Detenshonnan pa manehá bou di influensia di alkohòl
Djarason 25 di febrüari, alrededor di 1.30 or di mardugá, a detené un hòmber di inisial W.M.H.v.d.H di 19 aña di edat na Kaya Bonaire. Polis a mira e sospechoso ta kore ku su skuter den direkshon prohibí. A par’é i na promé instante durante kòntròl e no por a mustra un reibeweis ni seguro bálido. Ademas e sospechoso tabata mustra karakterístikanan di a konsumí alkohòl. A hasi un tèst di supla kuné i a resultá ku el a konsumí mas alkohòl ku ta permití pa lei. E sospechoso a haña un prosèsferbal i a konfiská su reibeweis.
Djarason 25 di febrüari, alrededor di 12.10 or di mardugá, a detené un hòmber di inisial M.A.R.N. di 76 aña di edat na Kaya Pawis. E sospechoso a dal ku su outo den kurá di un kas. En konekshon ku e aksidente, a hasi un tèst di supla kuné. For di e tèst a resultá ku el a konsumí mas alkohòl ku e límite permití pa lei. E sospechoso a haña un prosèsferbal i un prohibishon di manehá pa 4 ora.
Djamars 24 di febrüari, alrededor di 03.10 or di mardugá, a detené un hòmber di inisial J.D.C.B. di 33 aña di edat na Kaya Essequibo. A para e sospechoso pa un kòntròl rutinario. Durante e kòntròl, e shofùr tabata mustra karakterístikanan di a konsumí alkohòl. A hasi un tèst di supla kuné i a resultá ku el a konsumí mas alkohòl ku ta permití pa lei. Alabes e agentenan a sinti un holó fuerte, probablemente di supstansia narkótiko, prosedente for di e vehíkulo. Den kuadro di violashon di Lei di Opio BES 1960, a listra e vehíkulo di e sospechoso i a topa ku un kantidat chikitu di supstansia probablemente narkótiko. A destruí esakinan. E sospechoso a haña un prosèsferbal i un prohibishon di manehá pa 4 ora.
A transportá tur sospechoso pa warda di polis pa kontinuá ku e trámitenan korespondiente.
A topa ku baiskelnan probablemente hòrtá
Den oranan di mainta di djaluna 23 di febrüari, polis a topa ku dos baiskel den mondi den serkania di Hanchi Amboina. Ta trata di un baiskel koló bèrdè di e marka Raleigh i un baiskel koló pretu ku shinishi di e marka Batanus. A konfiská e baiskelnan pa mas investigashon.
Bo ta rekonosé un di e baiskelnan akí a base di e deskripshon? Tuma kontakto e ora ei ku polis na +599 715 8000.
Kiebro na matadero
Djaluna 23 di febrüari, polis a risibí notifikashon di kiebro den un edifisio na Kaminda Lagun. Na e sitio a resultá ku deskonosínan a drenta e edifisio i a bai ku, entre otro, un klùis. Den e klùis tabatin un kaha ku munishon i dos arma di mata bestia. Alabes a bai ku un montante di sèn. A tuma keho i e investigashon ta andando.
Polis ta pidi kualke persona ku a mira algu sospechoso den besindario di Kaminda Lagun òf ku sa mas tokante e kiebro akí, pa tuma kontakto mesora via 911 òf via e liña di tep anónimo 9310.