Ladronisia di baterianan di ‘fatbike’
Djabièrnè 20 di febrüari a drenta keho tokante ladronisia di un bateria di baiskel ‘fatbike’. E fatbike tabata stashoná den Kaya Grandi i deskonosínan a bai ku e bateria.
Djárason 18 di febrüari a drenta keho tokante ladronisia di un bateria di ‘fatbike’. E fatbike tabata stashoná na un rèki di baiskel na un akomodashon turístiko riba Bulevar Gobernador N. Debrot. Deskonosínan a bai ku e bateria.
Akshon di listramentu preventivo
Den kuadro di listramentu preventivo relashoná ku e periodo di karnaval, polis a tene un kòntròl den oranan di anochi di djaweps 19 di febrüari na Kaya Nikiboko Sùit. Durante e akshon aki, a listra tantu persona komo vehíkulo.
Durante e kòntròl, a konfiská entre otro un kuchú i vários artíkulo ku probablemente ta destiná pa preparashon i benta di supstansianan narkótiko.
Listramentu preventivo
Fiskal mayó ta outorisá kuerpo polisial pa listramentu preventivo. Esaki ta nifiká ku por listra tur hende den sierto áreanan di riesgo di seguridat designá sin ku ta nesesario ku tin sospecho òf indikashon pa hasi esei.
Polis ta konta ku bo(so) koperashon. Esun ku nenga di koperá ku listramentu preventivo ta kore riesgo di detenshon.
Listramentu preventivo ta keda un instrumento den e lucha kontra poseshon di arma i otro echonan kastigabel.
Kiebro na edifisio di gobièrnu
Djaweps 19 di febrüari, alrededor di 6.20 or di mainta, polis a risibí notifikashon tokante kiebro na un edifisio di gobièrnu na Kaya Neerlandia. Deskonosínan a haña akseso na e edifisio i a bai ku kontenido di un klùis. Ta investigando e kaso.
Polis ta hasi un apelashon na kualke persona ku tin informashon relevante òf sa algu tokante e kaso akí, pa tuma kontakto via e liña di tep anónimo 9310.
Ladronisia di baiskel eléktriko
Djaluna 16 di febrüari a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl Ouxi V8. E baiskel tabata stashoná na un muraya pafó di un akohida di mucha na Kaya Salsa, na momentu ku deskonosínan a bai kuné. Ta investigando e kaso.