Outo ta bòltu
Djaweps 26 di febrüari, alrededor di 9.55 or di anochi, ‘meldkamer’ sentral a risibí notifikashon tokante un aksidente riba E.E.G. Bulevar, na altura di Playa Pal’i Mangel (Donkey’s Beach). Shofùr di un outo a pèrdè kòntròl i a dal den barankanan kantu di kaminda, despues di kua e vehíkulo a bòltu. Na yegada di polis, e shofùr a logra sali kaba for di e vehíkulo, ku tabata di bòltu riba su banda. Konforme e maneho di ‘botsen is blazen’, a hasi un tèst di supla ku e shofùr, i no tabatin indikashon tokante uso di alkohòl. E shofùr a resultá levemente heridá i a indiká ku e mes lo bai hòspital pa tratamentu médiko.
Kòntròl di tráfiko integral planiá
Den oranan trempan di mainta di djaweps 26 di febrüari, den koperashon ku Duana, a tene un kontròl di tráfiko integral na Kaya L.S. (Goi) Coffi, na altura di ofisina di Duana. Meta di e kòntròl aki tabata pa oumentá seguridat den tráfiko i detektá transporte di artíkulo i supstansianan ilegal.
Durante e kòntròl a kontrolá total 40 vehíkulo. A listra algun di e vehíkulonan ku asistensia di kachónan di Duana. Den e proseso aki a konfiská dos arma (un machete i un kuchú), un kantidat chikí di supstansia probablemente narkótiko i un mashin digital chikitu di pisa.
Ademas a duna but pa e siguiente infrakshonnan:
-
5x pa manehá sin reibeweis bálido (òf pa no por mustra esaki);
-
5x pa manehá sin plachi di number dilanti;
-
4x pa manehá sin seguro bálido (òf pa no por mustra esaki);
-
2x pa manehá sin faha di seguridat bistí.
E tipo di kòntròlnan aki lo sigui tuma lugá ku regularidat den futuro pa garantisá seguridat riba karetera públiko i den komunidat. Ku e enfoke integral aki, polis den koperashon ku partnernan manera Duana, ta keda visibelmente riba kaya.
Sambuyadó ta fayesé
Djárason 25 di febrüari, alrededor di 11.40 or di mainta, ‘meldkamer’ sentral a risibí notifikashon tokante un sambuyadó ku a bira malu na altura di e pir di salu na E.E.G. Bulevar. Personal di ambulans a kuminsá mesora ku reanimashon pero no por a hasi nada mas pa e víktima. Dòkter ku a bini na e sitio a konstatá morto di un dama Kanades di inisial L.l.M. di 69 aña di edat.
