Detenshonnan pa manehá bou di influensia di alkohòl
Djárason 21 di yanüari, alrededor di 2.15 or di mardugá, polis a kontrolá shofùr di un skuter na Kaya J.N.E. Craane, despues ku e tabata manehá den direkshon prohibí.
Durante kòntròl a resultá ku e shofùr no por a mustra su reibeweis ni un prueba di seguro bálido. Ademas e shofùr a deklará ku el a konsumí alkohòl. A hasi un tèst di supla i a resultá ku e shofùr tabata bou di influensia di alkohòl. Ta trata di un hòmber di inisial T.M. di 22 aña di edat. A detené e sospechoso i a hib’é warda di polis. A duna e sospechoso but pa no por mustra un reibeweis, pa no por mustra un prueba di seguro bálido i pa manehá den direkshon prohibí. Banda di esaki e sospechoso a haña prohibishon di manehá pa 5 ora.
Djárason 21 di yanüari, alrededor di 1.10 or di mardugá, polis a kontrolá dos shofùr di skuter riba Kaya L.D. Gerharts.
Durante kòntròl a resultá ku un di e shofùrnan a konsumí mas alkohòl ku ta pèrmití pa lei, di kua a konsider’é un sospechoso. A detené e dama di inisial N.S. di 20 aña di edat i a hib’é warda di polis. El a haña prohibishon di manehá pa 5 ora. E otro shofùr di skuter a haña atvertensia pa no por mustra su reibeweis i pa manehá sin seguro bálido.
Outo di polis enbolbí den aksidente
Djamars 20 di yanüari, alrededor di 5.35 or di atardi, ‘meldkamer’ sentral a risibí notifikashon tokante un aksidente entre un vehíkulo di servisio i un outo riba Kaya Korona.
E vehíkulo di servisio, un outo di polis ku lusnan óptiko i señal di zonido (lusnan blou i zonido) tabata riba Kaya Korona direkshon di un asistensia. Na altura di Kaya Haldu un outo a subi kaya pa drenta Kaya Maria. E shofùr di e outo aki a para diripiente mei mei di kaya i seguidamente a bolbe kuminsá kore. E outo di polis a purba desviá e outo aki, pero un choke tabata inevitabel. Dor di e impakto e outo di polis a baha kaminda i a resultá riba tereno di un kas.
Konforme e maneho ‘botsen is blazen’, a hasi un tèst di supla ku ámbos shofùr. For di esaki den ámbos kaso no tabatin kuestion di uso di alkohòl.
KPCN ke konsientisá tur usuario di tráfiko ku ora nan mira un outo di polis, ambulans, òf brantwer aserkando ku lusnan óptiko i señal di zonido (lusnan blou i zonido), ku ta trata aki di un emergensia. Bo reakshon den tráfiko por hasi e diferensia.
-
Keda kalmu i no drenta pániko. Mira for di kua direkshon e vehíkulo di emergensia ta bini i kua direkshon e ta bai.
-
No hasi maniobra inesperá. Usa bo lusnan di direkshon pa e shofùr di e vehíkulo di emergensia mira kiko ta bo intenshon.
-
No djis para riba kaminda. Purba habri kaminda dor di hala na banda, pero nunka para na un lugá di kua bo no tin bista òf meimei di un krusada.
-
Yudá nos personalnan di emergensia pa nan por hasi nan trabou di un forma rápido i seif.
KPCN ta konta ku bo koperashon den tráfiko. Huntu nos ta hasi un diferensia pa seguridat riba kaminda.
Detenshon pa menasa ku arma di kandela
En konekshon ku un investigashon andando relashoná ku un kaso di menasa ku arma di kandela ku a tuma lugá 1 di yanüari 2026, riba djamars 20 di yanüari, alrededor di 10.15 or di mainta, a detené un hòmber di inisial J.E.M. di 60 aña di edat na un kas na Bario Den Tera.
Banda di esaki a tene dos entrada hudisial. Na un kas na Kaya Djindjá i na Bario Den Tera. Durante e entradanan hudisial no a konfiská nada relevante pa e investigashon.
Investigashon den a kaso ta kontinuá.
Ladronisia for di outo
Djaluna 19 di yanüari, alrededor di 5 or di atardi, polis a risibí notifikashon tokante ladronisia for di un outo na e miradó na Altamira Unjo den Rincon. Deskonosínan a bai ku pertenensianan for di un vehíkulo stashoná na e sitio. Ta trata di entre otro sèn kèsh i vários prenda. E sospechoso a hui despues di e ladronisia i a disparsé den mondi. Polis a hasi investigashon na e sitio i a buska e sospechoso den bisindario, pero sin resultado. Ta investigando e kaso.
Aksidente
Djaluna 19 di yanüari, alrededor di 1 or di mèrdia, ‘meldkamer’ sentral a risibí notifikashon tokante un aksidente na Kaya Imelda, di kua un vehíkulo a alkansá un mucha hòmber ménor di edat. Ambulans a transportá e víktima pa hòspital pa tratamentu médiko mas avansá. Pa motibunan ainda deskonosí, un outo a bai patras i a alkansá e mucha hòmber. Na e sitio polis a hasi un investigashon pa sa kousa eksakto di e aksidente.