KRALENDIJK – Kuerpo Polisial Hulanda Karibense (KPCN) i Ministerio Públiko BES (OM) ta preparando pa e aktividatnan di karnaval na Playa i Rincon. Durante marchanan di karnaval lo mantené órden estriktamente pa garantisá ku rutanan di emergensia ta keda liber, pa kumpli ku medidanan di tráfiko i kontra komportashon peligroso den tráfiko (fivermentu) paden i rondó di e aktividatnan di karnaval.
Den e próksimo simannan tin diferente aktividat den kuadro di karnaval, di kua marcha di mucha, marcha di tiner i e marcha grandi, komo tambe e tradishonal marchanan di despedida. E eventonan akí ta atraé un públiko grandi. Pa e motibu aki ta di gran importansia ku servisionan di emergensia, manera ambulans, brantwer i polis, por hasi nan trabou rápidamente i sin estorbo den kaso di un emergensia. Rutanan blòkiá por pone bida di hende na peliger.
Polis i OM lo aktuá severamente e aña akí kontra personanan ku blòkia rutanan di emergensia, move barikada òf mustra komportashon peligroso den tráfiko. Apesar di atvertensia i medidanan den pasado, ta keda sosodé ku ta ignorá òf ta move barikada pa kore ku vehíkulonan ku no ta outorisá, den áreanan será ku ta destiná solamente pa peaton, òf sea pa públiko i e marcha di karnaval. E komportashon akí ta hopi peligroso i inaseptabel.
P’esei ta estriktamente prohibí pa:
-
Stashoná tras di barikada;
-
Habri òf move barikada;
-
Manehá òf stashoná den e área será ku barikada òf restringí (área liber di tráfiko);
-
Mustra komportashon peligroso òf molestioso den tráfiko (manera fivermentu) den besindario di aktividatnan di karnaval.
Infrakshonnan tin konsekuensia direkto i serio. Den kaso di infrakshon, lo aktua mesora.
Sankshonnan den kaso di infrakshon:
-
Tou: Lo tou vehíkulonan i hiba nan warda di polis;
-
Entrega bèk: Entrega di e vehíkulo ta dependé di e kapasidat disponibel i den sierto kaso esaki por dura algun dia;
-
Prosèsferbal: E shofùr ta haña un prosèsferbal;
-
Gastu: Gastunan di ‘takelwagen’ ta kompletamente riba kuenta di e doño i ta varia entre $85 i $150, dependé di e situashon.
E meta di e medidanan akí no ta pa stroba e fiesta, pero pa garantisá seguridat di e partisipantenan, e públiko i servisionan di emergensia. Polis i OM ta hasi un yamada urgente na un i tur pa respetá e reglanan i karga bo responsabilidat.
Solamente huntu nos ta perkurá pa Karnaval 2026 keda un fiesta di kua tur hende por disfrutá na un manera seif i responsabel.