KRALENDIJK - For di djárason 25 di febrüari te ku djabièrnè 10 di aprel 2026, agentenan aspirante di Kuerpo Polisial Hulanda Karibense (KPCN) lo ta aktivo na Boneiru den kuadro di nan periodo di stazje. E agentenan aspirante akí, ku a inisiá nan estudio na Sint Maarten na komienso di aña 2025, lo ta visibel den e ünifòrm ofisial di polis riba kaya durante e periodo akí.
Imágen: © KPCN
Durante e periodo di stazje, e aspirantenan ta pone e konosementu ku nan a atkirí, den práktika. Nan ta asigná tantu na e departamentu di polis uniformá (Basispolitiezorg) komo na e departamentu di reshèrshi. Bou di guia di guiadónan di práktika eksperensiá, nan lo ehekutá diferente tarea di polis, ku ta varia for di vigilansia i kòntròlnan di tráfiko te ku tuma keho di, por ehèmpel, ladronisia òf maltrato.
E énfasis di e stazje di seis siman aki ta riba e atendementu profeshonal di insidentenan riba kaya i interogashon di personanan enbolbí segun e normanan hurídiko korekto. Dor di partisipá direktamente den e operashon diario di e kuerpo, e aspirantenan ta prepará nan mes pa nan futuro ròl komo un agente polisial kompleto.
Den futuro lo sigui mas periodo di stazje kaminda e aspirantenan lo ta visibel den e ünifòrm ofisial di polis. Kuerpo Polisial Hulanda Karibense ta pidi komunidat pa duna e aspirantenan e espasio nesesario pa nan siña nan profeshon den práktika.