Detenshonnan pa manehá bou di influensia di alkohòl
Djaluna 23 di febrüari, alrededor di 1.20 or di mardugá, a detené un hòmber di inisial O.S. di 38 aña di edat na Hanchi Amboina. E sospechoso a pèrdè kòntròl i a dal ku su outo den un palu di lus. A resultá ku e shofùr tabata manehá bou di influensia. El a haña un prohibishon di manehá pa 4 ora.
Djasabra 21 di febrüari, alrededor di 9.25 or di anochi, a detené un hòmber di inisial J.H.O.V. di 29 aña di edat riba Kaya Korona. E sospechoso tabata manehá un skuter i a dal patras di un outo. A resultá ku e sospechoso tabata manehá bou di influensia i ademas e no por a mustra un reibeweis ni seguro bálido. Pa esaki el a haña un but.
Djasabra 21 di febrüari, alrededor di 1.50 or di mardugá, a detené un hòmber di inisial R.L.v.H. di 39 aña di edat riba Kaya Internashonal. E sospechoso a dal ku su outo den e rotònde na e kaya menshoná i a resultá ku e tabata manehá bou di influensia. A konfiská su reibeweis.
A transportá tur sospechoso pa warda di polis pa kontinuá ku e trámitenan korespondiente.
Violashon di orario di sera
Den oranan di mardugá di djadumingu 22 di febrüari, alrededor di 3.40 or, polis a konstatá ku un establesimentu di hóreka den ‘Centrumgebied’, tabata habrí ainda i tabata bende kuminda na kliente. Debí na violashon di e orario di sera i pa no por mustra un pèrmit, lo traha un prosèsferbal pa violashon di Lei di Bebida i Hóreka BES (de Drank- en Horecawet BES).
Ladronisia di baiskel eléktriko
Djadumingu 22 di febrüari a drenta keho di ladronisia di un baiskel eléktriko. Deskonosínan a bai ku un ‘fatbike’ koló pretu, modèl V8. E baiskel tabata stashoná riba un sitio di parker na Kaya Libertador Simon Bolivar, na momentu ku deskonosínan a bai kuné. Ta investigando e kaso.
A konfiská ‘fatbike’
Den oranan di atardi di djasabra 21 di febrüari, agentenan a tuma nota di un hòmber riba Bulevar Gobernador N. Debrot ku tabata komportá di forma imprudente i tabata hasi kenshi riba su ‘fatbike’, miéntras e tabata riba karetera públiko. Polis a opserv’é i a duna e hòmber señal pa para riba Kaya Leeuwarden pa violashon di artíkulo 3 di e Ordenansa di Tráfiko Bonaire 2019, (Wegenverkeersverordening Bonaire 2019).
Ku e komportashon aki, e hòmber a pone tantu su mes komo otro usuarionan di tráfiko den su bisindario den peliger. A konfiská e fatbike i a duna e shofùr but pa kousa peliger i estorbo riba kaminda públiko.
Kòntròl di tráfiko
Djasabra 21 di febrüari a tene un kòntròl planiá di tráfiko na Kaya Nikiboko Sùit. A para i kontrolá dies(10) vehíkulo, di kua a duna dos(2) but.
E butnan tabata pa e siguiente infrakshonnan:
1x pa manehá sin seguro i reibeweis;
1x pa manehá sin seguro bálido.
Ademas a konfiská dos(2) plachi di number falsifiká.
Polis lo tene e kòntròlnan aki regularmente, na kua lo aktua ku man duru na momentu ku shofùrnan no tin nan dokumentunan na òrdu òf no kumpli ku reglanan di tráfiko. Si bo no tene bo mes na e reglanan, bo por haña un but. E suma di e butnan pa e violashonnan menshoná ta varia entre $30 i $225.