Notisia26-01-2026 | 13:16

Detenshon pa destrukshon

Djaluna 26 di yanüari, alrededor di 10 or di mainta, a detené un hòmber di inisial R.G.R.S. di 22 aña di edat na Kaya Industria Nort. E sospechoso a kometé destrukshon na un negoshi. Ta investigando e kaso. 

Detenshon pa enkubrimentu

Djadumingu 25 di yanüari, alrededor di 9.10 or di anochi, a detené un hòmber di inisial R.J.S. di 44 aña di edat na Kaya Barakuda pa enkubrimentu. E detenshon a tuma lugá despues ku mas trempan riba e dia ei, e sospechoso a bai ku un 'fatbike' ku tabata sin supervishon na Kaya Wals. A topa e fatbike den e vehíkulo di e sospechoso i a konfiská esaki. Investigashon den e kaso akí ta kontinuá.

Tres detenshon pa violashon Lei di Opio

Den oranan trempan di mainta di djadumingu 25 di yanüari, alrededor di 6.10 or, durante un kòntròl rutinario polis topa ku un kantidat di supstansianan probablemente narkótiko den un outo. Aki a detené dos persona na Kaya Maria pa violashon di Lei di Opio BES. Ta trata di un dama di inisial E.K. di 28 aña di edat i un hòmber di inisial S.v.d.H. di 41 aña di edat.

En konekshon ku e kaso, algun ratu despues, a detené un hòmber di inisial S.S.A. di 51 aña di edat na un kas na Kaya Maria. 

Relashoná ku e investigashon aki a tene un entrada hudisial na un kas situá na Kaya Maria. Durante e entrada hudisial a konfiská algun artíkulo relevante pa e kaso. Tambe a konfiská e outo ku e sospechosonan tabata den dje.

Detenshonnan pa manehá bou di influensia di alkohòl

Djasabra 24 di yanüari, alrededor di 11.35 or di anochi, a detené un hòmber di inisial J.G.F.V. di 57aña di edat na Kaminda Onima. E sospechoso tabata enbolbí den un aksidente entre tres vehíkulo riba e kaminda menshoná. Konforme e maneho ‘botsen is blazen’ a hasi tèst di supla ku tur shofùr. For di esaki a resultá ku serka dos shofùr no tabatin kuestion di uso di alkohòl, pero ku e di tres shofùr a konsumí mas alkohòl ku ta pèrmití pa lei. Abase di e resultado di un análisis di rosea na warda di polis, a konfiská reibeweis di e sospechoso. 

Djasabra 24 di yanüari, alrededor di 7 or di anochi, a detené un hòmber di inisial J.L.P.B. di 51 aña di edat na Kaya Industria. E sospechoso tabata enbolbí den un aksidente entre dos vehíkulo riba e sitio di stashoná outo di un supermerkado. Konforme e maneho ‘botsen is blazen’ a hasi tèst di supla ku ámbos shofùr. Serka e sospechoso e tèst di supla a duna indikashon ku el a surpasá e límite pèrmití pa lei. Sinembargo for di un análisis di rosea na warda di polis a resultá ku e sospechoso a konsumí alkohòl, pero bou di e límite pèrmití pa lei. A lag’é den libertat pero el a haña but pa manehá sin reibeweis. 

Djabièrnè 23 di yanüari, alrededor di 8.15 or di anochi, a detené un hòmber di inisial G.W.P. di 59 aña di edat riba Bulevar Miguel A. Pourier. E sospechoso tabata enbolbí den un aksidente, di kua el a dal den un buriku. Konforme e maneho ‘botsen is blazen’ a hasi tèst di supla ku e shofùr ku a duna indikashon ku el a surpasá e límite pèrmití pa lei. For di un análisis di rosea na warda di polis a resultá ku e sospechoso a konsumí alkohòl, pero bou di e límite pèrmití pa lei. A lag’é den libertat.

Kòntròlnan severo riba plachi di number: Polis a partí but

E último simannan, Kuerpo Polisial Hulanda Karibense (KPCN) a realisá diferente kòntròl di tráfiko di kua a pone èkstra atenshon riba presensia di plachinan di number. Aki a para diferente vehíkulo i a duna but na shofùrnan ku no ta kumpli ku regla.

Polis a tuma nota ku mas i mas vehíkulo no ta kumpli ku e eksigensianan legal pa loke ta plachi di number. E resultadonan di e último kòntròlnan ta lo siguiente:

  • 11x shofùr a haña but pa manehá sin niun plachi di number òf ku plachinan inbálido.

  • 64x shofùr a haña but pa manehá sin un plachi di number dilanti òf patras.

  • 25x atvertensia (waarschuwing) pa plachinan ku no tabata bon visibel òf pa otro motibunan ku no ta kumpli ku e eksigensianan legal.

Segun e Ordenansa di Tráfiko Boneiru 2019 (artíkulo 97, sup 1), tur vehíkulo motorisá, ku eksepshon di skuter, bròmer i motosaikel, mester tin dos plachi di number bálido i bon visibel. Un na e parti dilanti i un na e parti patras di e vehíkulo. Kore sin òf ku solamente un plachi di number ta un infrakshon.

Durante e kòntròlnan a konstatá spesífikamente e siguiente infrakshonnan:

  • Falta di plachi di number: Vehíkulonan ku tin solamente un plachi di number (sea dilanti òf patras).

  • Kore sin plachi di number: Vehíkulonan ku ta partisipá den tráfiko sin niun plachi di number.

  • Plachi di number falsifiká: Uso di plachinan trahá òf falsifiká ku no ta emití pa Entidat Públiko Boneiru (OLB).

Ademas, no ta pèrmití pa stroba e visibilidat di e plachi di number, por ehèmpel dor di usa tapa di plèstik ‘plastic cover’ muchu skur òf tras di winshil skur. Dekorashon òf ‘frame’ di plachi di number ku no ta ofisial tampoko no ta pèrmití. Pa loke ta skuter, bròmer i motosaikel, e plachi di number mester ta fihá na un manera visibel patras di e vehíkulo.

Polis ta rekordá tur doño di vehíkulo ku ta pèrmití solamente plachinan original, emití pa OLB. Kore ku plachi di number falsifiká ta un echo kastigabel i por kondusí na but i asta konfiskashon. Bo a pèrdè bo plachi di number, si a hòrt’é òf si e ta dañá, regla esaki mas pronto posibel via e instansianan konserní.

Polis lo kontinuá ku e kòntròlnan akí, tantu durante kòntròlnan regular komo esnan planiá. Nos ta konsehá tur siudadano pa kontrolá bo vehíkulo promé bo sali. Pèrkurá ku bo asuntunan ta na òrdu i evitá gastu innesesario.

Detenshon pa ladronisia di outo 

Djasabra 24 di yanüari, alrededor di 4.50 or di mardugá, a detené un hòmber di inisial B.A.G.A. di 30 aña di edat na warda di polis pa ladronisia di un outo. Den oranan di anochi di djabièrnè 23 di yanüari, e sospechoso a bai ku un vehíkulo sin pèrmit for di dilanti di un kas na Kaya Edna. A haña e vehíkulo i a konfiská esaki.