Detenshonnan pa maltrato
Djaweps 22 di yanüari, alrededor di 2.45 or di atardi, a detené un hòmber di inisial J.L.W. di 28 aña di edat pa maltrato, i un hòmber di inisial R.G.D. di 48 aña di edat pa maltrato i menasa. A detené ámbos sospechoso despues di un konfrontashon ku otro durante un mediashon na warda di polis. Investigashon den e kaso ta kontinuá.
Kòntròl planiá di tráfiko
Djaweps 22 di yanüari a tene un kòntròl planiá di tráfiko na Kaya Karibe. A para i kontrolá diesdos (12) vehíkulo, di kua a duna kuater (4) but.
E butnan tabata pa e siguiente violashonnan:
1x pa no por mustra un reibeweis bálido;
3x pa no por mustra seguro bálido.
Lo tene e kòntròlnan aki regularmente, na kua lo aktua ku man duru na momentu ku shofùrnan no tin nan dokumentunan na òrdu òf no kumpli ku reglanan di tráfiko. Si bo no tene bo mes na e reglanan, bo por haña un but. E suma di e butnan pa e violashonnan menshoná ta varia entre $30 i $225.
Aksidente entre dos outo
Djárason 21 di yanüari, alrededor di 6 or di atardi, ‘meldkamer’ sentral a risibí notifikashon tokante un aksidente entre dos outo na e krusada di Kaya Piedra Presioso i Kaya Rubi. Pa motibu di keda sin duna preferensia, e dos vehíkulonan a dal den otro, di kua despues un di e outonan a bai dal den kurá di un kas. Un di e shofùrnan tabata keha di doló i personal di ambulans a hasi un chekeo médiko kuné na e sitio mes. Konforme e maneho ‘botsen is blazen’, a hasi un tèst di supla ku ámbos shofùr. For di esaki den ámbos kaso no tabatin kuestion di uso di alkohòl.
Kandela na edifisio
Djárason 21 di yanüari, alrededor di 5.30 or di atardi, ‘meldkamer’ sentral a risibí notifikashon tokante kandela pegá ku un edifisio na Amboina. Pa motibu ku e kandela tabata konsentrá na e trapi di e edifisio, e habitantenan di e promé piso no por a bini abou. Na yegada di polis i brantwer a konstatá ku pa motibunan ainda deskonosí, algun kaha di karton i palu tabata na kandela. E vlamnan a okashoná daño na e edifisio i tambe e trapi ku ta bai e promé piso. Brantwer a paga e kandela.