Detenshon pa menasa ku arma i maltrato
Djaluna 2 di febrüari, alrededor di 1.50 or di atardi, a detené un hòmber di inisial J.A.M.J. di 18 aña di edat na Kaya Thomas M. Marchena pa menasa ku arma i maltrato. E detenshon a tuma lugá despues ku e sospechoso a menasá i maltratá su bisiña durante un bringamentu. Aki a konfiská un machete ku a usa pa menasá kuné. Investigashon den e kaso ta kontinuá.
Aksidente entre outo i bròmer
Djaluna 2 di febrüari, alrededor di 7.30 or di mainta, ‘meldkamer’ sentral a risibí notifikashon di un aksidente entre un outo i un bròmer na e krusada di Kaya Gilberto F. Croes i Kaya Italia. Shofùr di e bròmer a resultá heridá i ambulans a transport’é pa hòspital pa tratamentu médiko. Konforme e maneho ‘botsen is blazen’ a hasi tèst di supla ku shofùr di e outo, pero no tabatin indikashon di uso di alkohòl. Pa motibu di prioridat médiko, no por a hasi un tèst di supla ku shofùr di e bròmer.
Shete (7) detenshon pa manehá bou di influensia di alkohòl
Durante e dianan ku a pasa, a detené shofùrnan na diferente sitio pa manehá bou di influensia di alkohòl.
Djaluna 2 di febrüari, alrededor di 1.55 or di mardugá, a detené un dama di inisial J.C.L.B. di 48 aña di edat na Kaya Bonaire. E tabata enbolbí den un aksidente riba un sitio di stashoná outo. E sospechoso a nenga di sigui instrukshonnan i e no a koperá pa hasi un análisis di rosea na warda di polis. A konfiská su reibeweis.
Djadumingu 1 di febrüari, alrededor di 3.15 or di atardi, un aksidente a tuma lugá riba Kaminda di Sorobon, di kua un outo a dal den un palu di lus. E shofùr a resultá heridá pero a nenga bai hòspital pa tratamentu médiko. Konforme e maneho ‘botsen is blazen’ a hasi tèst di supla ku e shofùr, di kua a resultá ku e ta bou di influensia. A detené e hòmber di inisial I.A.V. di 44 aña di edat i a hib’é warda di polis. Aki a resultá ku e no tin reibeweis i e no por a mustra dokumentunan di seguro, di kua el a haña but.
Djadumingu 1 di febrüari, alrededor di 3.20 or di mardugá, a detené un dama di inisial D.J.M.P. di 22 aña di edat na Kaya Libertador Simon Bolivar. e sospechoso a dal ku su outo den un piòn di betòn dilanti warda di polis. For di un tèst di supla a resultá ku e ta bou di influensia. El a haña un prohibishon pa manehá di tres(3) ora.
Djasabra 31 di yanüari, alrededor di 7.50 or di anochi, ‘meldkamer’ sentral a risibí notifikashon tokante un minibùs ku a dal den un palu di lus riba Kaya Caribe. Na e sitio, polis a topa ku e vehíkulo ku daño na e parti dilanti. Durante kòntròl a hasi un tèst di supla, di kua a resultá ku e shofùr a supla riba e límite permití pa lei. A detené e hòmber di inisial M.G.J.B. di 56 aña di edat i a hib’é warda di polis. Aki a resultá ku e no tin reibeweis i a haña but.
Kòntròl riba uso di alkohòl
Den oranan di mardugá di djasabra 31 di yanüari, a tene un kòntròl riba uso di alkohòl na Kaya Libertador Simon Bolivar. Aki a kontrolá seis(6) shofùr, di kua a detené tres(3) pa manehá bou di influensia di alkohòl. Banda di esaki a duna dos(2) but pa manehá sin reibeweis.
Ta trata di un dama di inisial L.K.D. di 36 aña di edat ku a haña prohibishon pa manehá di sinku(5) ora. Un hòmber di inisial D.v.d.M. di 20 aña di edat a haña prohibishon pa manehá di un(1) ora i un hòmber di inisial L.D. a haña prohibishon pa manehá di dos(2) ora.
Polis ta enfatisá ku manehá bou di influensia ta forma un peliger serio pa e shofùr mes i pa otro usuarionan di tráfiko. Ta urgi shofùrnan pa no manehá un vehíkulo bou di influensia di alkohòl. Huntu nos ta traha na un tráfiko seif.
Kachó ta morde víktima
Den oranan di mainta di djadumingu 1 di febrüari, alrededor di 10.15 or, ‘meldkamer’ sentral a risibí notifikashon ku kachó a morde un persona seriamente riba Kaya Tintorero. Na yegada e agentenan ku e víktima tabatin múltiple herida na tantu e parti ariba i e parti di su kurpa, despues ku tres kachó a atak’é. E agentenan a duná e víktima promé asistensia miéntras tabata warda riba ambulans, ku despues a tuma ofer. A transportá e víktima pa hòspital pa tratamentu médiko. Despues di un investigashon kòrtiku, polis a disidí pa laga dòkter di bestia pone tur e kachónan drumi. Doño di e kachónan lo haña un but konforme artíkulo 3, insiso 1 di e Ordenansa di Kachó Bonaire, debí ku anteriormente el a haña un atvertensia pa motibu ku su kachónan tabata kana lòs pafó di kurá.
KPCN ke hala atenshon di doñonan di kachó pa tene kachónan den kurá dor di sòru pa un kurá bon será i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashon i treinen di bo kachó.
Menor di edat detené pa intento di ladronisia
Den oranan di mardugá di djadumingu 1 di febrüari, alrededor di 3.45 or, a detené un mucha hòmber di inisial J.J.J.R. di 16 aña di edat na Bulevar Julio A. Abraham. Agentenan a reakshoná riba un notifikashon di un situashon sospechoso na un akomodashon turístiko i a topa tres mucha hòmber riba ‘fatbike’ ku tabata kumpli ku e deskripshon duná. Na momentu ku a mira polis, nan a purba hui. A sigui nan tras ku outo i na pia, i a detené un sospechoso. E sospechoso kontinuamente no tabata duna oido na òrdu di polis, despues di kua a logra detené. A detené pa intento di ladronisia i pa nenga sigui òrdu di polis. A konfiská e fatbike ku e sospechoso a usa pa purba hui.
Kòntròl di tráfiko
Djasabra 31 di yanüari a tene un kòntròl di velosidat riba Kaya Caribe na Nort’i Saliña. Ku un ‘lasergun’ a midi velosidat di 95 vehíkulo aserkando. Durante e kòntròl aki, no a duna but pa surpasá e velosidat máksimo permití. Sí, a duna kuater(4) but, pa manehá sin reibeweis, pa no por mustra un prueba di seguro, pa no bisti faha di seguridat i pa tene telefòn miéntras ta stür.
Na mesun momentu a tene un kòntròl di tráfiko riba Bulevar Gobernador N. Debrot. Aki a kontrolá sinkuenta(50) vehíkulo, di kua a duna diesnuebe(19) but.
E butnan ku a duna ta pa e siguiente violashonnan:
-
6x pa no por mustra un seguro bálido;
-
5x pa manehá sin reibeweis bálido;
-
3x pa manehá sin faha di seguridat bistí;
-
5x pa manehá sin plachi di number dilanti.
Banda di esaki a tene un kòntròl di velosidat riba Bulevar Miguel A. Pourier na Rincon. A midi velosidat di 120 vehíkulo. Aki a duna nuebe(9) but pa surpasá e velosidat máksimo permití. Tres(3) shofùr a haña atvertensia, pa manehá sin reibeweis bálido, pa manehá sin plachi di number dilanti i pa no bisti faha di seguridat.
A kontrolá total 265 vehíkulo durante e akshon aki, a parti 32 but i a duna 3 atvertensia.
Detenshon pa ladronisia
Djabièrnè 30 di yanüari, alrededor di 2.30 or di mardugá, a detené un hòmber di inisial N.W.F.K. di 28 aña di edat na Kaya C.E.B. Hellmund pa ladronisia. E sospechoso a kue un hèlm sin pèrmit for di den un skuter stashoná. Investigashon den e kaso ta kontinuá.
Kòntròl di velosidat
Djaweps 29 di yanüari a tene kòntròl di velosidat riba Kaya Caribe. Ku un ‘lasergun’ a midi velosidat di 49 vehíkulo aserkando. Durante e kòntròl a duna un(1) but pa surpasá e velosidat máksimo permití
KPCN ta kontinuá ku e tipo di kòntròl aki dirigí riba velosidat na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.