá. Despues di investigashon mas aleu, a resultá ku esaki ta e di tres biaha ku e sospechoso ta haña but pa e mesun violashonnan menshoná. Pa e motibu aki a konfiská su outo.
Djadumingu 18 di yanüari, alrededor di 3.05 or di mardugá, polis a duna un shofùr ku tabata mustra komportashon di manehá sospechoso, señal pa para riba Kaya J.N.E. Craane. E shofùr no por a mustra un reibeweis bálido, i en bes di esei, el a mustra e agentenan un karchi di identifikashon. Durante e kòntròl, e shofùr tabata mustra señalnan kla di ta bou di influensia di alkohòl. Despues di vários intento, el a supla mas haltu ku e límite pèrmití pa lei. A detené e hòmber di inisial M.A.M.J. di 50 aña di edat i a konfiská su reibeweis ku no ta bálido na Bonaire.
Kuerpo Polisial ta enfatisá ku manehá bou di influensia ta forma un peliger serio pa e shofùr mes i pa otro usuarionan di tráfiko. Ta urgi shofùrnan pa no manehá un vehíkulo bou di influensia di alkohòl. Huntu nos ta traha na un tráfiko seif.
Detenshon pa maltrato
Djadumingu 18 di yanüari, alrededor di 9.30 or di anochi, a detené un hòmber di inisial D.A.M.d.J. di 46 aña di edat na Kaminda Lagun pa maltrato. E sospechoso a maltratá un dama despues di un diskushon. Ta investigando e kaso.
Ménornan di edat detené despues di ladronisia di baiskel
Den oranan di anochi di djadumingu 18 di yanüari, alrededor di 7.15 or, a detené dos ménor di edat pa enkubrimentu. A rekonosé e sospechosonan riba imágennan di kámara despues di ladronisia di dos 'fatbike' for di un establesimentu di hóreka na Sorobon. Ta trata di un mucha hòmber di inisial S.T.Z.Z.H. di 17 aña di edat i un mucha hòmber di inisial G.G.G.G.A. di 16 aña di edat. A topa tur dos sospechoso na un kas na Kaya De La Plata, di kua na e momentu ei nan tabata den poseshon di e ‘fatbike’nan hòrtá. A detené nan mesora i a konfiská e ‘fatbike’nan. Investigashon den e kaso aki ta kontinuá.
Aksidente entre vários outo na Kaya Amsterdam
Djadumingu 18 di yanüari, alrededor di 3.35 or di atardi, ‘meldkamer’ sentral a risibí notifikashon tokante un aksidente riba Kaya Amsterdam. Shofùr di un outo a pèrdè kòntròl i pa e motibu aki el a dal den diferente vehíkulo stashoná kantu di kaya. Aparte di e shofùr, tabatin tres (3) pasahero den e vehíkulo, di kua un ménor di edat. Ambulans a transportá tur pasahero pa hòspital pa tratamentu médiko i kòntròl. Polis a sera e kaya temporalmente te na momentu ku e servisionan a tèrminá ku nan trabou. Konforme e maneho di ‘botsen is blazen’, a hasi tèst di supla ku shofùr di e outo na hòspital. Aki no tabatin señal di uso di alkohòl.
Kòntròl di tráfiko
Djasabra 17 di yanüari a tene un kòntròl planía di tráfiko na Kaya Korona. A para i kontrolá un total di ocho (8) vehíkulo, di kua a duna kuater (4) but.
E butnan tabata pa e siguiente violashonnan:
2x pa manehá sin plachi di number dilanti;
1x pa manehá sin reibeweis bálido;
1x pa manehá sin seguro bálido i sin reibeweis bálido.
Lo tene e kòntròlnan aki regularmente na kua lo aktua ku man duru na momentu ku shofùrnan no tin e dokumentunan na òrdu i tambe si no ta kumpli ku reglanan di tráfiko. Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225
Bringamentu ku detenshon
Djasabra 17 di yanüari, alrededor di 3.10 or di mardugá, ‘meldkamer’ sentral a risibí notifikashon tokante un bringamentu entre un grupo di persona na un establesimentu di hóreka na Kaya Bonaire. Na yegada di polis a resultá ku presentenan tabata tin un hòmber tené. Polis a purba kalma e hòmber, pero apesar di e intentonan aki e tabata sigui kousa ku e situashon a eskalá. Poko despues a surgi un diskushon entre e hòmber aki i un otro hòmber, loke a resultá den un bringamentu atrobe. A detené ámbos hòmber pa maltrato. Ta trata di un hòmber di inisial A.L.C. di 21 aña di edat i un hòmber di inisial G.F.G.G. di 47 aña di edat.
Outo na kandela
Djasabra 17 di yanüari, alrededor di 2 or di mardugá, ‘meldkamer’ sentral a risibí notifikashon tokante un vehíkulo na kandela na un risòrt na Kaminda Djabou. Na yegada di polis, a evakuá e habitantenan di e kas pa motibu di seguridat. Kòrtiku despues brantwer a yega i rápidamente a logra dominá e kandela. Un outo ku tabata stashoná na e adrès menshoná, a kima pa gran parti.
Brantwer i e deportamentu forénsiko di KPCN a hasi investigashon pa sa kousa di e kandela. A konstatá ku a pega e vehíkulo intenshonalmente na kandela. Polis a tuma keho di insendio na e sitio.
Polis ta pidi kualke persona ku por a mira òf tende algu ku por yuda den e investigashon aki, pa tuma kontakto. Bo por mèldu esaki via 715 8000 òf via e liña di tep anónimo, 9310.
Detenshon pa destrukshon
Djabièrnè 16 di yanüari, alrededor di 6.10 or di atardi, a detené un hòmber di 33 aña di edat na Kaya Mozart.
E detenshon a tuma lugá despues ku polis a haña notifikashon tokante un hòmber ku tabata tira piedra riba outonan ku tabata pasa na Hanchi Amboina. Na e sitio, e agentenan a topa ku un hòmber ku tabata kuadra ku e deskripshon duná. E hòmber tabatin piedra den su man i a tira esaki den direkshon di un agente. E sospechoso no tabata ke kumpli ku òrdu di polis. Despues di un persekushon kòrtiku na pia i despues di diferente òrdu pa laga e piedranan kai, a detené.
A detené e hòmber di inisial S.J.J.C. di 33 aña di edat pa destrukshon, intento di maltrato ku un arma i pa no kumpli ku òrdu di polis.
Detenshon pa enkubrimentu i entrada hudisial
Djabièrnè 16 di yanüari, alrededor di 3.10 or di atardi, polis a detené dos sospechoso na Kaya Paloma.
A topa nan den posishon di un ‘fatbike’, di kua tin sospecho ku esaki ta prosedente di ladronisia. Ta trata di dos mucha hòmber menor di edat di inisial J.J.S.C. i M.S.R.S., ámbos di 15 aña di edat. A detené nan pa enkubrimentu.
Mas lat, polis a tene entrada hudisial na un kas na Kaya Papa Cornes i na Kaya Ana, en konekshon ku sospecho di posibel violashon di Lei di Arma di Kandela BES. Durante e entrada hudisial na Kaya Ana, a konfiská diferente artíkulo ku ta relevante pa e investigashon.
Investigashon den e kaso ta kontinuá.
Detenshon pa maltrato
Djabièrnè 16 di yanüari, alrededor di 10.45 or di mainta, ‘meldkamer’ sentral a haña notifikashon tokante maltrato den e área di Kaminda Tras di Montaña. Na e sitio e víktima a deklará ku durante un diskushon, su bisiña a dal’e.
Despues di investigashon mas aleu na e sitio i tuma keho, a detené e hòmber di inisial J.W.A.W. di 46 aña di edat pa maltrato. Investigashon den e kaso ta kontinuá.